İQTİSADİYYAT


“Azpetrol” Qaradağ rayonunda yeni yanacaqdoldurma məntəqəsini açıb

Bakı, 21 iyul, AZƏRTAC

“Azpetrol” şirkəti Qaradağ rayonunda özünün yeni yanacaqdoldurma məntəqəsini açıb.

“Azpetrol” şirkətinin mətbuat xidmətindən AZƏRTAC-a bildiriblər ki, bu, “Azpetrol”un sayca 88-ci yanacaqdoldurma məntəqəsidir.

Yeni məntəqənin açılışında Qaradağ Rayon İcra Hakimiyyətinin nümayəndəsi və digər qonaqlar iştirak ediblər.

Məntəqənin açılışı zamanı “Azpetrol” şirkətinin baş direktoru Ceyhun Məmmədov qeyd edib ki, şirkətin yeni yanacaqdoldurma məntəqəsinin bugünkü açılışı “Azpetrol”un yaranmasının 20 illik yubileyinə düşdüyündən daha əlamətdardır.

Belə ki, 1997-ci il iyulun 15-də Bakı şəhəri Tbilisi (indiki Moskva) prospektində özünün ilk yanacaqdoldurma məntəqəsinin açılışı ilə fəaliyyətə başlayan “Azpetrol” həm beynəlxalq standartlara cavab verən müasir iş yerlərinin yaradılması, həm də mütərəqqi texnologiyalara əsaslanan operativ idarəetmə sisteminin qurulması baxımından respublika iqtisadiyyatına, xüsusilə də onun özəl sektoruna yeni nəfəs gətirən ilk şirkətlərdən oldu.

“Аzpetrol” şirkətinin yaranması, inkişafı və uğurlu fəaliyyət göstərməsi ulu öndər Heydər Əliyev tərəfindən Azərbaycanda sahibkarlığın inkişafı və iqtisadiyyatın tərəqqisi sahəsində görülən işlərin nəticəsində mümkün olub və respublikanın neft strategiyasının inkişafına təkan verib 1994-cü ildə “Əsrin Müqaviləsi”nin imzalanmasının məntiqi nəticəsidir.

Şirkətin baş direktoru daha sonra vurğulayıb ki, yanacağın keyfiyyətinin yaxşılaşdırılması və məntəqələrin fasiləsiz yanacaqla təmin edilməsi məqsədilə, 1999-cu ildə müasir standartlara cavab verən, Avropanın qabaqcıl ölkələrində istehsal olunmuş elektron avadanlıqlarla, yanğından mühafizə, təhlükəsizlik və yanacağın keyfiyyətinə nəzarət sistemləri ilə təchiz edilmiş Neft bazası və yanacağın YDM və QDM-lərinə fasiləsiz olaraq və vaxtında çatdırılması məqsədilə yanacaqdaşıyan maşınların Avtoparkı istismara verildi.

Beynəlxalq standartlara uyğun təşkil olunmuş həmin Avtoparkda 120 yanacaq daşıyan avtomobil istənilən vaxt yola çıxmağa hazırdır.

Şirkət 2001-ci ildən etibarən nağdsız hesablaşmalar üzrə “Petrol Plus Offline“ sistemini tətbiq edib, 2011-ci ildən isə həmin xidmətdən istifadə edən müştərilərin sayının artdığını və 6500-dən yuxarı olduğunu, kartların sayı isə 100 mindən yuxarı ötdüyünü nəzərə alaraq, tərəfimizdən daha müasir və təhlükəsizlik baxımından daha etibarlı olan “Petrol Plus Online” proqramının tətbiqinə başlanılıb.

“Azpetrol” şirkəti özündə üç istiqaməti - keyfiyyəti idarəetmə sistemini (İSO -9001:2015), ətraf mühit idarəetmə sistemi (İSO – 14001:2015), İş sağlamlığı və əməyin təhlükəsizliyini (OHSAS – 18001:2007) əks etdirən birləşmiş sistemin tətbiqini nəzərdə tutan yeni inkişaf proqramını uğurla həyata keçirir.

Hazırda “Azpetrol“un respublikamızın şəhər və rayonlarında 88 YDM və QDM-i fəaliyyət göstərir. Onların hesabına 3305 nəfərlik iş yeri yaradılıb. Bu gün isə yeni açılan yanacaqdoldurma məntəqəsində 48 nəfər daim iş yeri ilə təmin edilib.

“Azpetrol” şirkəti bundan sonra da yanacaqdoldurma məntəqələr şəbəkəsini genişləndirməyi planlaşdırır. Belə ki, şirkət bu ilin sonunda Siyəzən rayonunda daha bir YDM-ni açacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.