İQTİSADİYYAT
Bakı metrosunda vahid kartların istifadəsinə başlanılır VİDEO
Bakı, 6 avqust, Elvin Camalov, AZƏRTAC
Avqustun 6-da “Bakı Metropoliteni” QSC-də vahid ödəniş kartı olan "BakıKart" və "BakıKart məhdud istifadə üçün" kartlarının təqdimatı olub.
AZƏRTAC xəbər verir ki, “BakıKart” layihəsinin rəhbəri Ceyhun Əliyev avqustun 8-dən Bakı Metropoliteninin stansiyalarına daxil olmaq üçün vahid ödəniş kartı kimi "BakıKart" və "BakıKart məhdud istifadə üçün" kartlarından istifadəyə başlanılacağını və sentyabrın 30-dan isə hazırkı "Metrokart"ın istifadəsinin dayandırılacağını deyib.
Onun sözlərinə görə, bu kartlardan eyni zamanda “BakuBus” MMC-yə məxsus avtobuslar üçün istifadə olunacaq. Yeni kartları bütün metro stansiyalarda və "BakuBus" MMC-yə məxsus marşrutların Bakıdakı dayanacaqlarında quraşdırılmış yeni terminallardan əldə etmək olar.
"BakıKart"ın qiyməti 2 manatdır və 1 gediş haqqının qiyməti isə 20 qəpikdir. "BakıKart Məhdud istifadə üçün" kartın qiyməti də 20 qəpikdir. Bu növ karta yalnız satın alınarkən 1, 2, 3 və ya 4 gediş yükləmək mümkündür. Terminallarda bu növ kartların balansını artırmaq mümkün deyil. "BakıKart Məhdud istifadə üçün" kartı yuxarıda qeyd edilən nəqliyyat vasitələrindən çox az istifadə edən şəhərin qonaqları və sakinləri üçün nəzərdə tutulub. Hər iki növ kart heç bir halda geri qaytarılmır.
“Bakı Metropoliteni” QSC-nin hərəkət xidmətinin baş mühəndisi Etibar İsayev isə hazırda istifadə olunan kartların taleyi ilə bağlı məsələyə aydınlıq gətirib. Onun sözlərinə görə, avqustun 15-dək "Metrokart"ın girov dəyəri nağd şəkildə geri qaytarılacaq. Qeyd edilən tarixdən sonra isə bu mümkün olmayacaq. "Metrokart"ı "BakıKart" ilə dəyişdirmək mümkün deyil. "Metrokart"dan iki halda gediş haqqı olaraq istifadə edilə bilər. "Metrokart"ın girov dəyəri həmin karta gediş haqqı olaraq yüklənir. "Metrokart"ın balansı sıfır olduqda atılır və yeni "BakıKart" alınaraq istifadə olunur. "Metrokart"ın girov dəyəri və balansında olan məbləğ "BakıKart"a köçürülərək istifadə edilir.
E.İsayev onu da vurğulayıb ki, "Metrokart"ın balansında olan gediş haqqı sentyabrın 30-na qədər istifadə oluna bilər. "Metrokart"ın girov dəyəri və balansında olan məbləği "BakıKart"a köçürmək istəyən sərnişinlər yeni terminal vasitəsilə "BakıKart"ı alıb istifadədə olan "Metrokart"ı ilə birlikdə stansiyanın xəzinədarına təqdim etməlidir. Bir ədəd "Metrokart"ın girov dəyərini və ona yüklənmiş məbləği yalnız bir ədəd "BakıKart"a transfer etmək mümkündür.
Bildirilib ki, avqustun 15-dən sentyabrın 30-dək "Metrokart"ın girov dəyəri sadəcə gediş haqqı kimi istifadə olunacaq. Sentyabrın 30-dək isə metropolitendə "Metrokart" və "BakıKart"ın birgə istifadəsi həyata keçiriləcək.
Qeyd edək ki, “Metrokart” və “BakıKart”ları ilə yaranmış hansısa problemlə bağlı “20 Yanvar”, “Cəfər Cabbarlı”, “Nəriman Nərimanov”, “Neftçilər” stansiyalarında fəaliyyətdə olan “Kart Analiz” mərkəzlərinə, *4343 telefon nömrəsinə və ya www.bakikart.az veb səhifəsinə müraciət etmək mümkündür.