MƏDƏNİYYƏT


Azərbaycanlı rəssam Tolyattidə ustad dərsi keçəcək

Bakı, 17 iyul, AZƏRTAC

Rusiyada yaşayan azərbaycanlı rəssam Bayram Salamov iyulun 20-də Tolyatti şəhərindəki emalatxanasında növbəti ustad dərsini keçəcək. Ustad dərsinin yay mövsümündə hər cümə axşamı keçirilməsi nəzərdə tutulur.

AZƏRTAC xəbər verir ki, bu barədə məlumatı rəssam “facebook” səhifəsində bölüşüb. Ustad dərsi iştirakçılara yaradıcılıq prosesində texniki çətinliyi və psixoloji sərhədi dəf etməkdə faydalı ola bilər.

Bayram Salamov Şəkinin Qoxmuq kəndində dünyaya göz açıb. O, 1986-cı ildə Ə.Əzimzadə adına Rəssamlıq Məktəbini bitirib. 1990-cı ildən Tolyatti şəhərində yaşayır. Bayram Salamovun Tolyatti, Çelyabinsk, Samara (Rusiya), Praqa (Çexiya), Limassol (Kipr) və digər şəhərlərdə 20-dək fərdi sərgisi keçirilib. Bakıda ilk fərdi sərgisi 2014-cü ildə “1969” qalereyasında təşkil edilib. Dünyanın nüfuzlu sərgilərində iştirak edən Bayram Salamov bir çox mükafatlara layiq görülüb. O, Rusiya Rəssamları Yaradıcılıq İttifaqının və Beynəlxalq Rəssamlar Federasiyasının üzvüdür. Əsərləri Almaniya, Çexiya, İsveç, İtaliya, Kanada, İrlandiya və Böyük Britaniyada fərdi kolleksiyalarda saxlanılır.

Xatırladaq ki, bu ilin aprel ayında azərbaycanlı rəssamın Tolyattidə “Bayramın karvanı” adlı fərdi sərgisi nümayiş etdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.