CƏMİYYƏT


Bakıda Azərbaycan travmatoloq və ortopedlərinin II qurultayı işə başlayıb VİDEO

A+ A

Bakı, 12 noyabr, Əziz Məmmədov, AZƏRTAC

Noyabrın 12-də Bakıda Azərbaycan travmatoloq və ortopedlərinin II qurultayı və Azərbaycan Elmi-Tədqiqat Travmatologiya və Ortopediya İnstitutunun (ETTOİ) 70 illik yubileyinə həsr edilmiş beynəlxalq elmi-praktiki konfrans işə başlayıb.

AZƏRTAC xəbər verir ki, tədbirdə ölkənin Gəncə, Sumqayıt, Naxçıvan və digər regionlarında çalışan 300-dən artıq mütəxəssis iştirak edir. İki gün davam edəcək beynəlxalq elmi-praktiki konfransda mütəxəssislərin travmatologiyanın və ortopediyanın aktual problemləri, travmatoloji-ortopedik yardımın təşkilinin müasir aspektləri, travmatologiya və ortopediyada innovasiya texnologiyaları (osteosintez, endoprotezləmə, artroskopiya və s.), dayaq-hərəkət sisteminin xəstəlikləri zamanı şüa diaqnostikası və başqa mövzulara aid məruzələri dinləniləcək.

Qurultayın açılışında Türkiyə, Ukrayna, Qazaxıstan, Özbəkistan, Rusiya, Almaniya və Qırğızıstanı təmsil edən 30-dan çox mütəxəssisin də iştirak etdiyi qurultayın açılış mərasimində Azərbaycan Respublikası Səhiyyə Nazirliyinin Tibbi Yardımın Təşkili Şöbəsinin müdiri Gülmirzə Poladov, Səhiyyə Nazirliyinin baş travmatoloqu, Azərbaycan Elmi-Tədqiqat Travmatologiya və Ortopediya İnstitutunun direktoru, tibb elmləri doktoru, professor Vaqif Verdiyev çıxış edib.

Qeyd edilib ki, Prezident İlham Əliyevin rəhbərliyi ilə ölkədə ən müasir tələblərə cavab verən səhiyyə infrastrukturunun yaradılması, yeni xəstəxanalar tikintisi, fəaliyyətdə olan tibb müəssisələrinin yenidən qurulması prosesi geniş vüsət alıb. Əhaliyə təqdim edilən tibbi xidmətlərin keyfiyyətinin artırılması üçün səhiyyənin ayrı-ayrı sahələrində dövlət proqramlarının rolu, son illərdə tibbi kadrların, o cümlədən travmatologiya və ortopediya üzrə mütəxəssislərin hazırlanması sahəsində ciddi uğurlar qazanılması vurğulanıb.

Vaqif Verdiyev qeyd edib ki, bu institutun yaradılmasının əsas məqsədlərindən biri Böyük Vətən müharibəsi əlillərinə ixtisaslaşdırılmış travmatoloji və ortopedik yardım göstərməkdən ibarət idi. 70 illik fəaliyyəti dövründə bu institut ölkəmizdə ortopediya və travmatologiyanın inkişafına, bütövlükdə dünya elminə sanballı töhfələr verib. ETTOİ direktoru daha sonra deyib: “1951-1959-cu illərdə institutun direktoru görkəmli ictimai və siyasi xadim, professor Əziz Əliyev olub. O dövrdə istər Bakıda, istərsə də regionlarda Böyük Vətən müharibəsi iştirakçılarının tibbi köməyə böyük ehtiyacı vardı. Belə bir vaxtda Əziz Əliyev müharibə əlillərinin müalicəsi və reabilitasiyası məsələləri üzrə səyyar elmi konfranslar keçirirdi. İnstitutda odlu yaraların cərrahi müalicəsi və onların fəsadlarının aradan qaldırılması məsələlərinə həsr edilmiş elmi tədqiqat işləri aparılırdı. 1952-ci ildə Zaqafqaziya və Şimali Qafqaz respublikalarının elmi-praktiki konfransının təşkil edilməsində Əziz Əliyevin böyük xidmətləri olub”.

Sonra Gülmirzə Poladov Elmi-Tədqiqat Travmatologiya və Ortopediya İnstitutunun bir sıra əməkdaşına “Səhiyyə əlaçısı” döş nişanları təqdim edib.

Nəsimi rayon icra hakimiyyətinin bacısı Asif Əsgərov öz çıxışında qeyd etdi ki, Azərbaycan Prezidentinin diqqəti və qayğısı sayəsində iqtisadiyyatda və sosial sahədə genişmiqyaslı tədbirlər həyata keçirilir. Səhiyyənin inkişafı bu sosial siyasətin uğurlu olmasını təsdiqləyən nümunələrdən biridir. Belə ki, dövlət başçısının təşəbbüsü ilə bu sahədə mühüm qanunvericilik aktları, dövlət proqramları və digər vacib sənədlər qəbul edilib. Bundan əlavə, son vaxtlar səhiyyə sisteminin idarə edilməsinin təkmilləşdirilməsinə, tibbi müəssisələrin maddi-texniki bazasının genişləndirilməsinə, yeni tibbi texnologiyaların tətbiqinə, əsaslı kadr islahatlarına yönəlmiş tədbirlər həyata keçirilir.

Tədbirdə çıxış edən xarici mütəxəssislər – Bişkek Elmi-Tədqiqat Travmatologiya və Ortopediya İnstitutunun (Qırğızıstan) direktoru, tibb elmləri doktoru, professor Sabirbek Cumabekov, Özbəkistan Elmi-Tədqiqat Travmatologiya və Ortopediya İnstitutunun direktoru, tibb elmləri doktoru, professor Mirhakim Əzizov, Qazaxıstan Elmi-Tədqiqat Travmatologiya və Ortopediya İnstitutunun direktoru, tibb elmləri doktoru, professor Nurlan Batpenov, “CeramTecAG” firmasının elmi işçisi Folker Atsrodt (Almaniya) və digər qonaqlar azərbaycanlı həmkarlarını təbrik etdilər.

Sonra Azərbaycan Elmi-Tədqiqat Travmatologiya və Ortopediya İnstitutunun tarixindən və fəaliyyətindən bəhs edən sənədli film göstərildi.

Tədbirdə Azərbaycan və xarici ölkə mütəxəssislərinin “Qazaxıstan Respublikasında çanaq-bud oynağının endoprotezlənməsi” (N.Batpenov, K.Ostapov, Q.Caksıbelova - Qazaxıstan), “Çanaq-bud oynaqlarının posttravmatik deformasiyaedici osteoartrozu” (C.Cumabekov, B.Kalçayev – Qırğızıstan), “Çanaq-bud oynağının endoprotezlərində sürtünmə cütlüyünün rolu” (Folker Atsrodt – Almaniya), “Çanaq-bud oynağının endoprotezləməsindən sonra təftiş əməliyyatları aparılması təcrübəmiz” (M.Əzizov, V.Proxorenko, X.Şakirov – Özbəkistan), “Boyun diskektomaiyası zamanı əlavə fiksəedici avadanlığın xarakteristikası və tətbiqi” (S.Etibarlı, İ.Qarayev, E.Novruzov – Azərbaycan) və başqa məruzələr dinlənilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.