Urmiya, 24 fevral, Elvin Camalov, AZƏRTAC

Urmiyalı sahibkarlar Azərbaycanın imkanlarından yararlanmaqla xarici bazarlara çıxa bilər, həmçinin Urmiyadakı Maku Azad Ticarət Zonası ilə əməkdaşlıq yaradıla bilər.

AZƏRTAC xəbər verir ki, bu sözləri iqtisadiyyat naziri Şahin Mustafayev İrana səfəri çərçivəsində Urmiyada keçirilən biznes-forumda deyib.

Azərbaycanın iqtisadiyyat naziri Şahin Mustafayevin rəhbərlik etdiyi nümayəndə heyətinin İran İslam Respublikasına səfəri zamanı Urmiyada Qərbi Azərbaycan valisi Qurbanəli Səadət Qarabağla görüşüb. İranın rabitə və informasiya texnologiyaları naziri Mahmud Vaezinin də iştirak etdiyi görüşdə Azərbaycan-İran iqtisadi əlaqələrinə, xüsusilə də İranın Qərbi Azərbaycan əyaləti ilə əməkdaşlıq imkanlarına dair fikir mübadiləsi aparılıb, qarşılıqlı maraq doğuran bir sıra məsələlər müzakirə edilib.

Sonra Urmiyada Azərbaycan və İranın Qərbi Azərbaycan vilayətinin rəsmi şəxslərinin, kənd təsərrüfatı, sənaye, maliyyə, İKT, tikinti və sair sahələrdə fəaliyyət göstərən iş adamlarının iştirakı ilə biznes-forum keçirilib.

Azərbaycanın iqtisadiyyat naziri Şahin Mustafayev Azərbaycan və İran arasında siyasi əlaqələrin yüksək səviyyədə olduğunu, iqtisadi əlaqələrin inkişaf etdiyini, əməkdaşlığın genişlənməsində dövlət başçılarının qarşılıqlı səfərlərinin və keçirilən görüşlərin xüsusi əhəmiyyətini vurğulayıb. Bildirilib ki, son 3 ildə Azərbaycan-İran əlaqələri yeni mərhələyə yüksəlib. Hazırda ölkələrimiz sənaye, energetika, tranzit, səhiyyə, nəqliyyat və sair sahələrdə uğurla əməkdaşlıq edir, avtomobil istehsalı və əczaçılıq sahələrində birgə layihələr reallaşdırır, ölkələrimizin tranzit potensialının reallaşdırılmasında mühüm əhəmiyyət kəsb edən “Şimal-Cənub” beynəlxalq nəqliyyat dəhlizi üzrə işlər görülür. Azərbaycan-İran arasında ticarət əlaqələri genişlənir və 2016-cı ildə ticarət dövriyyəsi 70 faizə yaxın artıb. 2017-ci il üçün beynəlxalq yükdaşımalarında mübadilə edilən icazələrin sayının 10 minə çatdırılması barədə razılığa gəlinib və Azərbaycan bunun artırılmasında maraqlıdır.

Səfər çərçivəsində İran tərəfi ilə birlikdə Araz çayı üzərində reallaşdırılan “Xudafərin” və “Qız Qalası” layihəsinin icrası ilə tanış olduğunu diqqətə çatdıran nazir Ş.Mustafayev qeyd edib ki, ölkələrimiz arasında imzalanmış “Xudafərin və “Qız Qalası”, eləcə də “Ordubad” və “Marazad” sazişləri hər iki tərəfdən qüvvəyə minib. Bu sazişlərin önəminə toxunan iqtisadiyyat naziri “Xudafərin” və “Qız Qalası” hidroqovşaqlarının birgə istifadəsinin hər iki ölkənin bir-birinin suverenliyi və ərazi bütövlüyünə hörmətinin, beynəlxalq hüququn ümumi qəbuledilmiş prinsiplərinə sadiqliyinin təzahürü olduğunu vurğulayıb və 2017-ci ilin yanvarında Azərbaycan Respublikasının Prezidenti tərəfindən 36 MVt gücündə Ordubad SES-in təməlinin qoyulduğunu bildirib.

Azərbaycanın İranın Qərbi Azərbaycan vilayəti ilə əlaqələrindən danışan nazir Ş.Mustafayev qeyd edib ki, Qərbi Azərbaycan vilayəti ilə əlaqələrin əsası hələ 1992-ci ildə ümummilli lider Heydər Əliyevin Urmiyaya səfəri zamanı qoyulub. O zaman Ulu Öndər və hazırkı vali Qurbanəli Səadət Qarabağ Şahtaxtı-Poldəşt körpüsünün açılışında iştirak ediblər. 2007-ci ildə isə Prezident İlham Əliyevin iştirakı ilə yeni Şahtaxtı-Poldəşt körpüsünün açılışı olub. 2016-cı ildə açılmış yeni Poldəşt gömrük terminalının iş rejimi 12 saata qədər artırılıb. Bundan başqa, 2015-ci ildə Naxçıvanda İranın Qərbi Azərbaycan əyalətinin istehsal və ixrac sərgisi keçirilib.

