Bakı, 30 dekabr, AZƏRTAC

Bakı Dövlət Universitetinin Abay Kunanbayev adına Qazax Mərkəzində “Abay” kitabının təqdimat mərasimi keçirilib.

Universitetdən AZƏRTAC-a bildirilib ki, kitab Türkdilli Ölkələrin Parlament Assambleyası, Qazaxıstanın ölkəmizdəki səfirliyi və Bakı Dövlət Universitetinin (BDU) ortaq layihəsi əsasında işıq üzü görüb.

Tədbirdə çıxış edən BDU-nun rektoru, akademik Abel Məhərrəmov böyük qazax şairi, yazıçısı, ictimai xadim, müasir qazax yazılı ədəbiyyatının banisi Abay Kunanbayevin Azərbaycan dilinə tərcümə olunmuş əsərlərinin toplandığı kitabı yüksək dəyərləndirib. Kitabın nəşrinin Azərbaycan- Qazaxıstan ədəbi əlaqələrinin inkişafı istiqamətində növbəti böyük hadisə olduğunu, Abayın müxtəlif dövrlərdə Azərbaycan şairləri tərəfindən tərcümə edilmiş onlarla şeirinin və üç poemasının latın qrafikası ilə çap olunduğunu təqdirəlayiq hal kimi qiymətləndirib.

Qazaxıstan ilə ölkəmiz arasında əlaqələrin əsasının ümummilli lider Heydər Əliyev tərəfindən qoyulduğunu bildirən rektor son illər Prezident İlham Əliyevin uğurlu siyasəti nəticəsində münasibətlərin daha yüksək səviyyəyə çatdığını qeyd edib. Rəhbərlik etdiyi ali məktəbin Qazaxıstan universitetləri ilə əlaqələrindən söz açan rektor 2011-ci ilin mayında BDU-da Abay Kunanbayev adına Qazax Mərkəzinin fəaliyyətə başladığını, BDU-nun bilavasitə iştirakı ilə Astanada Lev Qumilyov adına Avrasiya Milli Universitetində Heydər Əliyev Mərkəzinin açıldığını diqqətə çatdırıb.

Tədbirdə professorlar Ramiz Əskər və Firuzə Ağayeva, kitabın tərtibçisi, dosent Fatimə Dursunova Abay yaradıcılığının tədqiqi, tədrisi və tərcümə məsələlərindən danışıblar. Bildirilib ki, Abay yaradıcılığının zirvəsi hesab edilən “Əqliyyə” fəlsəfi-didaktik əsəri ilk dəfə Azərbaycan dilində oxuculara təqdim olunub, kitabın elektron versiyası hazırlanaraq elektron resurslara daxil edilib.

Qeyd edək ki, Abay Mərkəzində bu illər ərzində bir çox layihələr həyata keçirilib, birgə konfrans və simpoziumlar təşkil olunub, Qazaxıstan universitetləri ilə müqavilələr imzalanıb. Belə ki, BDU-da Qazax xanlığının yaranmasının 550 və Abay Kunanbayevin 170 illik yubileyi münasibətilə beynəlxalq konfrans keçirilib, Qazaxıstan Respublikası Parlamentinin Məclis sədri Nurlan Niqmatuli, böyük qazax şairi Oljas Süleymenov, Türkdilli Ölkələrin Parlament Assambleyasının baş katibi Jandost Asanov, qazaxıstanlı rektor və professorlar, jurnalistlər, bir çox tanınmış insanlar universitetdə olublar. Eyni zamanda, BDU-nun bir neçə fakültəsində qazaxıstanlı tələbələr təcrübə keçiblər.