REGİONLAR


“Azərikimya” İstehsalat Birliyi ilə tanışlıq

A+ A

Sumqayıt, 25 noyabr, AZƏRTAC

Beynəlxalq Həmkarlar İttifaqları Konfederasiyası Pan Avropa Regional Şurasının MDB ölkələrinin üzv təşkilatları üçün sağlamlıq və təhlükəsizlik üzrə təşkil etdiyi “Əməyin mühafizəsi, istehsalat təhlükəsizliyi, ekoloji risk və təhlükələrə dair həmkarlar ittifaqları siyasətinin əsas istiqamətləri” mövzusunda Bakıda keçirilən beynəlxalq seminarın bir qrup iştirakçısı “Azərikimya” İstehsalat Birliyində olub.

AZƏRTAC xəbər verir ki, Rusiya, Belarus, Qazaxıstan, Gürcüstan, Qırğızıstan, Moldova, Ukrayna, Özbəkistan, həmçinin Beynəlxalq Həmkarlar İttifaqları Konfederasiyasının Brüssel və Moskva ofislərini təmsil edən 15 nəfərlik nümayəndə heyətini Azərbaycan Həmkarlar İttifaqları Konfederasiyasının baş texniki inspektoru Vladimir Arqutin və Neft və Qaz Sənayesi İşçiləri Həmkarlar İttifaqı Respublika Komitəsinin baş texniki inspektoru İsrafil Əliyev müşayiət edib.

Qonaqlar “Azərikimya” İB-nin əsas istehsalat müəssisəsi olan Etilen-polietilen zavodunun ərazisini gəzib, müəssisənin buxar-generator, azot-oksigen və susoyutma kompleksləri, mütləqləşdirilmiş izopropil spirti qurğusu, istehsalata və keyfiyyətə nəzarət, sənaye-sanitar sahələrini özündə birləşdirən laboratoriya, həmçinin propan-propilen fraksiyasının kükürdlü birləşmələrdən təmizlənməsi və butan-butilen fraksiyasının hidrogenləşməsi qurğuları ilə tanış olub, kimyaçılarla iş başında görüşüb, söhbət ediblər.

Məlumat verilib ki, əmək şəraitinin yaxşılaşdırılması, təhlükəsiz iş yerlərinin yaradılması, əməyin mühafizəsinin təkmilləşdirilməsi, ətraf mühitə və ekologiyaya mənfi təsirlərin, bədbəxt hadisələrin, istehsalat qəzalarının və peşə xəstəliklərinin qarşısının alınması, əməkçilərin həyatı üçün təhlükə doğura biləcək risklərin aradan qaldırılması “Azərikimya” İstehsalat Birliyində prioritet məsələlərdəndir və SOCAR-ın strukturuna verildikdən sonra bu istiqamətdə mühüm addımlar atılıb. Zəhərli və müvafiq standartlara cavab verməyən, şəhərin ekologiyasına mənfi təsir göstərən bütün istehsalatlar ləğv edilib, “Etilen-polietilen” zavodunda isə hərtərəfli yenidənqurma və modernizasiya işlərinə start verilib. Hazırda Birlik müəssisələrində əməyin mühafizəsi istiqamətində görülən işlər “Azərbaycan Neft Sənayesində Əməyin Mühafizəsinin Vahid İdarəetmə Sistemi”nin tələblərinə uyğun təşkil edilib.

Yeni inzibati və məişət binalarının tikilib istifadəyə verilməsi kimyaçıların həm iş, həm də məişət şəraitini xeyli yaxşılaşdırıb. Bütün fəhlə və mühəndis-texniki işçilər fərdi mühafizə vasitələri ilə yüz faiz təmin olunub. “Paşa Sığorta” ASC ilə bağlanan müqavilə əsasında “Azərikimya” İB üzrə bütün işçilər könüllü tibbi sığortalanıb. İl ərzində hər bir işçi sığorta şirkəti ilə əməkdaşlıq edən respublikamızın 40-a yaxın tibbi klinikasında 50 min manat dəyərində müayinə və müalicədən bəhrələnmək imkanı əldə ediblər.

Bildirilib ki, əməyin mühafizəsi istiqamətində mühəndis-texniki işçilər və fəhlələr arasında maarifləndirmə işinin aparılmasına geniş yer verildiyinə, əməkçilər üçün sağlam və normal iş şəraiti yaradıldığına görə “Azərikimya” İB Ümumdünya Əməyin Mühafizəsi Günü çərçivəsində Əmək və Əhalinin Sosial Müdafiəsi Nazirliyinin təşkilatçılığı ilə keçirilən konfransda Azərbaycan Həmkarlar İttifaqı Konfederasiyasının sağlam və təhlükəsiz əmək şəraitinin yaradılması üzrə “İlin ən yaxşı müəssisəsi” devizi altında keçirilən respublika müsabiqəsinin qalibi olub.

Qonaqlara, həmçinin 2019-cu ilə qədər həyata keçirilməsi planlaşdırılan və hazırda davam edən layihələr haqqında da ətraflı məlumat verilib.

Müəssisənin ərazisinin təmizliyinə, yaradılmış səliqə-sahmana, yaşıllıq zolaqlarının həcminə görə məmnunluqlarını ifadə edən nümayəndə heyətinin üzvləri, belə bir şəraitin əksər MDB ölkələrinin müəssisələrində olmadığını etiraf ediblər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.