Bakı, 29 iyun, AZƏRTAC

İyunun 28-də Berlinin tarixi məkanlarından olan “Kunztschule” qalereyasında 400-dən artıq qonaq onlar üçün quraşdırılmış böyük monitor vasitəsilə birinci Avropa Oyunlarının möhtəşəm bağlanış mərasimini izləyib.

Avropa Azərbaycan Cəmiyyətinin (TEAS) Almaniyadakı nümayəndəliyi tərəfindən təşkil olunmuş tədbirdə iştirak edən ictimai-siyasi xadimlər, o cümlədən diplomatik korpusun nümayəndələri, Almaniya parlamentinin üzvləri “Bakı-2015” birinci Avropa Oyunlarının uğurla keçirilməsindən və möhtəşəm bağlanış mərasimindən çox təsirləndiklərini bildiriblər.

Azərbaycanın Almaniyadakı səfiri Pərviz Şahbazov ilk Avropa Oyunlarının yüksək səviyyədə təşkili üçün Prezident İlham Əliyevə, birinci xanım, “Bakı-2015” ilk Avropa Oyunları Təşkilat Komitəsinin sədri Mehriban Əliyevaya, eləcə də Milli Olimpiya Komitəsinə təşəkkürünü bildirib. Diplomat xatırladıb ki, birinci Avropa Oyunlarının keçirilməsi barədə qərar 2012-ci ildə verilib. Bir ildən sonra bu möhtəşəm tədbirə ev sahibliyi etməsi üçün Azərbaycanın paytaxtı Bakı seçilib. Azərbaycan xalqı bu qərarın qəbul olunmasından qürur hissi keçirirdi. Səfir Azərbaycan idmançılarının yarışlarda medal sayına görə ikinci yerə yüksəldiklərini bildirərək bu zəfəri tarixi nailiyyət kimi dəyərləndirib.

Almaniya parlamentinin üzvü Tobias Zek cəmi iki il yarım müddətə möhtəşəm Avropa Oyunlarının təşkilində Azərbaycanın uğurlarını yüksək qiymətləndirib. O bildirib ki, Bakıda keçirilən ilk Avropa Oyunları böyük uğur və bu Oyunların gələcəkdə digər ölkələrdə təşkili üçün dönüş nöqtəsi idi. İdman Avropa ölkələri arasındakı münasibətlərin gücləndirilməsində yaxşı bir vasitə ola bilər.

TEAS-ın Almaniya nümayəndəliyinin rəhbəri Şahin Nemati “Bakı-2015” ilk Avropa Oyunlarını belə təsvir edib: “Bu Oyunlar müstəqilliyini 24 il əvvəl bərpa etmiş gənc Azərbaycan üçün tarixi əhəmiyyətə malik hadisə idi. Yəqin ki, o zaman bu miqyasda bir tədbirə ev sahibliyi edəcəyimizin mümkünlüyünü belə düşünə bilməzdik. Lakin ölkəmizin iqtisadi inkişafı və insan resurslarından əminliyimiz bu məqsədə nail olmağımızı mümkün etdi. Avropa Oyunları Azərbaycan-Avropa münasibətlərinin inkişafı istiqamətində daha bir uğurlu addım idi və eyni zamanda, Azərbaycanın Avropanın idman tarixinə verdiyi töhfələrdən biridir”.

Tədbirdən hazırlanmış reportaj “TV Berlin” kanalında da yayımlanacaq.