Qeyd edilib ki, İranın Qərbi Azərbaycan vilayətinin Naxçıvan Muxtar Respublikası və Türkiyə ilə həmsərhəd olması Naxçıvan Muxtar Respublikası-İran-Türkiyə üçtərəfli əməkdaşlığının inkişafına geniş imkan yaradır.

Ş.Mustafayev bildirib ki, urmiyalı sahibkarlar Azərbaycanın imkanlarından yararlanmaqla xarici bazarlara çıxa bilər. Həmçinin, Urmiyadakı Maku Azad Ticarət Zonası ilə əməkdaşlıq yaradıla bilər. Neftçala və ya Masallı sənaye zonalarında texnika üçün servis xidmətlərinin göstərilməsi sahəsində əməkdaşlıq imkanları mövcuddur. Bundan başqa, Urmiya əyaləti ilə birgə üzüm bağının və kişmiş zavodunun yaradılması, kənd təsərrüfatı məhsullarının birgə istehsalı, o cümlədən alma, şəkər çuğunduru, qarğıdalı, pomidor əkini, xurma konsentratı fabrikinin yaradılması, günəbaxan yağının, balın birgə istehsalı, eləcə də şüşə istehsalı, qablaşdırma sahələrində əlaqələrin qurulması imkanları genişdir. İran tərəfi Azərbaycanın peyklərinin xidmətlərindən istifadə edə bilər.

İran İslam Respublikasının Rabitə və İnformasiya Texnologiyaları naziri Mahmud Vaezi İran-Azərbaycan əlaqələrinin strateji səviyyəyə çatdığını, ölkələrimizi dərin tarixi, dini və mədəni köklərin birləşdirdiyini qeyd edib. Bildirilib ki, bütün bunlar ölkələrimiz arasında iqtisadi əməkdaşlığın genişləndirilməsini dəstəkləyir və digər sahələrdə olduğu kimi, iqtisadi əlaqələrimiz də inkişaf edir. Mahmud Vaezi bildirib ki, Azərbaycan Respublikası Prezidentinin viza rejiminin sadələşdirilməsi barədə bu yaxınlarda imzaladığı Sərəncam ölkələrimiz arasında əlaqələri daha da genişləndirəcək. Mahmud Vaezi iqtisadiyyatın müxtəlif sahələrində, eləcə də iş adamları arasında əlaqələrin inkişafına dair fikirlərini bölüşüb, dünya bazarına çıxmaq üçün İranın Azərbaycanın tranzit imkanlarından istifadə edəcəyini vurğulayıb.

İran İslam Respublikasının Qərbi Azərbaycan vilayətinin valisi Qurbanəli Səadət Qarabağ xalqlarımızı tarixi köklərin, eyni dinə mənsubluğun bağladığını, Azərbaycan və İran regionları arasında əlaqələrin genişləndiyini, iş adamları arasında əməkdaşlığın inkişaf etdiyini vurğulayıb. Azərbaycana bu yaxınlarda səfər etdiyini xatırlayan Qurbanəli Səadət Qarabağ səfər zamanı Bakıda, Qəbələdə və Naxçıvan Muxtar Respublikasında bir sıra görüşlər keçirdiyini, əməkdaşlıq perspektivlərinin müzakirə olunduğunu bildirib. Qeyd edib ki, Azərbaycanla turizm, kənd təsərrüfatı, sənaye sahələrində əməkdaşlığın genişləndirilməsi üçün potensial böyükdür və iş adamları bu imkandan yararlanmalıdır. İranın Qərbi Azərbaycan vilayətinin iqtisadiyyatı barədə məlumat verən Qurbanəli Səadət Qarabağ kənd təsərrüfatının, xüsusilə də meyvəçiliyin inkişaf etdiyini qeyd edib, azərbaycanlı sahibkarları bu sahədə əməkdaşlığa, eləcə də Maku Azad Ticarət Zonasının imkanlarından yararlanmağa dəvət edib.

Sonra Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov, Azərbaycan Sahibkarlar (İşəgötürənlər) Təşkilatları Milli Konfederasiyası baş katibinin müavini Vüqar Zeynalov və Urmiya Ticarət, Sənaye və Kənd Təsərrüfatı Palatasının sədri Həsən İntizar çıxış edərək iş adamları arasında əlaqələrin genişləndirilməsi perspektivləri barədə danışıblar.

Biznes forum çərçivəsində Azərbaycan Sahibkarlar (İşəgötürənlər) Təşkilatları Milli Konfederasiyası və Urmiya Ticarət, Sənaye və Kənd Təsərrüfatı Palatası, AZPROMO və Urmiya Ticarət, Sənaye və Kənd Təsərrüfatı Palatası arasında əməkdaşlığa dair qarşılıqlı əməkdaşlığa dair Anlaşma memorandumları imzalanıb, iş adamları arasında ikitərəfli görüşlər keçirilib.

Azərbaycan nümayəndə heyəti İranın Qərbi Azərbaycan vilayəti şirkətlərinin istehsal etdiyi məhsulların nümayiş etdirildiyi sərgi ilə tanış olub.

Elvin Camalov

AZƏRTAC-ın müxbiri

Urmiya