İQTİSADİYYAT


Bakı Limanında altı ayda qeyri-neft məhsulları üzrə yükaşırma 43,5 faiz artıb

Bakı, 5 iyul, AZƏRTAC

Bakı Limanında 2017-ci ilin birinci yarısında qeyri-neft məhsulları üzrə yükaşırmada 43,5 faiz artım qeydə alınıb.

“Bakı Beynəlxalq Dəniz Ticarət Limanı” QSC-nin mətbuat xidmətindən AZƏRTAC-a bildirilib ki, Prezident İlham Əliyevin ölkə iqtisadiyyatının diversifikasiyasına yönəlmiş siyasətinin tələblərinə və qəbul olunmuş “Strateji Yol Xəritəsi”nin çağırışlarına cavab verərək, “Bakı Beynəlxalq Dəniz Ticarət Limanı” QSC xarici yüklərin cəlb olunması, limanda dünya standartlarına cavab verən əməliyyatların tətbiqi üçün fəaliyyətini davam etdirib. Nəticədə 2017-ci ilin birinci yarısında Bakı Limanında bütün istiqamətlər üzrə artım qeydə alınıb. Belə ki, ümumi yükaşırmanın (neft məhsulları xaric) həcmi keçən ilin müvafiq dövrü ilə müqayisədə 43,5 faizə qədər artaraq 1900 min ton təşkil edib. Yükaşırmanın 89 faizi tranzit yükaşırmanın payına düşüb.

Ələt qəsəbəsində yerləşən Bərə Terminalında vaqon aşırılması 35,2 faiz artaraq 21 min 775 ədədə çatıb. Vaqonların 10 min 041 (46,1 faiz) Bakı-Türkmənbaşı-Bakı istiqamətində, 5773 vaqon (26,5 faiz) Bakı-Aktau-Bakı istiqamətində, 5961 vaqon (27,4 faiz) isə cari ilin mart ayında istifadəyə verilmiş Kurık limanından, başqa sözlə Bakı-Kurık-Bakı istiqamətində hərəkət edib. Hər iki istiqamətdə (Türkmənistan, Qazaxıstan) sərnişindaşıma isə keçən ilin müvafiq dövrü ilə müqayisədə 50 faizə qədər artaraq 14 min 478 nəfər olub.

Eyni zamanda, nəzərəçarpacaq artım təkərli texnikanın xüsusən də, irihəcmli nəqliyyat vasitələrinin (TIR) aşırılmasında qeydə alınıb. Belə ki, keçən ilin müvafiq dövrü ilə müqayisədə Bakı Limanının xidmətlərindən istifadə edən bu tipli nəqliyyat vasitələrinin sayı 53,7 faiz artaraq 16 min 204 ədəd irihəcmli və digər nəqliyyat vasitəsi təşkil edib. Bunlardan 10 min 154 ədədi (62,7 faiz) Bakı-Türkmənbaşı-Bakı istiqamətində, 6050 ədədi (37,3 faiz) Bakı-Aktau-Bakı istiqamətində hərəkət edib.

Bakı şəhərində yerləşən Əsas Yük Terminalında aşırılan yüklərin miqdarı 2017-ci ilin birinci yarısında keçən ilin müvafiq dövrü ilə müqayisədə 5 faiz artaraq 290 min ton olub. Aşırılan yüklərin böyük hissəsi tranzit konteynerlərin və digər yüklərin payına düşüb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.