CƏMİYYƏT
“Bakı ürək günləri” Beynəlxalq Konqresinin işi seksiya iclaslarında davam edib YENİLƏNİB VİDEO
Bakı, 27 may, Günel Məlikova, AZƏRTAC
Xəbər verildiyi kimi, mayın 26-dan 28-dək “Gülüstan” sarayında “Bakı ürək günləri” V Beynəlxalq Konqresi keçirilir. Azərbaycan Ürək-Damar Cərrahiyyəsi Cəmiyyətinin təşkilatı dəstəyi ilə keçirilən tədbir ümummilli lider Heydər Əliyevin anadan olmasının 94-cü ildönümünə həsr edilib.
AZƏRTAC xəbər verir ki, dünyanın 15 ölkəsindən olan 400 nəfərə yaxın yerli və əcnəbi kardioloq və kardiocərrahların iştirak etdiyi beynəlxalq konqres bu gün öz işini seksiya iclaslarında davam etdirir.
Səhiyyə Nazirliyinin baş pediatrı, professor Nəsib Quliyev, mütəxəssislər Anar Əmrah, Elnur İmanov və Qalib İmanovun sədrliyi ilə keçirilən səhər iclası “Anadangəlmə ürək qüsurları” mövzusuna həsr edilib.
Bu sessiyada anadangəlmə ürək qüsurları və onların yaranma səbəbləri müzakirə edilib. Bildirilib ki, bu problemlər əsasən bətndaxili dövrdə qan dövranı sisteminin inkişaf pozğunluqları nəticəsində əmələ gəlir. Bildirilib ki, ürək bir orqan kimi bətndaxili həyatın 3-8 həftələrində formalaşır. Anadangəlmə qüsurun səbəbi ana tərəfindən hamiləliyin ilk üç ayı ərzində keçirilmiş kəskin respirator virus infeksiyaları, qrip, məxmərək, herpes və s. xəstəliklər, siqaret çəkmə, hamiləlik zamanı qadağa qoyulmuş dərmanların qəbulu, eləcə də irsi faktorlar ola bilər. Qeyd edilib ki, anadangəlmə ürək qüsurları müxtəlifdir, lakin bunların arasında daha geniş yayılmış formalarından qulaqcıqlar və ya mədəciklər arasındakı çəpərdə dəliklərdir. Ağır anadangəlmə ürək qüsuru olan uşaqlar inkişafda yaşıdlarından geri qalır, çox pis çəki artırır, tez-tez xəstələnir, tez yorulurlar. Onlarda təngnəfəslik, sianoz əmələ gəlir, dəri örtükləri avazımış olur. Anadangəlmə ürək qüsurunun müalicəsi əsasən cərrahi yolla həyata keçirilir, bəzi hallarda ağırlaşmamış qüsurları medikamentoz yolla da müalicə edilir.
Sonra tədbir “Ağ ciyər hipetenziyalı geniş VSD-lərdə qapaqlı yamaq istıfadəsi” (Abbas Əfrasiabi, İran), “Aortkoarktasiyasının cərrahi müalicəsinin xüsusiyyətləri” (Elnur Həsənov, Azərbaycan) və “Yenidoğulmuşlar və az yaşlı uşaqlarda koarktasiya və rekoarktasiyanın cərrahi və endovaskulyar müalicəsi” (Aleksey Kim, Rusiya) mövzusunda məruzələrlə davam etdirilib.
C.Abdullayev adına Elmi-Tədqiqat Kardiologiya İnstitutunun direktoru, professor Adil Baxşəliyev, Səhiyyə Nazirliyinin baş kardioloqu, professor Faiq Quliyev, mütəxəssislər Fazil Abbasov, Elman Ələkbərov və Abbasəli Abbasəliyevin sədrliyi, “Koronar1” mövzusunda keçirilən ikinci sessiyada erkən miokard infarktlar, müxtəlif ürək problemləri və onların yaranma səbəbləri müzakirə edilib.
Bildirilib ki, bir sıra ürək qüsurlarında olduğu kimi erkən miokardın da əsas səbəbləri kimi siqaret və piylənmə sayılır. Bundan əlavə ürək qüsurları zamanı müdaxilə növləri və müdaxilənin xüsusiyyətləri haqqında danışılıb. Qeyd edilib ki, hazırda 50 faiz gənclərdə müxtəlif ürək problemləri müşahidə olunur. Qohum evlilikləri səbəbi ilə hazırda gənclərdə ürək qüsurları daha çox görülməkdədir. Gənc və olduqca gənc insanlarda ürək qüsurları zamanı istifadə edilən cərrahi üsullar haqqında məlumat verilib. Bildirilib ki, bu xəstələrdə köçürülən toxumalardan asılı olmayaraq onlar yenidən infarkt riski ilə klinikalara müraciət edirlər. Təxmini 45 yaşlı xəstələr də var ki, onlara 5 dəfəyə qədər stend daxil edilib. Belə insanlara 50-55 yaşlarında artıq bir çox xəstəxanalar tərəfindən ürəkköçürmə əməliyyatı məsləhət görülür. Tədbirdə mitral qapaq çatışmazlığı, ciddi mitral qapaq çatızmazlığı və onun qaynaqları, eləcə də bu problemin aradan qaldırılması yollarının təkmilləşdirilməsi də müzakirə edilib.
Sessiya “İkincili mitral qapaq xəstəliyində cərrahi baxış” (professor Rəşad Mahmudov, Azərbaycan), “ Familial hiperxolesterinemiya. Aysberqin görünməyən üzü” (Firdovsi İbrahimov, Azərbaycan), “40 yaşın altında xəstələrdə miokard revaskulyarizasiyası” (Fuad Abdullayev, Azərbaycan) və “Aortokoronar şuntlama keçirmiş xəstələrdə perkutan müdaxilələr” (Eyvaz Abbasov, Azərbaycan ) mövzularında məruzələrlə davam etdirilib.
Sonra tədbir mövzular ətrafında müzakirələrlə davam etdirilib.