REGİONLAR
Azərbaycanın regionları son 10 ildə: dinamik inkişafın xronikası
Sürətli inkişaf Göygölün simasını tanınmaz dərəcədə dəyişib
Göygöl, 16 dekabr, AZƏRTAC
Ölkəmizin səfalı guşələrindən olan Göygöl rayonu indi özünün intibah dövrünü yaşayır desək, şübhəsiz yanılmarıq. Son 10 ildə burada görülən genişmiqyaslı abadlıq və quruculuq işləri rayonun simasını başdan-başa dəyişib. İnsanlar əvvəllər arzuladıqları xoşbəxt həyata qovuşaraq özlərini müstəqil dövlətin xoşbəxt vətəndaşları kimi hiss edirlər.
Göygöllülər bugünkü firavan həyata görə bütün işıqlı ömrünü xalqının xoşbəxt gələcəyinə həsr edən ümummilli lider Heydər Əliyevə, dahi rəhbərin layiqli davamçısı Prezident İlham Əliyevə minnətdardırlar. Rayon sakinləri deyirlər ki, Ulu Öndərin başa çatdıra bilmədiyi qlobal işləri uğurla həyata keçirən dövlətimizin başçısı ölkədə nəhəng layihələrə imza ataraq onların icrasına nail olub. Nəticədə Azərbaycanın bütün bölgələri, o cümlədən Göygöl rayonu sürətlə inkişaf edib.
AZƏRTAC xəbər verir ki, son 10 ildə Göygöl şəhərində, eləcə də kənd və qəsəbələrdə böyük infrastruktur layihələri həyata keçirilib. Sosialyönümlü obyektlər istifadəyə verilib. Sahibkarlıq inkişaf etdirilərək əhalinin rifahının yaxşılaşdırılması istiqamətində qlobal işlər həyata keçirilib. Nəticədə son 10 ildə rayonda ümumi məhsul istehsalı 4,7 dəfə, əsas kapitala yönəldilən investisiyanın həcmi isə 84 dəfə artıb.
Dövlətimizin başçısının sahibkarlığın inkişafına göstərdiyi diqqət və qayğının nəticəsidir ki, hesabat dövründə Sənaye və İqtisadiyyat Nazirliyinin Sahibkarlığa Kömək Milli Fondu tərəfindən Göygöldə 2047 sahibkara 11574 min manat güzəştli kredit verilib. Bu kreditlərin hesabına 163 kiçik, 3 iri sənaye müəssisəsi fəaliyyətə başlayıb ki, bunun da nəticəsində 9164 yeni iş yeri açılıb.
Prezident İlham Əliyev respublikaya rəhbərlik etdiyi son 11 ildə Göygölə 3 dəfə səfər edib, rayonun sosial-iqtisadi inkişafının sürətləndirilməsi üçün 4 Sərəncam imzalayıb. Prezidentin ehtiyat fondundan ayrılmış vəsaitlər hesabına rayonda abadlıq və quruculuq işlərinin həcmi genişləndirilərək yeni infrastruktur layihələri həyata keçirilib. Nəticədə 14 kilometrlik Göygöl-Topalhəsənli-Şəhriyar kəndlərini birləşdirən, eləcə də 10,5 kilometrlik Xəqani-Cümşüdlü-Haçaqaya kəndləri avtomobil yollarının əsaslı təmiri başa çatdırılıb. Son 10 ildə rayonda 18 məktəb binası inşa edilib, 1 uşaq bağçası tikilib, 19 məktəbdə və 5 uşaq bağçasında əsaslı təmir işləri aparılıb. Əvvəllər uyğunlaşdırılmış binada yerləşən rayon mərkəzi xəstəxanası üçün ən müasir bina tikilərək yeni tibb avadanlıqları ilə təchiz edilib. Bundan əlavə, rayon polis şöbəsi, prokurorluq və statistika idarəsi üçün yeni inzibati binalar, yeni şahmat məktəbi inşa olunub. Dövlətimizin başçısının iştirakı ilə yeni Olimpiya İdman Kompleksi istifadəyə verilib. Qızılca kənd folklor evi və kitabxana əsaslı şəkildə təmir edilib. Bakı-Qazax magistral avtomobil yolunun Göygöl rayonu ərazisindən keçən 36 kilometr hissəsi yenidən qurulub. Əhalinin içməli suya olan tələbatının ödənilməsi üçün rayon mərkəzinə Kürək çayından 25 kilometr uzunluğunda yeni magistral su kəməri çəkilib. Baş su bəndi, su təmizləyici qurğu, tutumu 6 min kubmetr olan 6 ədəd su anbarı istifadəyə verilib. Sutkada 5500 kubmetr gücündə olan çirkab suların təmizlənməsi üçün qurğu istismara verilib. Xaqani, Quşqara, Üçtəpə, Əhmədli, Nadil, Balçılı, Yeni Qızılca kəndlərində, həmçinin Hacıməlik qəsəbəsində də əhalinin su problemi həll olunub.
