SİYASƏT
Babək Rayon Rabitə İdarəsinin yeni binası istifadəyə verilib
Naxçıvan, 27 fevral, AZƏRTAC
Muxtar respublikada rabitə və yeni texnologiyaların tətbiqi istiqamətində kompleks tədbirlər həyata keçirilir. Son illər Rabitə və Yeni Texnologiyalar Nazirliyinin maddi-texniki bazasının gücləndirilməsi yaşayış məntəqələrində müasir poçt-rabitə xidmətlərinin təşkilinə səbəb olub.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, fevralın 27-də Babək Rayon Rabitə İdarəsinin yeni binası istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.
Tədbirdə Naxçıvan Muxtar Respublikasının rabitə və yeni texnologiyalar naziri Rövşən Məmmədov çıxış edərək deyib ki, muxtar respublikada bu sahədə beynəlxalq təcrübəyə və qabaqcıl texnologiyalara əsaslanan fəaliyyət sayəsində müsbət nəticələr əldə edilib, ən müasir standartlara uyğun telekommunikasiya infrastrukturu formalaşdırılıbdır. Həyata keçirilən tədbirlərin nəticəsidir ki, son 11 ildə muxtar respublikada rabitə xidmətlərinin həcmi 4 dəfə, avtomat telefon stansiyaların sayı 2,3 dəfə, telefon abunəçilərini sayı 2 dəfə, internet trafikinin həcmi 20 min dəfə, telekommunikasiya kanallarının tutumu isə 4 min dəfə artıb. Muxtar respublikada informasiya cəmiyyətinə keçid və elektron hökumətin tətbiqi istiqamətində də müvafiq işlər görülüb, “Elektron hökumət” portalı üzərindən rabitə, genişzolaqlı internet xidməti haqları, elektrik enerjisi və təbii qazdan istifadə haqlarının onlayn ödənişinə başlanılıb. “Naxçıvanpoçt” Məhdud Məsuliyyətli Cəmiyyətinin göstərdiyi xidmətlərin həcmi də artırılıb, 2014-cü ildə 12 yeni avtomat telefon stansiyası və 9 yeni poçt bölməsi istifadəyə verilib. Əldə olunan nailiyyətlər barədə ətraflı məlumat verən Rövşən Məmmədov yaradılan şəraitə görə muxtar respublika rabitəçiləri adından minnətdarlıq edib.
Naxçıvan Muxtar Respublikası Ali Məclisinin Sədri Vasif Talıbov Babək Rayon Rabitə İdarəsi və “Naxçıvanpoçt” Məhdud Məsuliyyətli Cəmiyyətinin Babək Rayon filialı üçün yeni inzibati binanın istifadəyə verilməsi münasibətilə kollektivləri təbrik edərək deyib: 1979-cu ildən fəaliyyət göstərən Babək Rayon Rabitə İdarəsi 1 qəsəbə və 36 kəndi əhatə etməklə, 73 minə yaxın əhaliyə xidmət göstərir. Rayonda rabitə xidməti 25 avtomatlaşdırılmış rabitə bölməsi tərəfindən həyata keçirilir. Eyni zamanda “Naxçıvanpoçt” Məhdud Məsuliyyətli Cəmiyyətinin Babək Rayon filialı da 24 poçt bölməsi ilə rayon əhalisinin xidmətindədir. Babək rayonunun kənd yaşayış məntəqələrində müasir tipli ATS-lər qurulmuş, bütün ərazi optik arabağlantı ilə təmin olunmuş və internetin əhatə dairəsi 100 faizə çatdırılmışdır. Yaradılan bu şərait rayonda rabitə və poçt xidmətinin müasir tələblər səviyyəsində həyata keçirilməsinə imkan verir.
