Bakı, 3 avqust, AZƏRTAC

"Azercell Telekom" MMC-nin partnyorluğu ilə avqustun 7-dən 12-dək Bakıda azərbaycanlı startaplar arasında "Seedstars World" müsabiqəsinin yerli seçimləri keçiriləcək. Seçim mərhələsinin qalibləri bu dünya yarışmasında ölkəmizi təmsil etmək və 500 min ABŞ dolları məbləğində sərmayə kapitalı uğrunda mübarizə aparmaq şansını qazanacaqlar.

Şirkətdən AZƏRTAC-a bildirilib ki, "Seedstars World" - inkişaf etməkdə olan və sürətlə böyüyən startap bazarında bacarıqlı gəncləri müəyyənləşdirmək üçün keçirilən qlobal müsabiqədir. Yarışmanın əsas məqsədi inkişafda olan ölkələrin sahibkarlarına diqqət yönəltmək, onlara yardım etməkdən ibarətdir.

Ötən il "Seedstars World" 36 ölkəni əhatə edirdisə, artıq bu il iştirakçı ölkələrin sayı 50-yə çatıb. Müsabiqə Silikon Vadisindən (Kaliforniyanın yüksək texnologiya şirkətlərinin toplaşdığı bölgəsi) və Qərbi Avropadan olan sahibkarların diqqətini cəlb edib. Müsabiqənin sabiq iştirakçıları dünya üzrə 360-dan artıq iş yeri yaratmaqla, öz layihələrinə ümumilikdə 20 milyon ABŞ dolları həcmində sərmayə cəlb ediblər. MEST, "Google for Entrepreneurs" və "Microsoft" kimi tərəfdaşları olan "Seedstars World" yenilikçi startaplara platforma təqdim etməklə yanaşı, həm də regional biznesi dəstəkləyir.

"Azercell Telekom" MMC Dünya Startap Müsabiqəsinin keçirilməsində İsveçrənin "Seedstars" şirkəti ilə tərəfdaşlıq edir. "Azercell"in strateji partnyorluq və müştəri kanallarının idarəedilməsi departamentinin rəhbəri İmran Bağırov "Seedstars World" üzrə səfir seçilib.

Ölkəmizdə avqustun 7-də başlayacaq müsabiqənin yerli seçimləri "Azercell"in Barama İnnovasiya və Sahibkarlıq Mərkəzi və ADA Universitetinin təşkilatı dəstəyi ilə keçiriləcək. Qaliblər 2016-cı ilin fevralında İsveçrədə keçiriləcək Dünya Startup Yarışmasının finalında iştirak etmək, Avropa və dünya investorları qarşısında layihələrini təqdim edərək 500 min dollara qədər investisiya almaq imkanı qazanacaq.

Qeyd edək ki, bu ildən "Seedstars World" müsabiqəsində yaradılan yeni “STARS” istiqaməti səyahət və maliyyə texnologiyaları sənayesi sahəsindəki startaplara da öz bacarıqlarını göstərmək imkanı yaradır.

Müsabiqədə iştirak etmək istəyən hər kəs http://www.seedstarsworld.com/event/seedstars-baku-2015/ linki vasitəsilə avqustun 7-dək qeydiyyatdan keçə bilər.