SİYASƏT
Azərbaycanın müstəqilliyinin əbədilik qazanmasında Ulu Öndərin böyük xidmətləri var
Bakı, 11 dekabr, AZƏRTAC
Suraxanı rayonu Heydər Əliyev Mərkəzi, Azərbaycan Respublikasının Ağsaqqallar Şurası, Suraxanı Rayon İcra Hakimiyyəti və YAP Suraxanı rayon təşkilatının birgə təşəbbüsü ilə Azərbaycan xalqının ümummilli lideri Heydər Əliyevin vəfatının 14-cü ildönümü ilə əlaqədar “Heydər Əliyev və azərbaycançılıq məfkurəsi” adlı tədbir keçirilib.
Suraxanı Rayon İcra Hakimiyyətindən AZƏRTAC-a bildiriblər ki, əvvəlcə tədbir iştirakçıları Ümummilli Liderin Heydər Əliyev parkında ucalan abidəsini ziyarət ediblər.
Sonra tədbir iştirakçıları Suraxanı Rayonu Heydər Əliyev Mərkəzi ilə tanış olublar, Ümummilli Liderin xatirəsinə həsr olunmuş poçt markalarına və kitab sərgisinə baxıblar.
Rayon icra hakimiyyətinin akt zalında ümummilli lider Heydər Əliyevə həsr olunmuş “Millət Atası” filmi nümayiş olunub.
Anım tədbiri Azərbaycan Respublikasının dövlət himninin səsləndirilməsi ilə başlayıb.
Sonra ulu öndər Heydər Əliyevin əziz xatirəsi bir dəqiqəlik sükutla yad edilib.
Çıxış edən rayon icra hakimiyyətinin başçısı İlqar Abbasov qeyd edib ki, tədbirin Respublika Ağsaqqallar Şurası ilə birgə keçirilməsi təsadüfi deyil. Azərbaycanda "ağsaqqal" sözü həmişə uca tutulub. Ulu öndər Heydər Əliyevin istər birinci, istərsə də ikinci hakimiyyəti dövründə ağsaqqallar daim yanında olub.
Öz həyatını bütövlüklə xalqına, Vətəninə həsr edən Ümummilli Lider həsəd aparılacaq bir ömür yaşadı. Ötən zaman kəsiyi göstərib ki, Ulu Öndərin həlledici bir məqamda hakimiyyətə gəlişi, Azərbaycanın müasir tarixinin şərəfli səhifələrinin yazılmasına və ölkəmizin müstəqilliyinin daim yaşamasına zəmin yaratdı.
Bu günlər respublikamızın hər yerində Azərbaycan xalqının ümummilli lideri Heydər Əliyevin əziz xatirəsi bir daha anılır.
İnsanın Vətəninin timsalına çevrilməsi nadir hadisələrdəndir. Məhz Ulu Öndər dünyanın bu, əlçatmaz mərtəbəyə yüksələn nadir şəxsiyyətlərindən biri olub.
Heydər Əliyev və azərbaycançılıq məfkurəsi müstəqil Azərbaycan dövlətinin ana xəttini təşkil edir. Azərbaycançılıq ideologiyası real müstəqilliyə nail olunması, vahid, bölünməz Azərbaycanın qorunması və möhkəmləndirilməsi üçün açardır.
Ulu Öndərin Azərbaycan təəssübkeşliyi nəticəsində 70-ci illərin sonu, 80-ci illərin əvvəllərində əsası qoyulmuş və inşa edilmiş müəssisələr Azərbaycanı yalnız aqrar ölkə və xammal bazası rolu oynayan müstəmləkə çərçivəsindən çıxaraq SSRİ-nin güclü iqtisadiyyata malik sənaye mərkəzlərindən birinə çevirmişdi. Görülən bu işlər azərbaycançılığın formalaşmasının sosial-iqtisadi əsaslarını təşkil edən xidmətlərin bir nümunəsidir. Azərbaycançılıq məfkurəsinin mənəvi əsasını təşkil edən Azərbaycan dilinin 1978-ci ildə, Sovet İmperiyasının çiçəkləndiyi bir dövrdə qəbul edilmiş Konstitusiyada dövlət dili kimi təsbit edilməsi, Heydər Əliyev dühasının unikal nailiyyəti idi.
Bütün bunlar vətəndaş, şəxsiyyət və lider kimi Heydər Əliyevin dövlətçilik təfəkkürü və azərbaycançılıq məfkurəsinə ən çətin dönəmlərdə də sadiq qalaraq Azərbaycanda milli mənlik şüurunun inkişafındakı xidmətlərinin bariz göstəricisidir.