“Yeni texnologiyaların tətbiqi, rabitə və poçt xidmətinin səviyyəsinin yüksəldilməsi zamanın tələbidir”, - deyən Ali Məclisin Sədri bildirib ki, ölkəmizdə rabitə və yeni texnologiyalar sisteminin inkişafı diqqət mərkəzində saxlanılır. Son illər bu sahənin maddi-texniki bazası xeyli gücləndirilib, qanunvericilik bazası yaradılıb, dövlət proqramları qəbul olunubdur. Ölkəmizdə həyata keçirilən bu tədbirlərin tərkib hissəsi kimi muxtar respublikada da informasiya-kommunikasiya texnologiyalarının inkişafına xüsusi diqqət yetirilir, bu sahədə müvafiq tədbirlər görülür.
Ali Məclisin Sədri deyib: Müasir cəmiyyəti yeni texnologiyalarsız təsəvvür etmək olmaz. Cəmiyyət həyatının bütün sahələrində yeni texnologiyaların tətbiqi vacibdir. Çünki bunlarsız ölkənin inkişafını təmin etmək mümkün deyil. Bu gün ölkəmizdə bu sahəyə xüsusi diqqət yetirilməsinin əsas səbəbi də cəmiyyətin informasiyaya olan tələbatını ödəmək, eləcə də təhsil sistemini yeni texnologiyaların tətbiqi hesabına inkişaf etdirməkdir. Muxtar respublikada buna nail olunub, ümumtəhsil məktəblərində kompyuter sinifləri yaradılıb, internetə çıxış təmin edilib, elektron lövhələr quraşdırılıbdır. Həmçinin muxtar respublikada distant təhsilin tətbiqinə başlanılıb, məktəb-muzey şəbəkəsi yaradılıb. Bundan başqa əhalinin rahatlığını təmin etmək üçün “Naxçıvanpoçt” Məhdud Məsuliyyətli Cəmiyyəti yaradılıb, onun filial və bölmələrinin fəaliyyəti təmin edilib. Artıq muxtar respublika əhalisinə yaşadıqları ərazilərdəki poçt şöbələri vasitəsilə müxtəlif xidmətlər göstərilir. Muxtar respublikanın yaşayış məntəqələrinin tamamilə optik arabağlantı ilə təmin edilməsi və alternativ optik xəttin çəkilişinin başa çatdırılması isə “Evədək optika” layihəsinin həyata keçirilməsinə geniş imkanlar açıb. Bir sözlə, bu gün rabitə və yeni texnologiyalar sahəsində həyata keçirilən tədbirlər muxtar respublikanın inkişafına və əhalinin rahatlığına xidmət edir.
Ali Məclisin Sədri qarşıda mühüm vəzifələrin durduğunu bildirərək deyib: Bu gün dünyada gedən prosesləri izləmək və müasir inkişafla ayaqlaşmaq üçün informasiya texnologiyalarının tətbiqinə, inkişafına və öyrənilməsinə ciddi fikir verilməlidir. Yeni texnologiyaların tətbiqi yeni mütəxəssislərin hazırlanması deməkdir. Muxtar respublikada yeni texnologiyaların tətbiqi ilə yanaşı, mütəxəssis hazırlığına da ciddi diqqət yetirilməlidir. Rabitə sistemində yeni texnologiyaların tətbiqi həm də əhaliyə göstərilən xidmətin səviyyəsini yüksəltməyi zəruri edir. Ona görə də Rabitə və Yeni Texnologiyalar Nazirliyi və onun qurumları əhaliyə nümunəvi xidmət göstərməli, insanlar muxtar respublikada quraşdırılan yeni texnologiyaların, müasir rabitə və poçt xidmətlərinin imkanlarından istifadəyə təşviq olunmalıdır.
Ali Məclisin Sədri rabitə işçilərinin əhaliyə nümunəvi xidmət göstərmək üçün səylərini daha da artıracaqlarına əminliyini bildirib, bu işlərin həyata keçirilməsində kollektivə uğurlar arzulayıb.
Sonra Ali Məclisin Sədri binada yaradılan şəraitlə tanış olub.
