İQTİSADİYYAT


Azərbaycanın maliyyə nazirinin rəhbərlik etdiyi nümayəndə heyəti Vaşinqtonda bir sıra görüşlər keçirib

A+ A

Vaşinqton, 8 oktyabr, AZƏRTAC

Azərbaycan Respublikasının maliyyə naziri Samir Şərifovun rəhbərliyi ilə Maliyyə Nazirliyi, Dövlət Neft Fondu və “Cənub Qaz Dəhlizi” Qapalı Səhmdar Cəmiyyətinin nümayəndələrindən ibarət heyət oktyabrın 6-7-də ABŞ-ın paytaxtı Vaşinqtonda keçirilən Beynəlxalq Valyuta Fondu (BVF) və Dünya Bankı Qrupunun illik toplantısında iştirak edib.

BVF və Dünya Bankına üzv ölkələrin yüksək vəzifəli dövlət və hökumət rəsmiləri, beynəlxalq maliyyə institutları, özəl sektor və vətəndaş cəmiyyəti nümayəndələrinin iştirak etdikləri illik toplantının rəsmi açılış mərasimində ABŞ Prezidenti Barak Obamanın videomüraciəti səsləndirilib, dünya iqtisadiyyatının cari vəziyyəti və gələcək inkişafının əsas istiqamətləri, dayanıqlı və tarazlaşdırılmış inkişaf strategiyaları, yoxsulluğun aradan qaldırılması, maliyyə bazarlarının tənzimlənməsi və maliyyə yardımlarının səmərəliliyi, o cümlədən qlobal iqtisadiyyat qarşısında olan çağırışlarla bağlı müzakirələr aparılıb.

Tədbir çərçivəsində maliyyə naziri Samir Şərifovun Dünya Bankının vitse-prezidenti Siril Müller, Çoxtərəfli İnvestisiya Zəmanətləri Agentliyinin rəhbəri və Dünya Bankının icraçı vitse-prezidenti Keiko Honda, Avropa İnvestisiya Bankının vitse-prezidenti Pim van Ballekom, Asiya İnkişaf Bankının vitse-prezidentləri Vençay Canq və Divakar Qupta, habelə bir sıra nüfuzlu kommersiya banklarının rəsmiləri ilə keçirdiyi işgüzar görüşlərdə ölkəmizin makroiqtisadi vəziyyəti, Prezident İlham Əliyevin rəhbərliyi altında hökumət tərəfindən həyata keçirilən iqtisadi islahatlar haqqında geniş məlumat verilib, eləcə də Azərbaycan Respublikası ilə beynəlxalq maliyyə institutları arasında həyata keçirilən mövcud layihələrin əhəmiyyəti qeyd olunub və uzunmüddətli uğurlu əməkdaşlığın önəmi vurğulanıb. Görüşlərdə, həmçinin “Şahdəniz” qaz-kondensat yatağının istismarının ikinci mərhələsinin işlənməsi, bu zaman hasil ediləcək təbii qazın nəqlini nəzərdə tutan “Cənub” qaz dəhlizi layihəsinin maliyyələşdirilməsində qeyd olunan təşkilatların iştirakı və digər əməkdaşlıq perspektivləri ilə bağlı məsələlər ətrafında fikir mübadiləsi aparılıb.

Səfər zamanı Azərbaycan nümayəndə heyəti, həmçinin ABŞ-ın dövlət katibinin iqtisadi və biznes əlaqələri üzrə köməkçisi Çarls Rivkin, Dövlət Departamentinin beynəlxalq enerji məsələləri üzrə xüsusi elçisi və əlaqələndiricisi Amos Hokştayn və ABŞ maliyyə nazirinin beynəlxalq bazarlar və inkişaf üzrə köməkçisi Marisa Laqo ilə də görüşlər keçirib. Bu görüşlərdə ikitərəfli ticari-iqtisadi əməkdaşlığın inkişafı, enerji sahəsində iki ölkə arasındakı ənənəvi strateji əməkdaşlığın davam etdirilməsi, o cümlədən “Cənub” qaz dəhlizi layihəsinin həyata keçirilməsi ilə bağlı ABŞ hökumətinin verdiyi dəstəyin Azərbaycanda yüksək qiymətləndirildiyi qeyd olunub, ölkəmizin yerləşdiyi regionda transkontinental daşımaların təşviqi üzrə səyləri və gördüyü işlərin vacibliyi vurğulanıb, transmilli layihələr və qarşılıqlı maraq doğuran digər məsələlər üzrə beynəlxalq maliyyə təşkilatları çərçivəsində sıx əməkdaşlıq edilməsi ətrafında müzakirələr aparılıb.

Yusif Babanlı

AZƏRTAC-ın xüsusi müxbiri

Vaşinqton

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.