İQTİSADİYYAT


Azərbaycanın ilk ixrac missiyasının Çinə səfəri başa çatıb

A+ A

Bakı, 17 noyabr, AZƏRTAC

Şərab istehsalı və ixracı ilə məşğul olan yerli şirkətlərin nümayəndələrindən ibarət Azərbaycanın ilk ixrac missiyasının Çinə səfəri başa çatıb.

İqtisadiyyat Nazirliyinin mətbuat xidmətindən AZƏRTAC-a bildiriblər ki, noyabrın 9-15-ni əhatə edən səfər çərçivəsində Azərbaycan şirkətləri Honqkonqda Beynəlxalq Şərab və Spirtli İçkilər Sərgisində və Quancou şəhərində “Interwine” Beynəlxalq Şərabçılıq Sərgisində iştirak edib. Azərbaycan şərabları hər iki sərgidə iştirakçılar və media nümayəndələri tərəfindən maraqla qarşılanıb, ölkəmizin “ASPI Winery” şirkətinin istehsalı olan “Savalan” şərabı isə qızıl medala layiq görülüb. Sərgi iştirakçılarına, həmçinin Azərbaycanda yaradılmış əlverişli biznes və investisiya mühiti, ölkəmizdə istehsal edilən rəqabətqabiliyyətli və ixracyönümlü məhsullar barədə məlumat verilib, müxtəlif çap materialları təqdim olunub.

Səfər zamanı Azərbaycan iş adamları çinli həmkarları ilə əməkdaşlıq imkanlarına dair müzakirələr aparıb, şərab istehsalında tətbiq edilən yeni texnologiyalarla tanış olub, Azərbaycanda İxracın və İnvestisiyaların Təşviqi Fondunun (AZPROMO) Çindəki nümayəndəliyinin dəstəyi ilə yerli distribüterlər və potensial müştərilərlə görüşlər keçiriblər.

İxrac missiyası çərçivəsində 500 min şüşə Azərbaycan şərabının Çinə ixracına dair müqavilə imzalanıb. Bundan başqa, Azərbaycan şərablarının dequstasiyası keçirilib, “ASPİ Winery” şirkəti tərəfindən şərablarımızın istehsal texnologiyasına dair master-klasslar təşkil olunub.

Qeyd edək ki, Azərbaycanın ilk ixrac missiyasının Çinə səfəri Azərbaycan Respublikası Prezidentinin 5 oktyabr 2016-cı il tarixli “Xarici ölkələrə ixrac missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı xarici ölkələrdə sertifikat və patentlər almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi Qaydasının təsdiq olunması haqqında” Fərmanına uyğun olaraq təşkil edilib və ixrac missiyasının xərcləri dövlət tərəfindən qarşılanıb.

Növbəti ixrac missiyası noyabrın 27-30-da Birləşmiş Ərəb Əmirliyinin Dubay şəhərinə təşkil ediləcək. Artıq bununla bağlı İqtisadiyyat Nazirliyinin www.economy.gov.az saytında elan yerləşdirilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.