Bakı, 3 dekabr, AZƏRTAC 

“Azercell”-in “Bakutel-2014” sərgisində təqdim etdiyi məhsullar və innovativ həllər daim maraqla qarşılanır. Bu il də şirkət ziyarətçiləri ən son texnologiyaları ilə tanış edir.

AZƏRTAC xəbər verir ki, şirkətin stendində mobil cihazlar vasitəsilə insan həyatını həm asanlaşdıran, həm də rəngarəng edən alternativ məhsullar və maraqlı əyləncəli proqram gözləyir.

Ziyarətçilər burada bir neçə istiqamətdə yeniliklərdən faydalana biləcəklər. Bu innovativ texnoloji həllərə Mobil Sağlamlıq, Valideyn Nəzarəti Sistemi, Barama İnnovasiya Mərkəzinin təqdim etdiyi Təhlükəsizlik Sistemi və Google Glass eynəyinin 2-ci versiyası və digərləri aiddir.

Bundan əlavə, “BakuTel 2014” sərgisində “Azercell” dünyada ilk dəfə olaraq “Augmented Reality” - genişləndirilmiş reallıq kimi tanınan texniki yeniliyi təqdim edir. “Azercell” əməkdaşının şəkli olan plakata xüsusi proqram yüklənmiş cihazı – mobil telefonu və ya planşeti yaxınlaşdırdıqda, telefondakı şəkil canlanaraq “Azercell”-in bu sərgidə göstərdiyi yenilikləri barədə danışmağa başlayır. Bu xidmət vasitəsilə “Azercell” öz abunəçilərinə ənənəvi ikiölçülü reklam plakatlarını üçölçülü formatda, yəni video formatda izləməyə imkan yaradır. Yaxın gələcəkdə “Azercell” bir çox reklamlarını genişləndirilmiş reallıq üzərindən təqdim etməyi planlaşdırır.

Ən qabaqcıl texnologiyaların avtomatlaşdırılmış sistemi olan M2M (Machine to Machine) daha rahat və maraqlı yaşayış tərzi üçün çoxsaylı funksiyalara malikdir. Mobil Sağlamlıq Sistemi (Mobile Health System) pasientin səhhəti ilə bağlı məlumatı təhlil edərək, dialoq rejimində simptomların səbəbini araşdırmağa çalışır. Ehtiyac olduğu halda, məlumatlar mərkəzə göndərilərək, pasientin həkiminə çatdırılır.

Valideyn Nəzarəti Sistemi (Parental Control) azyaşlı uşaqları nəzarətdə saxlamaq və onlarla istənilən an əlaqə qurmaq üçün əla vasitədir. Azyaşlı uşaqlar xüsusi kiçik telefonlar vasitəsilə əvvəlcədən müəyyənləşdirilmiş nömrələrə zəng edərək, valideynləri ilə danışa bilərlər. İnternet üzərində çalışan idarə paneli vasitəsilə isə valideyn öz övladının harada olmasından xəbər tuta bilər. Xidmətin bir sıra digər unikal nəzarət və təhlükəsizlik özəllikləri barədə “Azercell”in stendində ətraflı məlumat əldə etmək mümkündür.

Builki sərgidə “Azercell”-in təqdim etdiyi “Google Glass” interaktiv eynəyi vasitəsilə istifadəçi yalnız səsli əmrlər verməklə axtarış apara, şəkil və ya video endirə və dostları ilə paylaşa bilər.

Bundan əlavə, “Azercell”-in Barama İnnovasiya Mərkəzi tərəfindən təqdim edilən Evdə Təhlükəsizlik Sistemi (Sumaks) gündəlik məişət proseslərini mobil telefon vasitəsilə idarə etməyə imkan verəcək. Məsələn, istifadəçi evdə olmadığı zaman qaz, su sızması, qısaqapanma, elektrik cihazların söndürülməsi, yaxud işə salınması və digər proseslər baş verdiyi halda sistem tərəfindən avtomatik olaraq mobil telefonuna gələn SMS-lə bu barədə məlumatlandırılır.

Göstərilən bütün bu həllər istifadəçilərə öz gündəlik fəaliyyətlərini daha rahat şəkildə planlaşdırmaqda yardımçı olur.