Bakı, 20 iyul, AZƏRTAC

İyulun 20-də Bakı Şəhər Baş Polis İdarəsində 2016-cı ilin birinci yarısının yekunlarına və qarşıda duran vəzifələrə həsr olunmuş geniş əməliyyat müşavirəsi keçirilib.

Qurumun mətbuat xidmətindən AZƏRTAC-a bildiriblər ki, müşavirəni giriş sözü ilə açan Baş İdarənin rəisi, polis general-mayoru Mirqafar Seyidov 2016-cı ilin ilk altı ayının da respublikamız üçün əlamətdar olduğunu qeyd edib. Azərbaycan Prezidenti İlham Əliyevin həyata keçirdiyi müdrik siyasət nəticəsində ölkəmizin uğurlu inkişafı davam edib, sosial-iqtisadi problemlər həllini tapıb. Bu uğurların əsasını təşkil edən ictimai-siyasi sabitliyin qorunmasında, ölkədə qanunçuluğun və ictimai asayişin təmini sahəsində Daxili işlər Nazirliyinin üzərinə qoyulmuş vəzifələr layiqincə yerinə yetirilib. DİN-in əsas strukturlarından biri olan Bakı Şəhər Baş Polis İdarəsi ölkənin qanunlarını, Nazirliyin Kollegiya qərarlarını, əmr və göstərişlərini rəhbər tutaraq qarşıda duran vəzifələrin icrasını davam etdirib, şəxsi heyətin məsuliyyət və tələbkarlığın artırılması üçün zəruri tədbirlər görülüb.

Sonra 2016-cı ilin birinci yarısının yekunlarının hərtərəfli təhlil edildiyi, nöqsan və çatışmazlıqların vurğulandığı geniş məruzə müşavirə iştirakçılarına təqdim olunub.

Bildirilib ki, hesabat dövründə paytaxtda Daxili İşlər Nazirliyi və prokurorluq üzrə 6644 (ötən il 6008) cinayət qeydə alınıb. Onların da 83,3 faizi (5536-sı) az ağır və böyük ictimai təhlükə törətməyən, 16,7 faizi isə (1108-i) ağır və xüsusilə ağır növlər olub. Ötən ilin eyni dövrü ilə müqayisədə qəsdən adam öldürmələr 16,2 faiz, adam öldürməyə cəhdlər 13,3 faiz azalıb.

Cinayətlərin 79,6 faizinin (2015-ci ildə 79,5 faiz), ağır növlərinin 80,7 faizinin (79,5 faiz), qeyri-aşkar şəraitdə baş verənlərin 69,2 faizinin (69,4 faiz) açılması təmin olunub. Şəxsiyyət əleyhinə olan 923 cinayətdən 96,3 faizi (93,5 faiz), o cümlədən qəsdən adam öldürmələrin 96,7 faizi (100 faiz), adam öldürməyə cəhdlərin 100 faizi (88,9 faiz) açılıb.

Məlumat verilib ki, ötən ilin eyni dövrü ilə nisbətdə ümumi cinayətlərin açılması 0,1 faiz, onların ağır və xüsusilə ağır növlərinin açılması 1,2 faiz, şəxsiyyət əleyhinə olanların açılması 2,8 faiz, o cümlədən adam öldürməyə cəhdlərin açılması 11,1 faiz, qəsdən sağlamlığa ağır zərər vurmaların açılması 7,9 faiz, zorlamaların açılması 20 faiz, mülkiyyət əleyhinə olan cinayətlərin açılması 0,8 faiz, o cümlədən dövlət və ya bələdiyyə əmlakı oğurluqlarının açılması 28 faiz, mənzillərdən edilən oğurluqların açılması 0,7 faiz, mal-qara oğurluğunun açılması 27,5 faiz, mənimsəmə və israf etmə cinayətlərinin açılması 22 faiz, soyğunçuluğun açılması 15,5 faiz, quldurluqların açılması 8,9 faiz, hədə-qorxu ilə tələb etmələrin açılması 1,8 faiz, xuliqanlıqların açılması 2,7 faiz yaxşılaşıb.

Cinayətlərin profilaktikasında və açılmasında müasir informasiya texnologiyalarının tətbiqinin böyük əhəmiyyəti olub. Baş İdarənin və ərazi polis orqanlarının “Təhlükəsiz Şəhər“” Xidmətinin operatorları tərəfindən 994 hadisə aşkarlanıb. Kameraların arxiv görüntülərindən istifadə edilməklə 278 bağlı cinayət açılıb.

