ELM VƏ TƏHSİL
Azərbaycanlı alim L.N.Qumilyov adına universitetdə mühazirələr oxuyub
Astana, 27 noyabr, AZƏRTAC
Astanada Türk Dünyası Riyaziyyat Cəmiyyətinin nəzəri və tətbiqi riyaziyyat jurnalının təqdimatı keçirilib.
Türk Dünyası Riyaziyyat Cəmiyyəti (TDRC) 1999-cu ildə təsis edilib. Cəmiyyət Türkiyə, Qazaxıstan, Azərbaycan, Qırğızıstan, Özbəkistan, Rusiya, İran, Çin və Monqolustan riyaziyyatçılarını birləşdirir. 1999-cu ildən bəri bu cəmiyyətin 5 konqresi keçirilib (Türkiyədə - 2 dəfə, Qazaxıstanda, Azərbaycanda və Qırğızıstanda).
TDRC-nin 2009-cu ildə keçirilmiş üçüncü konqresində bu cəmiyyətin “TWMS Journal of Pure and Applied Mathematics” (“Türk Dünyası Riyaziyyat Cəmiyyətinin nəzəri və tətbiqi riyaziyyat jurnalı”) adlı yeni nəşrinin təsis edilməsi qərara alınıb. Jurnalın əsas məqsədi türk dünyası alimlərinin beynəlxalq əlaqələrini və elmi əməkdaşlığı genişləndirmək, riyaziyyat elmini inkişaf etdirməkdir. Jurnalın yaradılması Azərbaycana tapşırılıb, sonradan həmin jurnal Qazaxıstanla birgə buraxılmağa başlanıb.
Jurnalın redaksiya heyətinə dünyanın 11 ölkəsindən 54 tanınmış alim daxildir. Jurnal ingilis dilində, ildə iki dəfə çıxır. Burada bütün məqalələrə xarici ölkələrin aparıcı alimləri tərəfindən rəy verilməlidir. Nəşrin müəlliflərinin coğrafiyası çox genişdir (İtaliya, ABŞ, Rusiya, Azərbaycan, Avstraliya, Qazaxıstan, Özbəkistan, Bolqarıstan, Fransa, Qırğızıstan, Türkmənistan, İsveç, Türkiyə, Rumıniya, Pakistan, İran). Yaxın vaxtlara qədər bu jurnalda dərc edilmiş materiallardan MatReviews, Zentralblatt MATH, VINITI, E-Letter, NA Digest nəşrlərində sitat gətirilib. 2015-ci ilin oktyabr ayında jurnal Thomson Reuters Emerging Sources Citation Index siyahısına daxil edilib. Jurnalın baş redaktoru Bakı Dövlət Universitetinin Tətbiqi Riyaziyyat Elmi-Tədqiqat İnstitutunun direktoru, AMEA-nın akademiki, professor Fikrət Əliyevdir. Jurnalın sponsorları Bakı Dövlət Universitetinin Tətbiqi Riyaziyyat Elmi-Tədqiqat İnstitutu və Əl-Fərabi adına Qazaxıstan Milli Universitetidir.
Jurnalın Thomson Reuters Emerging Sources Citation Index siyahısına daxil edilməsi münasibəti ilə dünən Qazaxıstan Respublikası Elm və Təhsil Nazirliyində görüş keçirilib. Görüşdə Azərbaycan tərəfdən “TWMS Journal of Pure and Applied Mathematics” jurnalının baş redaktoru, AMEA-nın akademiki, professor Fikrət Əliyev, jurnalın məsul redaktoru, BDU-nun Tətbiqi Riyaziyyat Elmi-Tədqiqat İnstitutunun böyük elmi işçisi, dosent Qəmər Məmmədova, Qazaxıstan tərəfdən - jurnalın redaksiya heyətinin üzvü, Qazaxıstan Respublikası MEA-nın akademiki, L.N.Qumilyov adına Avrasiya Milli Universiteti yanında Riyaziyyat İnstitutunun direktoru professor Muxtarbay Otelbayev, Türk Dünyası Riyaziyyat Cəmiyyətinin vitse-prezidenti, L.N.Qumilyov adına Avrasiya Milli Universitetinin ali riyaziyyat kafedrasının müdiri Nurjan Bokayev, habelə Qazaxıstan Respublikası elm və təhsil nazirinin müavini, professor T.O.Balıkbayev, Qazaxıstan Respublikası Elm və Təhsil Nazirliyinin elm komitəsinin idarə rəisi R.S.Kokenov, təhsil sahəsində beynəlxalq əməkdaşlıq departamentinin direktoru S.M.Omirbayev iştirak ediblər.
Jurnal haqqında məlumat verilib, bu nəşrin və bütövlükdə türk dünyası üzrə elmi riyazi jurnalların daha da təkmilləşdirilməsi yolları müzakirə edilib. Türk dünyasında mövcud jurnalların monitorinqinin keçirilməsi və bu əsasda onları dünya standartları səviyyəsinə çatdırmaq üçün müvafiq qərarlar qəbul edilməsi təklif olunub.
Akademik Fikrət Əliyev dünən həm də L.N.Qumilyov adına Avrasiya Milli Universitetinin Elmi Şurasının iclasında çıxış edib. O, Azərbaycanda nəşr olunan Tomson Röyter siyahısına daxil edilmiş üç jurnalı təqdim edib. Elmi Şuranın üzvləri F. Əliyevin məruzəsini böyük maraqla qarsalayıblar.
İlahə Əhmədova
AZƏRTAC—ın xüsusi müxbiri
Astana