İQTİSADİYYAT
Bakı-Şamaxı avtomobil yolunun yenidən qurulması davam edir VİDEO
Bakı, 31 may, AZƏRTAC
“Regionların 2014-2018-ci illər sosial-iqtisadi inkişafı Dövlət Proqramı” çərçivəsində Bakı-Şamaxı-Yevlax avtomobil yolunun 15-91-ci kilometrlik hissəsinin I texniki dərəcəyə uyğun olaraq 2 hərəkət zolağından 4 hərəkət zolağına genişləndirilməsi layihəsi uğurla icra olunur.
Bu barədə AZƏRTAC-a yol tikintisi işlərini həyata keçirən “Azəravtoyol” ASC-nin mətbuat xidmətindən bildirilib.
Layihəyə uyğun olaraq yol yatağının eni 27,5 metr, yolun hərəkət hissəsinin eni 15 metr, hərəkət zolaqlarının eni 3,75 metr, ayrıcı zolağın eni 5 metr, hər iki istiqamət üzrə çiyinlərin eni isə 3,75 metrdir.
Layihə çərçivəsində 123 ədəd (81-i tikilib) dairəvi borunun, 14 ədəd (13-ü tikilib) düzbucaqlı su keçidinin, 19 ədəd (13-ü tikilib) alt keçidin və 26 ədəd (6-sı tikilib) drenaj borularının tikintisi nəzərdə tutulub. Həmçinin yol boyu zəruri olan ərazilərdə 6 yerüstü piyada keçidinin inşası da planlaşdırılır.
Bundan başqa, layihə üzrə 11 ədəd geri dönməni təmin etmək üçün xüsusi hissələrin və Ceyrankeçməz çayı üzərində 2 körpünün tikintisi də aparılır. Yolun 63-cü kilometrində inşa edilən körpünün uzunluğu 47,5 metr, 68-ci kilometrində tikintisi aparılan körpünün uzunluğu isə 54,2 metrdir.
Hazırda yolun 15-45-ci kilometrliyində genişlənən hissədə işlər tam yekunlaşıb. Yolun 45-91-ci kilometrlik hissəsində müəyyən ərazilərdə yolun genişləndirilməsi işləri və yol boyu kommunikasiya xətlərinin köçürülməsi işləri başa çatdırılıb. Hazırda torpaq yatağının, yol geyiminin dənəvər laylarının, asfalt-beton layların, suötürücü boruların, yeraltı keçidlərin tikintisi işləri görülür.
Bakı-Şamaxı-Yevlax avtomobil yolunun 15-91-ci kilometrlik hissəsinin müəyyən ərazilərində mövcud yolun yenidən tikilməsi, bəzi hissələrdə yeni yol oxuna uyğun yolun tikilməsi, yerüstü piyada keçidlərinin inşası, zəruri olan yerlərdə işıqlandırma sisteminin qurulması, yolun xətlənməsi və nişanlanması işlərinin də yaxın müddət ərzində icrası təmin olunacaq.
Ümumilikdə isə layihə üzrə görülmüş işlərin həcmi 55-60 faiz təşkil edir.
Həmçinin Dünya Bankı ilə imzalanmış "Azərbaycan Magistral Avtomobil Yolu 3 Layihəsinə Əlavə Maliyyələşdirmə" üzrə kredit sazişi çərçivəsində Bakı-Şamaxı avtomobil yolunun 13,3-15 və 91-107 kilometrlik hissələrinin də I texniki dərəcəyə uyğun olaraq yenidənqurulması nəzərdə tutulur. Həmin layihələr tender mərhələsindədir və yaxın gələcəkdə onların da icrasına başlanılacaq.
Qeyd olunub ki, regionları birləşdirmək baxımından böyük əhəmiyyətə malik Bakı-Şamaxı avtomobil yolunun genişləndirilməsi turizmin və kənd təsərrüfatının inkişafına, avtonəqliyyat vasitələri ilə yük daşımalarının artımına gətirib çıxaracaq.