REGİONLAR
“Bakı-2015” ilk Avropa Oyunlarının tanıtım kampaniyası çərçivəsində növbəti görüş Şərurda
Şərur, 27 yanvar, Rauf Əliyev, AZƏRTAC
Azərbaycanda keçiriləcək birinci Avropa Oyunlarının tanıtım kampaniyası çərçivəsində yeniyetmə və gənclərlə növbəti görüş yanvarın 27-də Naxçıvan Muxtar Respublikasının Şərur şəhərindəki mədəniyyət evində olub.
AZƏRTAC xəbər verir ki, “Bakı-2015” Avropa Oyunları Əməliyyat Komitəsinin təşkilatçılığı ilə keçirilən görüşdə rayonun ümumtəhsil məktəblərinin şagirdləri iştirak ediblər.
Görüşdə “Bakı-2015” Avropa Oyunları Əməliyyat Komitəsinin nümayəndəsi Lalə Eyvazova bildirib ki, iyunun 12-dən 28-dək davam edəcək ilk Avropa Oyunları bütün dünyanın diqqət mərkəzində olacaq. Ümumilikdə, 20 idman növünü əhatə edəcək bu mötəbər oyunların proqramına daxil olan yarışların 16-sı Olimpiya, dördü isə qeyri-Olimpiya idman növü üzrə keçiriləcəkdir. Avropa Oyunlarında qitənin müxtəlif ölkələrindən 6 mindən çox idmançı 17 yarış günü müddətində birincilik uğrunda mübarizə aparacaqdır.
Vurğulanıb ki, bu gün müstəqil Azərbaycan Respublikasının paytaxtı Bakı şəhəri beynəlxalq tədbirlərin keçirildiyi məkana çevrilib. İlk Avropa Oyunlarının Bakıda keçirilməsi də Azərbaycanın beynəlxalq miqyasda qazandığı nüfuz ilə birbaşa bağlıdır. Son illərdə sürətlə inkişaf edən Azərbaycan, həm də idman sahəsində çox böyük uğurlara imza atıb. Müstəqilliyinin bərpasından keçən 23 il ərzində 200-dən artıq atletlə Yay və Qış Olimpiya Oyunlarında təmsil olunan ölkəmiz bu günədək beynəlxalq arenalarda 2000-ə qədər medal qazanıb.
Lalə Eyvazova görüş iştirakçılarının diqqətinə çatdırıb ki, ölkəmiz beynəlxalq idman yarışlarının keçirilməsində də böyük təcrübəyə malikdir. Təsadüfi deyildir ki, 2002-ci ildən indiyədək 36 nüfuzlu beynəlxalq yarışa ev sahibliyi edən Azərbaycanda sonuncu belə mötəbər turnir 2014-cü ildə keçirilən bədii gimnastika üzrə Avropa çempionatı olub.
Sonra şərurlu idmançılar səhnəyə dəvət ediliblər. Onlardan kinqboksinq idman növü üzrə dünya çempionu Nail Hüseynov əldə etdiyi nailiyyətlərdən danışıb. Bildirib ki, 2014-cü ildə Ukraynanın Xarkov şəhərində keçirilən kinqboksinq üzrə dünya çempionatında Azərbaycanı təmsil etmişəm və inamla döyüşərək uğur qazanmışam.
Görüşdə birinci Avropa Oyunlarına həsr edilmiş videoçarx nümayiş etdirilib.
“Bakı-2015” Avropa Oyunlarının Əməliyyat Komitəsinin üzvləri tərəfindən şərurlu yeniyetmə və gənclərə üzərində birinci Avropa Oyunlarının loqo və simvolları əks olunan çanta və papaqlar hədiyyə edilib.
Yanvarın 27-də analoji tədbir Naxçıvan şəhərindəki İlham Əliyev adına Olimpiya-İdman Kompleksində də keçirilib.
Görüşdə birinci Avropa Oyunlarında iştirak edəcək boksçumuz Tayfur Əliyev (56 kq) səhnəyə dəvət edilib.
Bildirilib ki, ilk dəfə böyüklər arasında yarışda iştirak edən Naxçıvan Dövlət Universitetinin tələbəsi Tayfur Əliyev haqlı olaraq Azərbaycan çempionatının tapıntısı kimi qiymətləndirilir. 17 yaşlı boksçu 4 döyüşü tam üstünlüklə başa vurub, yarışlardan birini isə rəqibini nokauta salmaqla bitirib. Tələbə boksçu finalda Azərbaycan Respublikası Fövqəladə Hallar Nazirliyinin idman klubunun boksçusu, uzun illər seçmə komandamızın kapitanı olmuş Rəhim Nəcəfovu məğlub edib.
Tayfur Əliyev çempionatda ən yüksək texnikalı boksçu üçün təsis olunmuş “Qızıl əlcək” mükafatının da sahibi olub. Fərəhləndirici haldır ki, çempion tələbə 2015-ci ildə Bakıda keçiriləcək birinci Avropa Oyunlarında iştirak etmək hüququ qazanıb.
Görüşdə tələbə idmançının burada da Vətənimizi, təhsil aldığı universiteti layiqincə təmsil edəcəyinə inam ifadə olunub.
“Bakı-2015” Avropa Oyunları Əməliyyat Komitəsinin üzvləri həftə ərzində muxtar respublikanın şəhər və rayonlarında tanıtım kampaniyasını davam etdirəcəklər.