REGİONLAR


Azərbaycanın hərtərəfli inkişafında gənclərin rolu danılmazdır

Qax, 2 fevral, Mustafa Dadaşov, AZƏRTAC

Azərbaycan Respublikasında gənclərlə iş sahəsinə dövlətimiz tərəfindən böyük diqqət və qayğı göstərilir. Gənclərin ölkənin ictimai-siyasi həyatında fəal iştiraka cəlb olunması, onların istək, rəy və təkliflərinə böyük önəm verilməsi dövlətin gənclərə qayğısının, bu yöndə apardığı siyasətin bariz nümunəsidir.

AZƏRTAC xəbər verir ki, əsası ümummilli lider Heydər Əliyev tərəfindən qoyulan 2 Fevral – Azərbaycan Gəncləri Günü Şəki-Zaqatala bölgəsi rayonlarında da silsilə tədbirlərlə qeyd olunub.

Əlamətdar gün münasibətilə fevralın 2-də Qax şəhərində keçirilən bayram tədbirinin iştirakçıları əvvəlcə Ulu Öndərin şəhərin mərkəzində ucaldılan abidəsi önünə gül dəstələri düzüb, xatirəsini ehtiramla yad ediblər.

Tədbirdə rayon gənclər və idman idarəsinin rəisi Əlövsət Bayramov çıxış edərək, 2016-cı ilin Qax gəncləri üçün də əlamətdar və yaddaqalan olduğunu bildirib, ölkəmizdə uğurla həyata keçirilən dövlət gənclər siyasətindən bəhs edib. Azərbaycanda dövlət gənclər siyasətinin formalaşmasının ümummilli lider Heydər Əliyevin adı ilə bağlı olduğunu vurğulayan idarə rəisi Ulu Öndərin respublikamıza rəhbərliyinin bütün dövrlərində sağlam gəncliyin, bu dövlətə sahib çıxa biləcək bir nəslin yetişməsinə çalışdığını diqqətə çatdırıb. Hazırda bu siyasətin Prezident İlham Əliyev tərəfindən uğurla davam etdirildiyi vurğulanıb, gənclər siyasəti ilə bağlı imzalanan fərman və sərəncamların, qəbul edilən Dövlət proqramlarının yeniyetmə və gənclərin hərtərəfli inkişafı və qabiliyyətlərinin üzə çıxarılması üçün geniş imkanlar açdığı qeyd olunub.

Tədbirin sonunda ictimai-siyasi, təhsil, idman, incəsənət və digər sahələrdə uğur qazanan gənclərə fəxri fərman və qiymətli hədiyyələr təqdim edilib.

X X X

Əsası ulu öndər Heydər Əliyev tərəfindən qoyulmuş dövlət gənclər siyasətinin Prezident İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri ictimai-siyasi həyatın bütün sahələrində aktiv fəaliyyəti ilə seçilirlər. Ölkəmizdə gənclər siyasəti artıq dövlət siyasətinin mühüm tərkib hissəsinə çevrilib.

AZƏRTAC xəbər verir ki, bu fikir əlamətdar gün münasibətilə Şəki şəhərində keçirilən bayram tədbirində şəhər gənclər və idman idarəsinin rəisi Vüqar İskəndərovun çıxışında səsləndirilib.

Şəkinin paytaxt Bakıdan sonra gənclərin ən çox təşkilatlandığı şəhərlərdən biri olduğunu vurğulayan idarə rəisi hazırda Şəkidə gənclərlə iş sahəsi ilə bağlı 8 qeyri-hökumət təşkilatının, 12 gənclər və 8 vətənpərvər klublarının, həmçinin ictimai birliklərin fəaliyyət göstərdiklərini diqqətə çatdırıb. Bildirilib ki, 2016-cı il Şəki idmançıları üçün də uğurlu olub. Rayonun yetirmələri respublika və beynəlxalq səviyyəli yarışlarda 126 medal qazanıblar.

Musiqi və rəqs kollektivlərinin, gənc ifaçıların rəngarəng konsert proqramı ilə davam edən tədbirdə 2016-cı ildə rayonun ictimai-siyasi həyatında, yarış və müsabiqələrdə fərqlənənlərə, həmçinin müxtəlif nominasiyalar üzrə “İlin qalibi” adına layiq görülən gənclərə mükafatlar təqdim olunub.