Təqsirləndirilən şəxs qismində axtarışda olan 1055 nəfərdən 62,5 faizi (659-u), ağır və xüsusilə ağır cinayətlərə görə axtarılan 446 nəfərdən isə 47,1 faizi (210-u) tutulub. Bununla yanaşı, 44 soyğunçuluq və quldurluq cinayəti törətmiş 59 nəfərdən ibarət 38 qrup, eləcə də mənzillərdən 141 oğurluq törətmiş 75 nəfərdən ibarət 29 cinayətkar qrup ifşa olunub.

Hesabat dövründə 60 odlu silah, 4 qumbara, 1561 ədəd döyüş patronu yığılıb, əməliyyat yolu ilə qanunsuz saxlanılan və gəzdirilən 36 odlu silah götürülüb. Narkotiklərlə bağlı aşkar edilmiş 721 (840) fakt üzrə qanunsuz dövriyyədən 207 kiloqramdan çox (2015-ci ilin müvafiq dövründən 14 kq 596 qr çox) narkotik vasitə çıxarılıb.

Paytaxt ərazisində baş vermiş 284 (ötən il 312) yol-nəqliyyat hadisəsində 83 (111) nəfər həlak olub. Həmçinin 342 (414) nəfər müxtəlif dərəcəli bədən xəsarətləri alıb. Ötən ilin müvafiq dövrü ilə müqayisədə yol-nəqliyyat hadisələrinin sayı 9 faiz, həlak olanların sayı 25,2 faiz, xəsarət alanların sayı 17,4 faiz azalıb.

Mülkiyyət əleyhinə olan cinayətlərin, o cümlədən mənzillərdən edilən oğurluqların qarşısının alınmasında mühüm rol oynayan mühafizə-siqnalizasiya vasitələrin tətbiqi üzrə təbliğat işinə də diqqətlə yanaşılaraq 385 (ötən il 276) müvafiq müraciətdən 285-nin (ötən il 201) icrası təmin olunub.

Diqqətə çatdırılıb ki, paytaxtda ictimai asayişin mühafizəsi də ciddi nəzarətdə saxlanılıb, qanunsuz keçirilməsinə cəhd göstərilən aksiyaların qarşısı alınıb, şəhər miqyasında keçirilən çoxsaylı kütləvi tədbirlərdə, yüksək səviyyəli ali qonaqların gəlişi ilə bağlı keçirilən Formula-1 Avropa Qran-prisi kimi beynəlxalq tədbirlərdə ictimai asayişin mühafizəsi nümunəvi təmin olunub. İstintaq işlərinin və təhqiqatın aparılması, vətəndaşlara şəxsiyyət vəsiqələrinin verilməsi, onların ərizə və müraciətlərinə baxılması, habelə Bakının polis orqanlarının fəaliyyət dairəsinə aid digər sahələrdə də müəyyən işlər görülüb, qarşıya qoyulmuş vəzifələr bütövlükdə təmin edilib.

Sonra Bakı polisinin bir sıra xidmət və ərazi polis orqanlarının rəisləri məruzə ətrafında çıxış edib, mövcud nöqsan və çatışmazlıqlar xüsusi qeyd olunub, onların aradan qaldırılma yolları hərtərəfli müzakirə edilib.

Baş İdarənin rəisi Mirqafar Seyidov əməliyyat müşavirəsinə yekun vuraraq, Bakı polisinin 2016-cı ilin birinci yarısındakı xidməti fəaliyyətini ümumilikdə müsbət qiymətləndirib, nöqsan və çatışmazlıqların aradan qaldırılması istiqamətində tapşırıq və tövsiyələrini verib. M.Seyidov dövlət rəhbərliyinin paytaxtda əmin-amanlıq, təhlükəsizlik məsələlərinə xüsusi əhəmiyyət verdiyini və bu sahədə qarşıda duran vəzifələri müşavirə iştirakçılarının diqqətinə çatdırıb. Polis general-mayoru daxili işlər nazirini və ölkə rəhbərliyini əmin edib ki, Bakı polisi bundan sonra da paytaxtda cinayətkarlığa qarşı mübarizəni, ictimai asayişin təmini istiqamətində xidməti fəaliyyətini əzmlə davam etdirəcək, verilən göstərişləri, əmrləri layiqincə yerinə yetirəcək, paytaxtda qanunçuluğun və təhlükəsizliyin keşiyində ayıq-sayıq dayanacaq.