Bakı, 28 noyabr, AZƏRTAC

Noyabrın 28-də Xəzər rayonunun Binə qəsəbəsində keçirilən işgüzar forumda Bakı qəsəbələrində fəaliyyət göstərən 22 sahibkara 3,4 milyon manat güzəştli kredit verilib.

Kreditlər əsasən, quşçuluq, tərəvəzçilik, un məmulatları, qapı-pəncərə, mebel, üzlük daş istehsalı, müasir istixana kompleksinin yaradılması sahələrinin inkişafına yönəldiləcək. Bu kreditlərin reallaşdırılması hesabına 100-ə yaxın yeni iş yerinin açılması mümkün olacaq.

İqtisadiyyat və Sənaye Nazirliyinin mətbuat xidmətindən AZƏRTAC-a bildirilib ki, işgüzar forumda sahibkarlara güzəştli kreditlərin alınması mexanizmi barədə ətraflı məlumat verilib, Binəqədi rayonunda həyata keçirilməsi məqsədəuyğun hesab olunan nümunəvi layihələr təqdim olunub, sahibkar-müvəkkil kredit təşkilatı münasibətlərinin möhkəmləndirilməsi istiqamətində müzakirələr aparılıb, sahibkarların investisiya layihələri güzəştli qaydada maliyyələşdirilib.

Yetmişə yaxın sahibkarın iştirak etdiyi forum çərçivəsində Xəzər rayonunun iqtisadi potensialının reallaşdırılması məqsədilə prioritet hesab olunan ixtisaslaşdırılmış “yaşıl market”in, ət kəsimi müəssisəsinin, kiçik və ortahəcmli istixana və zeytunçuluq təsərrüfatlarının, plastik qapı-pəncərə və üzlük daş istehsalı müəssisələrinin yaradılması üzrə nümunəvi investisiya layihələrinin təqdimatı keçirilib. Tədbirdə kiçikhəcmli investisiya layihələrinin ümumi dəyərinin bütünlüklə dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanılıb.

Sahibkarlığa Kömək Milli Fondunun icraçı direktoru Şirzad Abdullayev qeyd edib ki, ümumilikdə, indiyədək paytaxt və onun qəsəbələrinin sosial-iqtisadi inkişafına dair Dövlət proqramları çərçivəsində Bakı qəsəbələrində sahibkarlıq subyektlərinin 949 investisiya layihəsinin maliyyələşdirilməsinə 205,9 milyon manat güzəştli kredit ayrılıb. Digər sahələrlə yanaşı, müasir texnologiyaların tətbiqinə əsaslanan çörək zavodlarının, istixana, quşçuluq təsərrüfatlarının, ət emalı, metal konstruksiya və digər sənaye müəssisələrinin yaradılması üzrə investisiya layihələri maliyyələşdirilib, 6 min 500-ə yaxın yeni iş yerinin açılması imkanı yaradılıb.

Ümumilikdə, 2014-cü ilin ötən dövrü ərzində respublika üzrə 5401 sahibkara 280 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 12 minə yaxın yeni iş yerinin yaradılmasına imkan verir. Həmçinin indiyədək bugünkü kreditlər də daxil olmaqla Xəzər rayonundan olan 255 sahibkara 53,6 milyon manat dövlətin güzəştli kreditləri ayrılıb.

İşgüzar forumda əsas diqqət sahibkarlarla müvəkkil kredit təşkilatları arasında işgüzar münasibətlərin qurulmasına yönəldilib. Tədbirdə çıxış edənlər forumun müvəkkil kredit təşkilatlarının sahibkarlarla daha intensiv işləməsində, potensial sahibkarların üzə çıxarılmasında və nəticədə daha çox kiçik və ortahəcmli layihələrin maliyyələşdirilməsində əhəmiyyətli olduğunu qeyd ediblər.

Sonra qəsəbədə güzəştli kreditlər hesabına inşa olunmuş müasir istixana kompleksinin fəaliyyətinə baxış keçirilib.