X X X

Zaqatala gəncləri öz bayramlarını - Azərbaycan Gəncləri Gününü böyük ruh yüksəkliyi ilə qeyd ediblər.

AZƏRTAC xəbər verir ki, əlamətdar gün münasibətilə fevralın 2-də Heydər Əliyev Mərkəzində keçirilən ümumrayon tədbirinin iştirakçıları əvvəlcə Ulu Öndərin mədəniyyət və istirahət parkında ucaldılmış abidəsi önünə gül dəstələri düzüb, xatirəsini ehtiramla anıblar.

Rayon rəhbərliyinin, fəal gənclərin iştirak etdiyi tədbirin əvvəlində ölkə və Zaqatala gənclərinin əldə etdiyi uğurlardan bəhs edən film nümayiş etdirilib.

Gənclər və idman idarəsinin rəisi Araz Əliyevin hesabat məruzəsində rayon gənclərinin 2016-cı ildə dövlət quruculuğu, təhsil, idman, incəsənət və digər sahələrdə qazandıqları uğurlardan ətraflı danışılıb.

Gəncləri əlamətdar bayram münasibətilə təbrik edən rayon icra hakimiyyətinin başçısı Mübariz Əhmədzadə ümummilli lider Heydər Əliyevin və onun layiqli davamçısı Prezident İlham Əliyevin gənclər siyasəti ilə bağlı imzaladıqları fərman və sərəncamların, qəbul edilən dövlət proqramlarının yeniyetmə və gənclərin hərtərəfli inkişafı üçün geniş imkanlar açdığını bildirib.

Çıxış edənlər ölkəmizin hərtərəfli inkişafında gənclərin rolunun danılmaz olduğunu vurğulayıblar.

Rayonun ictimai-siyasi həyatında fəal iştirak edən gənclərə diplom və qiymətli hədiyyələr təqdim olunub.

Tədbir konsert proqramı ilə başa çatıb.

X X X

Balakən rayonunun gənc idmançıları 2016-cı ildə respublika və beynəlxalq səviyyəli yarışlarda 16 dəfə birinci, 16 dəfə ikinci, 12 dəfə isə üçüncü yeri tutublar. Ötən il rayonun yetirməsi Rəsul Çunayev Olimpiya Oyunlarında yunan-Roma güləşi üzrə yarışlarda bürünc medal qazanıb. Taekvandoçu Şəhmir İbadov Varşavada keçirilən Avropa çempionatında ikinci, güləşçi Asxab Həmzətov Tbilisidə yeniyetmələr arasında dünya birinciliyində və İsveçdə keçirilən sərbəst güləş üzrə Avropa çempionatında üçüncü yeri tutub.

AZƏRTAC xəbər verir ki, bu faktlar 2 Fevral – Azərbaycan Gəncləri Günü münasibətilə fevralın 2-də Balakəndə keçirilən tədbirdə səsləndirilib.

Tədbir iştirakçıları əvvəlcə YAP Balakən rayon təşkilatının inzibati binasının foyesində rayon gənclərinin əl işlərindən ibarət sərgi ilə tanış olublar.

Rayon rəhbərliyi və fəal gənclərin iştirak etdiyi tədbirdə çıxış edənlər Azərbaycanda dövlət gənclər siyasətinin ümummilli lider Heydər Əliyevin adı ilə sıx bağlı olduğunu, hazırda bu siyasətin dövlətimizin başçısı tərəfindən uğurla davam etdirildiyini bildiriblər. Vurğulanıb ki, Gənclər və İdman Nazirliyinin yaradılması, gənclər siyasəti sahəsində qəbul edilən normativ-hüquqi aktlar, gənclərin ümumrespublika forumlarının keçirilməsi gənclərlə iş sahəsinin hüquqi əsaslarının və icra mexanizmlərinin müəyyən edilməsində mühüm rol oynayıb. Qeyd olunub ki. Azərbaycan Prezidentinin 2015-ci il 26 yanvar tarixli Sərəncamı ilə təsdiq edilən “2015-2025-ci illərdə Azərbaycan gənclərinin İnkişaf Strategiyası” gəncliyin inkişafında yeni mərhələnin təmin edilməsində böyük əhəmiyyətə malikdir.

Tədbirin sonunda fəal gənclər mükafatlandırılıblar.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.