ELM VƏ TƏHSİL
BDU-da elmi şuranın iclası olub
Bakı, 11 iyul, AZƏRTAC
Bakı Dövlət Universitetində (BDU) elmi şuranın bu tədris ilində son genişləndirilmiş iclası keçirilib.
BDU-dan AZƏRTAC-a bildiriblər ki, universitetin rektoru, akademik Abel Məhərrəmov respublikamızda təhsilə dövlət qayğısından bəhs edib, Prezident İlham Əliyevin bu sahənin inkişafı istiqamətində imzaladığı fərman və sərəncamlar barədə məlumat verib. Rektor Azərbaycan Prezidentinin sədrliyi ilə keçirilmiş, Nazirlər Kabinetinin 2016-cı ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasda dövlətimizin başçısının Ermənistan-Azərbaycan münaqişəsinin beynəlxalq hüququn norma və prinsipləri, həmçinin ölkəmizin ərazi bütövlüyü çərçivəsində həll olunması, respublikamızın uğurlu daxili və xarici siyasəti barədə çıxışına toxunub. BMT-nin Sivilizasiyalar Alyansının VII Qlobal Forumunun və Formula-1” Avropa Qran-pri yarışlarının Bakıda yüksək səviyyədə təşkilindən danışan A.Məhərrəmov bildirib ki, bu tədbirlərdə BDU-nun 1000-dək tələbəsi könüllü olaraq iştirak edib.
Universitetin tədrisin təşkili və təlim texnologiyaları üzrə prorektoru, professor İradə Əliyeva 2015/2016-cı tədris ilinin yaz semestrinin imtahan sessiyası və yekun dövlət attestasiyasının nəticələri, yay tədris və istehsalat təcrübələrinin keçirilməsi barədə məruzə ilə çıxış edib, Quba Tədris Təcrübə və İstirahət Mərkəzində təşkil edilən çöl təcrübələri haqqında ətraflı məlumat verib.
Tədbirdə BDU-nun Qazax filialının əsasnaməsinin və strukturunun təsdiqlənməsi, müsabiqənin keçirilməsi və elmi adların verilməsi, imtahan sessiyasında iştirak edən əlaqələndiricilərə mükafatların təqdim olunması, tədris planlarının təsdiqi, ilin nəticələrinə görə fərqlənənlərin mükafatlandırılması və digər məsələlərə baxılıb.
İclasda ilin nəticələrinə görə BDU-nun botanika kafedrasının müdiri, Azərbaycan Milli Elmlər Akademiyasının müxbir üzvü Elşad Qurbanov və rus dilçiliyi kafedrasının müdiri, professor Lalə Quliyeva “İlin kafedra müdiri”, genetika və təkamül təlimi kafedrasının professoru Məcnun Babayev və arxeologiya və etnoqrafiya kafedrasının professoru Tarix Dostiyev “İlin müəllimi” adlarına layiq görülüblər. Həmçinin universitetin psixologiya kafedrasının professoru, Əməkdar Elm Xadimi, “Şöhrət” ordenli Əkbər Bayramova “BDU-nun fəxri professoru” fəxri adının verilməsi barədə qərar qəbul olunub.