Bakı, 1 aprel (AZƏRTAC). Azərbaycan Müəllimlər İnstitutunda (AMİ) 31 mart - Azərbaycanlıların Soyqırımı Günü ilə əlaqədar anma tədbiri keçirilmişdir.

AMİ-nin mətbuat xidmətindən AZƏRTAC-a bildirmişlər ki, əvvəlcə faciə qurbanlarının xatirəsi bir dəqiqəlik sükutla yad edilmişdir.

Mərasimdə çıxış edən professor Ramiz Məmmədzadə bildirmişdir ki, zaman-zaman azərbaycanlılara qarşı məqsədyönlü şəkildə həyata keçirilmiş etnik təmizləmə və soyqırımı siyasəti nəticəsində xalqımız ağır məhrumiyyətlərə düçar edilmişdir.

Vurğulanmışdır ki, azərbaycanlıların kütləvi şəkildə məhv edilməsi ötən əsrdə dünya tarixinin ən faciəvi səhifələrindəndir. 1918-ci ildə daşnak erməni silahlı dəstələri Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə azərbaycanlılara qarşı kütləvi qırğınlar törətmişlər.

AMİ-nin dosenti Namiq Əliyev ermənilərin əsrlər boyu davam edən antitürk siyasətindən və terrorçuluq əməllərindən danışmışdır. Bildirilmişdir ki, onilliklər ərzində davam edən soyqırımı siyasəti total ideoloji təcavüz, terror, hətta ayrı-ayrı vaxtlarda irimiqyaslı hərbi əməliyyatlarla müşayiət olunmuşdur. Azərbaycan ərazisinin çar Rusiyası və İran arasında bölüşdürülməsi, ermənilərin kütləvi şəkildə tarixi torpaqlarımızda məskunlaşdırılması bu siyasətin tərkib hissəsi idi. 1905-ci və 1918-ci illərdə erməni daşnaklarının azərbaycanlılara qarşı törətdikləri qırğınların ardınca 1920-ci ildə Zəngəzurun ermənilərə verilməsi, Qarabağ ərazisində erməni muxtariyyətinin yaradılması, 1948-1953-cü illərdə, 1988-ci ildə soydaşlarımızın Ermənistandan deportasiyası da vahid strateji planın tərkib hissəsi olmuşdur.

Digər çıxış edənlər də Ermənistanın mənfur siyasətinin acı nəticələrindən danışmış, onun irticaçı, işğalçı planlarına qarşı Azərbaycan dövlətinin artıq zəif, çarəsiz, müdafiəsiz olmadığını vurğulamışlar. Bildirilmişdir ki, dövlətimizin yürütdüyü məqsədyönlü, ardıcıl siyasət artıq tarixi düşmənlərimizə bu planı inkişaf etdirməyə imkan vermir. Azərbaycan ildən-ilə güclənən müstəqil bir ölkədir və öz torpaqlarını müdafiə etmək qüdrətindədir.

Vurğulanmışdır ki, ümummilli lider Heydər Əliyevin 1998-ci il 26 mart tarixli Fərmanı ilə hər il martın 31-i ölkəmizdə rəsmən Azərbaycanlıların Soyqırımı Günü kimi qeyd olunur.

Bildirilmişdir ki, Prezident İlham Əliyevin rəhbərliyi ilə sürətlə inkişaf edən Azərbaycanın müasir dövrdə haqq səsinin dünyaya çatdırılmasında təhsilli, elmli gənc nəslin üzərinə çox böyük məsuliyyət düşür. Dövlətimizin xüsusi diqqəti, Heydər Əliyev Fondunun və gənclərimizin səmərəli fəaliyyəti nəticəsində azərbaycanlıların başına gətirilmiş müsibətlərdən xəbərdar olan, soyqırımlarını tanıyan ölkələrin sayı getdikcə artır.

Tədbirdə Vahid Mustafayevin ötən əsrin sonlarında ermənilərin Xocalı şəhərində törətdikləri qanlı hadisələrindən bəhs edən “Xoca” filmi nümayiş olunmuşdur.