QAN YADDAŞI
Bakı Xoreoqrafiya Akademiyasında Xocalı şəhidlərinin xatirəsi yad edilib
Bakı, 26 fevral, AZƏRTAC
Fevralın 26-da Bakı Xoreoqrafiya Akademiyasında “Xocalı soyqırımı”nın 23-cü ildönümünə həsr olunmuş ədəbi-bədii gecə keçirilib.
Akademiyadan AZƏRTAC-a bildiriblər ki, tədbirdə bu ali təhsil müəssisəsinin kollektivi ilə yanaşı, Xocalı şəhər 2 nömrəli musiqi məktəbinin müəllimləri iştirak ediblər.
Gecədə Akademiyanın şagird və tələbələrinin hazırladıqları “Xocalı soyqırımı rəqsin dili ilə” kompozisiyasında Fikrət Əmirovun “Qarabağım”, “Noktürn”, Vasif Adıgözəlovun “Qərənfil”, Eldar Mansurovun “Ulu torpaq” əsərlərinin sədaları altında rəqslər, Xocalı faciəsinə həsr olunmuş şeirlər və mahnılar təqdim olunub, səhnəciklər göstərilib. Tədbirdə gənc musiqiçi Samir Salahov Xocalı soyqırımına həsr etdiyi “Ağlama, Xocalım” müəllif bəstəsini təqdim edib.