Bakı, 29 may, Pərvanə İmanova, AZƏRTAC

Mayın 29-da Bakı Biznes Universitetində (BBU) “Məzun günü” münasibətilə tədbir keçirilib.

AZƏRTAC xəbər verir ki, əvvəlcə “Məzun – 2015” buraxılış günü çərçivəsində universitetdə iş axtaran məzunlarla işəgötürən müəssisə və təşkilatlar arasında əlaqələri gücləndirmək, gənclərin əmək bazarına inteqrasiyasını asanlaşdırmaq məqsədilə “Karyerada ilk addım” devizi altında əmək yarmarkası təşkil olunub. Əmək yarmarkası Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Xidməti tərəfindən təşkil edilib. Tədbirdə 62 müəssisə tərəfindən 400-dən çox boş (vakant) iş yeri təqdim olunub.

Açılış mərasimində əmək və əhalinin sosial müdafiəsi naziri Səlim Müslümov belə fəal məşğulluq tədbirlərinin əsas məqsədinin tələbə və məzunların əmək bazarına inteqrasiyasının dəstəklənməsi, onların əmək bazarı, yiyələndikləri ixtisaslara əmək bazarında olan tələbat barədə məlumatlandırılması, işəgötürənlərlə onlar arasında ilkin ünsiyyətin yaradılması olduğunu bildirib. Eyni zamanda, bu tədbir işəgötürənlərə də gələcəkdə ixtisaslı kadr seçimini aparmaq imkanı yaradır. Bununla yanaşı, ali təhsil müəssisəsini bitirmək ərəfəsində olanlar, yaxud artıq məzun olmuş gənclər üçün burada boş (vakant) iş yerləri təqdim edilir, eləcə də məzunlar üçün əlavə peşə təhsilinə cəlb olunmaq imkanları yaradılır. Digər vasitələrlə də gənclərin əmək bazarına çıxışı dəstəklənir.

Sonra S.Müslümov və Bakı Biznes Universitetinin rəhbərliyi əmək yarmarkası ilə tanış olub, bu fəal məşğulluq tədbirləri ilə bağlı tələbə və məzunların rəy və təkliflərini öyrəniblər.

Əmək yarmarkasında boş iş yerlərinə göndərişlər verilməklə yanaşı, universitetin məzunu olmuş ayrı-ayrı şəxslərin istəklərinə əsasən hazırkı əmək bazarının tələblərinə uyğun peşələr üzrə əlavə təhsil kurslarına cəlb olunmaq üçün qeydiyyatı aparılıb. Eləcə də yay mövsümündə müvəqqəti xarakterli işlərdə çalışmaq istəyənlər Əmək Birjası tərəfindən qeydiyyata götürülüblər. Tələbə və məzunlar işləmək istədikləri müəssisələrin nümayəndələrinə özləri barədə şəxsi məlumatları təqdim ediblər.

Daha sonra “Məzun – 2015” buraxılış gününə həsr olunan tədbir keçirilib.

BBU-nun rektoru, professor İbad Abbasov məzunları, universitetin kollektivini və valideynləri təbrik edib. Rektor gənclərə gələcək ali təhsildə və karyera fəaliyyətlərində uğurlar arzulayıb.

Təhsildə yüksək nəticələr göstərən və universitetin ictimai həyatında fərqlənən məzunlara diplomlar verilib.

Məzun və valideynlər BBU-nun rəhbərliyinə, müəllimlərə göstərdikləri qayğı və diqqətə görə təşəkkürlərini bildiriblər.

Sonra tədbir bədii hissə ilə davam edib. Respublikanın tanınmış incəsənət ustalarının və BBU-nun bədii özfəaliyyət kollektivinin ifasında maraqlı musiqi nömrələri təqdim olunub.