2003-cü ildən bəri ötən zaman kəsiyi də Ümummilli Liderin ideya və idarəçilik məktəbinin əbədiyaşarlığının növbəti sübutu oldu. Ulu Öndərin layiqli davamçısı möhtərəm Prezidentimiz İlham Əliyev istər övlad, istər rəhbər, istər sərkərdə kimi Heydər Əliyev ucalığının təcəssümüdür, ən ümdə xəyalları gerçəyə çevirən dövlət başçısıdır. Prezident İlham Əliyevlə çiyin-çiyinə çalışan, onun ən yaxın silahdaşı, Heydər Əliyev siyasi kursuna, azərbaycançılıq ideologiyasına əsaslanan, milli soykökümüzə bağlı xeyirxah missiyası ilə seçilən respublikamızın Birinci vitse-prezidenti, Heydər Əliyev Fondunun prezidenti Mehriban xanım Əliyevanın da fəaliyyəti artıq sərhədləri aşaraq, sorağı planetin sayılıb-seçilən dövlətlərindən, ən mötəbər qurumların tribunalarından gəlir.
Heydər Əliyev siyasəti yaşayır və Azərbaycanın müstəqilliyini əbədi və dönməz edir.
Tədbirdə uzun illər Ulu Öndərin rəhbərliyi ilə ölkəmizin inkişafı istiqamətində yorulmadan çalışmış, bu gün də Prezident İlham Əliyevin müdrik rəhbərliyi altında müstəqil Azərbaycan Respublikasının çiçəklənməsinə öz töhfəsini verən, ölkənin ictimai-siyasi həyatında fəal iştirak edən, Azərbaycan Respublikası Ağsaqqallar Şurasının sədri, Milli Məclisin deputatı Fəttah Heydərov çıxış edərək deyib: “Ümummilli Lider mənim xatirəmdə dünyanın ən gözəl insanlarından biri kimi, işıqlı dünyanın ilahi tərəfindən yaradılmış ən gözəl, qədd-qamətli boy-buxunlu, fiziki cəhətdən çox sağlam, həmişə yadda qalan və yaradılmışların əksəriyyətindən fərqlənən, seçilən gözəl insan kimi qalıb. Heydər Əliyevin rəhbərliyi altında uzun müddət işlədiyim üçün onun şəxsi və rəhbərlik sahəsindəki yüksək keyfiyyətlərini bu gün də xatirəmdə canlandırıram. Onda böyük uzaqgörənlik, insanlara, xalqa, torpağa böyük sədaqət hissləri var idi. Heydər Əliyev yüksək insani keyfiyyətlərə malik bir şəxsiyyət idi. Ədaləti, düzlüyü, səmimiyyəti, insani keyfiyyətləri xüsusilə qiymətləndirən, ona məna verən bir böyük şəxsiyyət idi. Heydər Əliyevdə müqəddəs ideyalar, əməllər ətrafında insanları ətrafına yığmaq, öz arxasınca aparmaq qabiliyyəti var idi. Ona məxsus olan ən böyük keyfiyyətlərdən biri də səmimi olmaq idi. Ona görə də Heydər Əliyev ilk baxışda onunla təmasda, ünsiyyətdə olan insanları inandırır və onları doğru yola, düz yola istiqamətləndirməyi bacarırdı. Xalqa arxalanan, xalqı hər zaman öz arxasında görən, qəlbində Azərbaycan insanına məhəbbət olan rəhbər həmişə qalib olur”.
Milli Məclisin deputatı qeyd edib ki, Ümummilli Lider olmasaydı, müxtəlif qruplaşmalar Azərbaycanı parçalayacaqdı. Azərbaycanın bir hissəsi Şərqə, bir hissəsi Qərbə, bir hissəsi Şimala, bir hissəsi də Cənuba parçalanacaqdı. Müstəqil Azərbaycan, bugünkü Azərbaycan olmayacaqdı. Azərbaycan xalqı müdrik xalqdır. Bu xalqın möhtəşəm bir dövlət kimi yaşamağa haqqı var. Bu gün Azərbaycan dünyada tanınır. Dünyanın bütün qitələrində Azərbaycan insanı var, Azərbaycan sözü var. Azərbaycan məfhumu var. Azərbaycan mədəniyyəti, Azərbaycan incəsənəti Prezident İlham Əliyevin rəhbərliyi sayəsində, Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın fəaliyyəti sayəsində daha geniş miqyasda tanınır. Azərbaycan var, yaşayır, əbədi olaraq yaşayacaq.
Tədbirdə Milli Olimpiya Komitəsinin baş katibi, Milli Məclisin deputatı Ağacan Abiyev, Azərbaycan Respublikası Ağsaqqallar Şurası sədrinin müavini, tarix elmləri doktoru, akademik Teymur Bünyadov, Azərbaycan Respublikası Ağsaqqallar Şurası sədrinin müavini, tibb elmləri doktoru, AMEA-nın müxbir üzvü Sudeyif İmamverdiyev, Yeni Azərbaycan Partiyası Suraxanı rayon Təşkilatının sədri Vüqar Seyidov çıxış ediblər.
Sonda Azərbaycan xalqının ümummilli lideri Heydər Əliyevin zəngin irsinin təbliğində və Suraxanı rayonunun ictimai həyatında fəal iştirak etdiyinə görə Azərbaycan Respublikasının Ağsaqqallar Şurası rayon icra hakimiyyəti başçısının fəxri fərmanı ilə təltif edilib və məktəblilərin ifasında ədəbi-bədii kompozisiya göstərilib.