SİYASƏT
Azərbaycanlı səfir Berlin Xəzər Bölgəsi Araşdırmaları Mərkəzində çıxış edib
Berlin, 24 may, AZERTAC
Mayın 23-də Almaniyanın nüfuzlu Berlin Azad Universitetinin Xəzər Bölgəsi Araşdırmaları Mərkəzində Almaniyadakı Azərbaycanlıların Koordinasiya Mərkəzinin təşkilatçılığı ilə mərkəzin tədqiqatçıları və doktorantlarının Azərbaycanın Almaniyadakı səfiri Pərviz Şahbazovla görüşü olub.
Berlin Xəzər Bölgəsi Araşdırmaları Mərkəzinin direktoru, professor Luts Mets tədbirin məqsədi barədə məlumat verib.
Sonra səfir Pərviz Şahbazov “Azərbaycanın enerji strategiyasının regional sabitlik və Avropa İttifaqı ilə tərəfdaşlıqda rolu” mövzusunda təqdimatla məruzə edib.
Səfir əsası ümummilli lider Heydər Əliyev tərəfindən qoyulmuş neft strategiyasının ölkəmizdə və regionda sabitliyin, inkişafın, regional əməkdaşlığın və beynəlxalq tərəfdaşlığın təmin edilməsindəki rolundan danışıb. O, Azərbaycanın həyata keçirdiyi beynəlxalq enerji layihələrin iqtisadi və geosiyasi əhəmiyyəti, ölkəmizin balanslaşdırılmış xarici siyasəti vəmultikultural ənənələrinin onun enerji strategiyasının həyata keçirilməsində oynadığı rol barədəgeniş məlumat verib. Pərviz Şahbazov tədbir iştirakçılarını Azərbaycanın “Cənub qaz dəhlizi”ninyaradılmasında göstərdiyi əhəmiyyətli səylər, ölkəmizin təşəbbüsü və aparıcı rolu ilə həyata keçirilən “Şahdəniz 2”, Cənubi Qafqaz boru kəməri, TAP və TANAP kimi irimiqyaslı layihələrin icrasının cari vəziyyətinə dair məlumatlandırıb.
Diplomat, eyni zamanda, regionda inkişaf və əməkdaşlıq, o cümlədən enerji layihələri üçün təhlükə törədən amillər barədə məlumat verib. Səfir Ermənistanın Azərbaycana qarşı hərbi təcavüzünü regional təhlükəsizlik və əməkdaşlıq üçün ən böyük təhdid olduğunu vurğulayıb. Pərviz Şahbazov Ermənistandakı MetzamorAES-in region üçün təhlükə olduğunu və Ermənistandan nüvə materialları qaçaqmalçılığının yaratdığı real təhdidlər barədə danışıb.
Sonda səfir tədbir iştirakçılarının suallarını cavablandırıb.
Vüqar Seyidov
AZƏRTAC-ın xüsusi müxbiri
Berlin