Məlumat verilib ki, zirzəmi ilə birlikdə 4 mərtəbədən ibarət olan binada 16 iş otağı ayrılıb, 72 yerlik iclas zalı, yeməkxana və digər xidməti otaqlar istifadəyə verilib. Burada informasiya-kommunikasiya texnologiyalarının ən son yenilikləri tətbiq olunub, müasir elektron avtomat telefon stansiyası, yeni nəsil rabitə və poçt avadanlıqları quraşdırılıb. Bu da abunəçilərə çoxfunksiyalı rabitə xidmətlərindən, o cümlədən telefon, videotelefon, İP televiziya, genişzolaqlı internetdən istifadəyə imkan verəcək.
Binada “Naxçıvanpoçt” Məhdud Məsuliyyətli Cəmiyyətinin Babək rayon filialının fəaliyyəti də təmin edilib. Burada dövri mətbuatın satışı, teleqram, məktub, pul baratları və bağlamaların qəbulu və göndərişi, elektrik enerjisi, təbii qaz və sudan istifadə haqlarının yığılması, mobil cihazların qeydiyyatı və digər bank-maliyyə xidmətlərinin göstərilməsi üçün hərtərəfli şərait yaradılıb. Poçt əməliyyatlarının avtomatlaşdırılması göndərişlərin qısa zamanda və etibarlı çatdırılmasına imkan verəcək.
Binanın üçüncü mərtəbəsində tikintisi başa çatdırılan Sədərək-Ordubad alternativ fiber-optik kabel magistralının təqdimatı olub.
Ali Məclisin Sədri Babək rayon telekommunikasiya şəbəkəsini alternativ fiber-optik kabel magistralına birləşdirən sistemi işə salıb, muxtar respublikanın fiber-optik kabel şəbəkələrinin yerləşmə sxeminə və bununla bağlı hazırlanmış filmə baxıb.
Naxçıvan Muxtar Respublikasının rabitə və yeni texnologiyalar naziri Rövşən Məmmədov muxtar respublikada fiber-optik kabel şəbəkələrinin qurulması sahəsində görülən işlər barədə məlumat verib.
Bildirilib ki, tikintisinə 2005-ci ildən başlanılan fiber-optik kabel şəbəkəsi muxtar respublika ərazisinin 94 faizini əhatə edir. Hazırda muxtar respublikada istismar edilən fiber-optik kabel xətlərinin uzunluğu 1136 kilometrdən çoxdur. Bu da muxtar respublikanın həm daxili, həm də xarici telekommunikasiya əlaqələrinin kəsintisiz həyata keçirilməsinə imkan verir. Uzunluğu 242 kilometr olan Sədərək-Ordubad fiber-optik kabel magistralına ilkin olaraq Naxçıvan şəhəri və Babək rayonu qoşulub. Növbəti mərhələdə digər yaşayış məntəqələri də bu xəttə birləşdiriləcək və bununla da Naxçıvanın telekommunikasiya əlaqələrinin alternativliyi tam təmin olunacaq.
Fiber-optik kabel şəbəkəsi televiziya siqnallarının verici stansiyalara çatdırılmasına və rəqəmsal yayımın tətbiqinə də imkan verir. Artıq muxtar respublikada rəqəmsal yayıma keçid tamamilə başa çatdırılıb. Hazırda 6 güclü və 43 azgüclü verici vasitəsi ilə bütün yaşayış məntəqələrində televiziyanın rəqəmsal yayımı təşkil olunub. Bu ilin yanvar ayında isə muxtar respublika ərazisində 67 televiziya kanalının DVB-T2 standartında yayımına başlanılıb, Naxçıvan Dövlət Televiziyasının HD formatda yayımı təmin edilib.
Binada yaradılan şəraitlə tanışlıqdan sonra Ali Məclisin Sədri Babək Rayon Rabitə İdarəsi və “Naxçıvanpoçt” Məhdud Məsuliyyətli Cəmiyyətinin Babək rayon filialının kollektivi ilə görüşüb, yaradılan şəraitdən səmərəli istifadə olunması ilə bağlı müvafiq tapşırıqlar verib.
Binanın həyəti də abadlaşdırılıb, transformator yarımstansiyası və generator quraşdırılıb.