REGİONLAR
Azərbaycanın müstəqil dövlətçilik tarixi ümummilli lider Heydər Əliyevin adı ilə bağlıdır
Naxçıvan, 20 oktyabr, AZƏRTAC
Naxçıvan Müəllimlər İnstitutunda Heydər Əliyev lektoriyasının növbəti məşğələsi keçirilib.
AZƏRTAC xəbər verir ki, məşğələni institutun rektoru, professor Oruc Həsənli açaraq, Azərbaycanın müstəqil dövlətçilik tarixinin ümummilli lider Heydər Əliyevin adı ilə bağlı olduğunu bildirib, ölkəmizin müstəqilliyinin qorunmasında və inkişaf etdirilməsində Ümummilli Liderin misilsiz xidmətlərini sadalayıb.
AMEA-nın müxbir üzvü Vəli Baxşəliyev “Ümummilli lider Heydər Əliyev və müstəqil Azərbaycan” mövzusunda çıxış edərək deyib ki, tale Azərbaycana ötən əsrdə iki dəfə müstəqilliyini əldə etməyə imkan versə də, ikinci dəfə bu müstəqilliyin qorunub saxlanılması ümummilli lider Heydər Əliyevin dərin zəkası, uzaqgörənliyi və xalqımız qarşısında əvəzolunmaz xidmətləri nəticəsində mümkün olub.
Qeyd edilib ki, ölkəmizin müstəqilliyinin əsasları dahi şəxsiyyətin uzaqgörənliyi sayəsində hələ ötən əsrin 70-ci illərində qoyulub. Məhz həmin dövrdən başlayaraq elm, təhsil, mədəniyyət və digər sahələrin inkişafında ciddi nailiyyətlər əldə edilib, Azərbaycan dili rəsmi dövlət dili kimi təsbit olunub, milli kadrların hazırlanması üçün mühüm addımlar atılıb.
Vəli Baxşəliyev vurğulayıb ki, 1993-cü ilin iyununda xalqın təkidli tələbi ilə siyasi hakimiyyətə qayıdan ulu öndər Heydər Əliyevin qətiyyəti sayəsində ölkədə vətəndaş müharibəsinin qarşısı alınıb, torpaqlarımızın işğalına son qoyulub. Dahi lider 1994-cü ildə atəşkəsə nail olaraq ölkəmizin inkişafı üçün şərait yaradıb, xalqın gözlədiyi qurtuluş missiyasını reallaşdırıb. Ümummilli Liderin hakimiyyətə qayıdışı Azərbaycana müstəqilliyi qorumağın nümunəsini, siyasi-iqtisadi sabitlik, hüquqi dövlət quruculuğu, vətəndaş qüruru gətirib. 1994-cü ildə “Əsrin müqaviləsi”nin bağlanması gənc Azərbaycan Respublikasının dünya iqtisadiyyatına inteqrasiya etməsində, onun tranzit potensialının artmasında mühüm addım olub. Bu müqavilə Şərqlə Qərb arasında əməkdaşlıqda Azərbaycanın regiondakı liderliyini təmin edib. 1995-ci ildə Azərbaycan Respublikasının Konstitusiyasının qəbul olunması isə ölkəmizin siyasi və iqtisadi həyatının hüquqi əsasda qurulmasında, hüquqi islahatların həyata keçirilməsində əhəmiyyətli rol oynayıb.
Ötən dövrdə Heydər Əliyev ideyalarının uğurla davam etdirilməsinin ölkəmizin, eləcə də muxtar respublikanın hərtərəfli inkişafına səbəb olduğunu deyən AMEA-nın müxbir üzvü qeyd edib ki, bu gün aparılan genişmiqyaslı tikinti-quruculuq işləri nəticəsində Naxçıvanın siması xeyli dəyişib, yerli xammala əsaslanan istehsal müəssisələrinin sayı artıb, nəticədə, Naxçıvanın ixrac potensialı ildən-ilə daha da genişlənib. Bütün bu uğurlar isə ulu öndər Heydər Əliyev tərəfindən əsası qoyulan və uğurla reallaşdırılan iqtisadi konsepsiyanın təntənəsi, müstəqilliyimizin bəhrələridir.