Əvvəllər olduğu kimi, son 10 ildə də Qarabağ müharibəsi əlilləri və şəhid ailələrinin sosial-məişət problemlərinin həlli diqqət mərkəzində saxlanılıb. Bu qəbildən olan insanlar üçün 36 mənzilli binanın inşası başa çatdırılaraq istifadəyə verilib. Fərdi yaşayış evi tikdirmək üçün Göygöl şəhərində 3, Nadil və Göycəkənd kəndlərinin hər birində 1 Qarabağ müharibəsi əlilinə həyətyanı torpaq sahəsi ayrılıb.
Son 10 ildə rayonda sosial obyektlərin sayı da xeyli artıb. Heydər Əliyev parkı genişləndirilərək burada əhalinin istirahətini təmin etmək üçün yeni guşələr yaradılıb. Yeni inşa olunan Heydər Əliyev Mərkəzi və Gənclər Mərkəzi, eləcə də qapalı və açıq idman meydançaları Göygöl şəhərinin gözəlliyinə yeni yaraşıq bəxş edib. Bayraq meydanı və muzeyi rayon sakinlərinin və qonaqların ən çox ziyarət etdikləri yerlərdən birinə çevrilib.
Vaxtilə alman ailələrinin yaşadıqları küçələrdəki evlər əsaslı şəkildə təmir edilərək əvvəlki görkəminə salınıb, XVIII əsr Lüteran kilsəsi təmir edilib, burada yaşamış sonuncu alman Viktor Klaynın yaşadığı mənzil muzeyə çevrilib. Rayonda görülən bu işlər əhalinin marağına səbəb olub. Təsadüfi deyildir ki, vaxtilə buradan köçüb gedən ailələr geri qayıtmağa başlayıblar. Təkcə onu demək kifayətdir ki, son 10 ildə əhalinin sayı 6 min 314 nəfər artıb.
Göygöllülər bu gün nikbin əhval-ruhiyyədədirlər. Onlar dövlətimizin başçısı tərəfindən təsdiq edilmiş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nda nəzərdə tutulmuş tədbirlərin yerinə yetirilməsi üçün bütün qüvvələrini səfərbərliyə alıblar. Dövlət Proqramında isə Göygöl rayonu ilə bağlı bir neçə layihənin həyata keçirilməsi nəzərdə tutulub. Bunlar rayonda damazlığın və üzümçülüyün inkişaf etdirilməsi, kənd və qəsəbələrdə yeni təhsil və səhiyyə ocaqlarının inşası, kəndarası yolların yenidən qurulması və s. məsələlərdir. Artıq rayonda bu istiqamətdə işlərə başlanılıb. İşin gedişi onu deməyə əsas verir ki, göygöllülər yeni Dövlət Proqramında nəzərdə tutulmuş tədbirləri uğurla yerinə yetirməklə, yaşadıqları rayonun daha da gözəlləşməsinə nail olacaqlar.
Sabir Əliyev
AZƏRTAC-ın müxbiri