CƏMİYYƏT
Azərbaycanlı səyyah velosipedlə 15 min kilometr məsafə qət edərək Pekinə çatmışdır VİDEO
Pekin, 24 sentyabr (AZƏRTAC). Sentyabrın 24-də azərbaycanlı səyyah Ramil Ziyadov ulu öndər Heydər Əliyevin 90 illiyinə həsr etdiyi velosiped turunun növbəti dayanacağına – Çin Xalq Respublikasının paytaxtı Pekinə çatmışdır. Burada onu soydaşlarımızı qarşılamış, ölkəmizin Pekindəki səfirliyində Ramillə görüş olmuşdur.
Bu il aprelin əvvəlində doğma Bərdə rayonundan yola çıxan 35 yaşlı Ramil Ziyadov Rusiyanın Dağıstan və Kalmık respublikaları, Həştərxan vilayəti, Qazaxıstan, Özbəkistan, Qırğızıstan, yenidən Qazaxıstan və Rusiya ərazisindən keçərək Xabarovsk vilayətindən Çinə daxil olmuşdur.
Marşrut boyu səhralardan, çöllərdən, tayqa meşələrindən keçən Ramil gün ərzində orta hesabla 150 kilometr, bəzən 200 kilometr yol qət etmişdir. Yolboyu o, bəzən 300-400 kilometr məsafəni yaşayış məskəni olmayan ərazilərdən keçmiş, əsasən çadırda gecələmişdir. Hətta bir dəfə velosipedi sınanda təxminən 10 kilometr yolu velosipedi çiynində piyada daşımışdır.
Ramil keçdiyi şəhər, qəsəbə və kəndlərdə sakinlərə ulu öndər Heydər Əliyevin həyat və fəaliyyəti, Azərbaycan Xalq Cümhuriyyətinin 95 illiyi, həmçinin ölkəmizin tarixi, mədəniyyəti və incəsənəti haqqında məlumat vermiş, Ermənistan-Azərbaycan, Dağlıq Qarabağ münaqişəsi, erməni işğalçılarının Azərbaycan torpaqlarına təcavüzü və digər mövzularda ingilis və rus dillərində kitablar, elektron materiallar yaymışdır.
Tur boyu sağlamlığında elə də ciddi çətinlik yaşamayan Ramil, bununla Azərbaycan insanının belə bir çətin işin öhdəsindən gəlmək bacarığını dünyaya nümayiş etdirmişdir. Ramilin layihəsi keçdiyi ölkələrin ictimaiyyəti tərəfindən maraqla qarşılanmışdır. Belə ki, Rusiya, Qazaxıstan, Özbəkistan, Qırğızıstan KİV-ləri Ramilin səyahəti haqqında dəfələrlə reportajlar hazırlamış, müsahibələr almış, hətta bir dəfə Rusiya televiziya kanallarının birində canlı yayıma qoşulmuş, bir neçə ölkədə mətbuat konfransları keçirmiş, sakinlər onunla xatirə şəkli çəkdirmişlər.
Bu qədər məsafəni velosipedlə qət edən ilk azərbaycanlı olduğuna görə sevinən Ramilə keçdiyi ölkələrdəki Azərbaycan səfirlikləri və diasporumuz böyük dəstək vermişdir.
Səyyah velosiped turunu Gündoğar ölkədə - Yaponiyada başa çatdırmağı planlaşdırır.
Şahin Cəfərov
AZƏRTAC-ın xüsusi müxbiri
Pekin