İQTİSADİYYAT


Bakı Nəqliyyat Agentliyi icazə olmadan yol nişanları quraşdırılmasına qarşı reydlərə başlayıb

A+ A

Bakı, 11 noyabr, Elvin Camalov, AZƏRTAC

Bakı Nəqliyyat Agentliyi müvafiq icazə olmadan yol nişanları quraşdırılmasına qarşı reydlərə başlayıb.

AZƏRTAC xəbər verir ki, bu barədə Bakı Nəqliyyat Agentliyinin ictimai əlaqələr və maarifləndirmə şöbəsinin müdiri Nuridə Allahyarova deyib.

O bildirib ki, Bakı şəhərinin inzibati ərazisinə aid yollarda Bakı Nəqliyyat Agentliyinin müvafiq icazəsi olmadan yol hərəkətini nizamlayan texniki vasitələrin, o cümlədən yol nişanlarının quraşdırılması hallarına rast gəlinir. Ticarət, ictimai iaşə və xidmət obyektlərinin qarşısında parklanmanın təşkili, məlumatların çatdırılması və digər məqsədlərlə müvafiq icazə olmadan yol hərəkətini nizamlayan texniki vasitələrin, o cümlədən yol nişanlarının quraşdırılması nəqliyyat sıxlığının yaranmasına səbəb olmaqla yanaşı, həm də hərəkətin təhlükəsizliyinin təmin edilməsinə imkan vermir. Mövcud problemlərin və bu sahədə nöqsanların aşkar edilib aradan qaldırılması məqsədilə Bakı Nəqliyyat Agentliyi müvafiq icazə olmadan yol hərəkətini nizamlayan texniki vasitələrin, o cümlədən yol nişanları quraşdırılmasına qarşı reydlərə başlayıb.

N.Allahyarovanın sözlərinə görə, bu kimi problemlərin aradan qaldırılması məqsədilə agentliyin mütəxəssisləri tərəfindən mütəmadi olaraq Bakı şəhərinin inzibati ərazisində yollara baxış keçirilib, müvafiq icazə olmadan quraşdırılmış yol nişanları çıxarılıb, yaxud da obyektlərin sahiblərinə bu barədə aidiyyəti üzrə xəbərdarlıq edilib.

“İnzibati Xətalar Məcəlləsinin 350-ci bəndinə əsasən müvafiq icazə olmadan yol hərəkətini nizamlayan texniki vasitələrin, işıqforların və yol nişanlarının quraşdırılmasına görə fiziki şəxslər otuz manatdan əlli manatadək məbləğində, vəzifəli şəxslər yüz əlli manatdan iki yüz manatadək məbləğində, hüquqi şəxslər min beş yüz manatdan iki min manatadək məbləğində cərimə edilir. Bundan əlavə, həmin Məcəllənin 354-cü bəndinə əsasən, müvafiq icazə almadan və ya alınmış icazənin şərtlərinə əməl etmədən avtomobil yollarında, prospektlərdə, küçələrdə, təhkim və mühafizə zolağında yol hərəkəti təhlükəsizliyi qaydalarının pozulmasına görə fiziki şəxslər səksən manatdan yüz manatadək məbləğində, vəzifəli şəxslər dörd yüz manatdan beş yüz manatadək məbləğində, hüquqi şəxslər üç min manatdan dörd min manatadək məbləğində cərimə edilir”, - deyə şöbə müdiri vurğulayıb.

N.Allahyarova qeyd edib ki, Bakı Nəqliyyat Agentliyi vətəndaşlardan xahiş edir ki, bu cür hallarla qarşılaşdıqları təqdirdə “ALO 141” Qaynar xəttinə müraciət etsinlər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.