İQTİSADİYYAT


Baden-Baden sığorta forumunda “Azərbaycan gecəsi” keçirilib

A+ A

Bakı, 25 oktyabr, AZƏRTAC

Almaniyanın Baden-Baden şəhərində sığortaçıların ənənəvi illik forumu çərçivəsində “Azərbaycan gecəsi” keçirilib.

Azərbaycan Sığortaçılar Assosiasiyasından (ASA) AZƏRTAC-a verilən məlumata görə, Azərbaycan Respublikası Maliyyə Bazarlarına Nəzarət Palatasının rəsmi dəstəyi ilə ASA tərəfindən təşkil olunan “Azərbaycan gecəsi”ndə dünyanın 30-a yaxın ölkəsindən 240-a yaxın nümayəndə iştirak edib.

Tədbirdə ölkəmizi ASA, İcbari Sığorta Bürosu (İSB) və 10 sığorta şirkətini təmsil edən 20 nəfərlik nümayəndə heyəti təmsil edib. Gecədə çıxış edən ASA-nın sədri Orxan Bayramov Azərbaycanın sığorta bazarı, buradakı inkişaf və bazarın perspektivləri barədə məlumat verib. Azərbaycanın milli elementləri ilə bəzədilmiş tədbir məkanında qonaqlar Azərbaycan musiqisi və milli mətbəxinin təamları ilə də tanış olublar.

Bu il “Azərbaycan gecəsi”nə ölkənin 6 sığorta şirkəti sponsorluq edib. Baş sponsor “PAŞA Həyat” sığorta şirkəti olub. Sponsorlar isə “Standard Insurance”, “AzərSığorta”, “Atəşgah Sığorta Qrupu”, “İpək Yolu Sığorta” və “AzRe təkrarsığorta” şirkətləridir.

Xatırladaq ki, Baden-Baden sığorta forumu çərçivəsində “Azərbaycan gecələri”nin keçirilməsi artıq ənənə halını alıb. Bu tədbirlər 2013, 2014 və 2015-ci illərdəki forum çərçivəsində də keçirilib. Baden-Baden forumunda Azərbaycanın sığorta şirkətləri və sığorta qurumlarının xarici tərəfdaşları ilə çoxsaylı müxtəlif işgüzar görüşləri nəzərdə tutulur.

Görüşlərdə yeni partnyorların tapılması, təkrar sığorta risklərinin ötürülməsi, müxtəlif sığorta məhsulları üzrə təcrübə mübadiləsi, eləcə də Azərbaycan sığorta bazarında yeni məhsulların tətbiqi imkanları ilə bağlı müzakirələr aparılır.

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.