İDMAN
BEYNƏLXALQ TURNİR BAŞA ÇATDI
İki dəfə Sovet İttifaqı Qəhrəmanı, general-mayor Həzi Aslanovun xatirəsinə həsr olunmuş cüdo üzrə XXVI beynəlxalq Bakı turniri başa çatmışdır.
Sentyabrın 29-da Bakı İdman Sarayında kişilər 60, 66 və 73 kiloqram, qadınlar isə 48 kiloqram çəki dərəcələrində medallar uğrunda mübarizə aparmışlar. 60 kiloqram çəki dərəcəsində Gürcüstan nümayəndəsi Ruslan Gelamidze final görüşündə Azərbaycan idmançısı İlham Məmmədova qalib gəlmişdir.
Cüdo həvəskarları 66 kiloqram çəki dərəcəsində ikiqat Avropa çempionu Elçin İsmayılovun qələbəsinə şübhə etmirdilər. Belə də oldu, idmançımız bütün görüşləri inamla keçirdi, finalda isə həmklubu Namiq Sultanova xal hesabı ilə qalib gələrək, fəxri kürsünün ən yüksək pilləsinə qalxdı.
73 kiloqram çəki dərəcəsində isə qızıl medala hərbçilər arasında dünya çempionu Şahin Arzumanov sahib oldu. O, finalda Zaur Paşayevə qalib gəldi.
Azərbaycan idmançıları Rəşad Quliyev, Ramil Qasımov, Emin Fətullayev, habelə Anton Novikov (Belarus), Bekdaş Dəmirəl (Türkiyə) və Hacı Zabitov (Rusiya) həmin çəki dərəcələrində bürünc medallar qazandılar.
Qadınlar arasında Aynurə Əhmədova ilə Afaq Sultanovanın final görüşü birincinin qələbəsi ilə başa çatdı. Asya İsmayılova və Türkmənistan idmançısı Pərvanə Ağacanova üçüncü yer tutdular.
Azərbaycan cüdoçuları komanda hesabında birinci yerə çıxdılar.
Azərbaycan Milli Olimpiya Komitəsinin prezidenti, Milli Məclisin deputatı İlham Əliyev 66 kiloqram çəki dərəcəsində mükafatçılara medallar və hədiyyələr, Elçin İsmayılova isə qızıl medalla bərabər, ilin ən yaxşı cüdoçusu kimi VAZ-2106 markalı “Jiquli” avtomobilinin açarlarını da təqdim etdi.
Digər qaliblərə mükafatları gənclər, idman və turizm naziri Əbülfəz Qarayev, turnirin təşkilat komitəsinin sədri, Bakı Şəhər İcra Hakimiyyətinin başçısı Hacıbala Abutalıbov, Avropa Cüdo federasiyasının prezidenti Marius Vizir və Türkiyə Cüdo federasiyasının prezidenti İbrahim Öztək təqdim etdilər.
X X X
Gənclər, idman və turizm naziri Əbülfəz Qarayev turnirin bağlanış mərasimində çıxış edərək dedi ki, biz bu iki gündə Bakıda daha bir beynəlxalq idman yarışının şahidi olduq. Azərbaycan idmançıları yenə də böyük ustalıq nümayiş etdirdilər və ölkəmizin şərəfini uca tutdular. Nazir beynəlxalq turnirin keçirilməsinə köməyinə görə Milli Olimpiya Komitəsinə, habelə yarışların yüksək səviyyədə təşkilinə görə Bakı Şəhər İcra Hakimiyyətinə təşəkkürünü bildirdi.
Avropa Cüdo federasiyasının prezidenti Marius Vizir Azərbaycanda idmanın inkişafında, ölkəni dünya miqyasında tanıtmaqda xidmətlərinə görə, Milli Olimpiya Komitəsinin prezidenti İlham Əliyevə federasiyanın qızıl medalını və fəxri fərmanını təqdim etdi.
X X X
Azərbaycan Milli Olimpiya Komitəsinin prezidenti İLHAM ƏLİYEV turnir başa çatdıqdan sonra respublika televiziyasına qısa müsahibə verdi:
MÜXBİR: İlham müəllim, sizi bir daha təbrik edirik. Strasburqda gərgin iş həftəsindən sonra Bakıda belə bir beynəlxalq turniri müşahidə edirsiniz. Bu da Azərbaycan Milli Olimpiya Komitəsinin idmana göstərdiyi diqqət və qayğının daha bir nümunəsidir.
İLHAM ƏLİYEV: Bəli, bu gün doğrudanda Azərbaycanda növbəti idman bayramıdır. Mən dəfələrlə demişəm ki, Azərbaycan artıq beynəlxalq yarışların keçirilməsi üçün gözəl bir meydana çevrilibdir. Azərbaycanda mütəmadi olaraq beynəlxalq yarışlar - Avropa çempionatları, dünya çempionatları keçirilir. Biz çalışırıq və bilirik ki, nə qədər belə turnirlər keçirilsə, bu, bizim üçün o qədər faydalıdır. Çünki idmanın daha da geniş yayılmasına, idmançılarımızın təcrübə toplamasına xidmət edir. Ən əsası isə, Azərbaycanı beynəlxalq idman aləmində daha da tanıdır.
Bu turnirdə Avropa Cüdo Federasiyasının prezidenti cənab Marius Vizir də bizim qonağımızdır. O, bir müddət bundan əvvəl də Bakıya gəlmişdi. Onunla söhbətlərimiz olmuşdur. Bu dəfə də fürsətdən istifadə edərək, Azərbaycanda böyük beynəlxalq cüdo turnirləri keçirilməsi haqqında danışıqlar aparmışıq və deyə bilərəm ki, müəyyən razılığa gəlmişik. Yaxın gələcəkdə Bakıda cüdo üzrə “Qran-pri” turniri və yaxud “Cüdo master” turniri keçiriləcəkdir. Qeyd etmək istəyirəm ki, bu, əhəmiyyəti baxımından dünya çempionatından sonra ikinci yarışlardır. Çalışırıq ki, Azərbaycanda beynəlxalq yarışlar yüksək səviyyədə keçirilsin, biz də bu turnirləri izləyək və idmançılarımızın qələbələrinə sevinək.
MÜXBİR: Azərbaycan Milli Olimpiya Komitəsinin prezidenti, Milli Məclisin deputatı İlham Əliyevin bir sözü idmançılarımızın yaddaşına həkk olunub: Olimpiya oyunlarına cəmi iki il qalmışdır.
İLHAM ƏLİYEV: Onu mən keçən il demişdim. Demişdim ki, cəmi üç il qalıbdır. İndi isə, cəmi iki il qalır. Gələcək olimpiya oyunlarında idmançılarımızın iştirakına mən çox nikbinliklə baxıram. Əminəm ki, idmançılarımız ölkəmizi layiqincə təmsil edəcək və böyük qələbələrlə Vətənə dönəcəklər.
MÜXBİR: Bir daha sizi təbrik edirik. Siz idmançılara xüsusi diqqət və qayğı göstərdiniz. Bu gün də Elçin İsmayılova belə bir qiymətli hədiyyə verildi. Yəqin ki, uğurlar davam edəcək və Milli Olimpiya Komitəsi yenə də öz hədiyyələrini verəcəkdir.
İLHAM ƏLİYEV: Bəli, belə də olacaqdır.
Foto Namiq Məmmədovundur