MƏDƏNİYYƏT


Azərbaycanlı xoreoqrafın quruluş verdiyi baletlər Primorsk səhnəsində nümayiş olunacaq

Bakı, 12 mart, AZƏRTAC

Martın 28-dən aprelin 2-dək Sankt-Peterburq Dövlət Akademik Mariya Teatrının Primorsk səhnəsində “Mariya Teatrında tətillər” layihəsi həyata keçiriləcək.

AZƏRTAC teatrın saytına istinadla xəbər verir ki, layihə çərçivəsində martın 30-da A.Adanın “Jizel”, aprelin 1-də isə P.Çaykovskinin “Şelkunçik” baletləri nümayiş etdiriləcək. Hər iki səhnə əsərinin quruluşçu xoreoqrafı azərbaycanlı balet ustası Eldar Əliyevdir. Onun librettosu əsasında hazırlanan “Şelkunçik” baleti Marius Petipanın (1818-1910) orijinal ssenarisinə əsaslanır.

Bakıda doğulan E.Əliyev Bakı Xoreoqrafiya Məktəbini bitirib, 1979-1992-ci illərdə Mariya Teatrının aparıcı solisti olub. Sonralar ABŞ-ın “Ballet Internationale” truppasına rəhbərlik edib. O, Praqa, Seul, Nyu-York və Pekində keçirilən beynəlxalq balet müsabiqələrinin münsiflər heyətinin üzvü, həmçinin Çinin Şenyan Dövlət Konservatoriyasının fəxri professorudur. E.Əliyev ötən il Rusiya Dövlət Akademik Mariya Teatrının Primorsk səhnəsinin baş baletmeysteri təyin edilib.

Mariya Teatrının Primorsk səhnəsi Uzaq Şərqdə ən müasir və Rusiyanın ən gənc teatrlarından biridir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.