Bakı, 19 oktyabr, Elvin Camalov, AZƏRTAC

Oktyabrın 19-da Bakı Ekspo Mərkəzində Xəzəryanı regionun tikinti sahəsində ən böyük tədbiri - XXII Azərbaycan Beynəlxalq İnşaat “BakuBuild 2016” sərgisi, IX Beynəlxalq İstilik, Havalandırma və Kondisiyalaşdırma sistemləri, Su təchizatı, Sanitariya, Ətraf mühitin mühafizəsi texnologiyaları, Üzgüçülük hovuzu və Bərpa olunan enerji “Aquatherm Baku 2016” və regionda təhlükəsizlik üzrə yeganə tədbir sayılan IX Xəzər Beynəlxalq Mühafizə, Təhlükəsizlik və Xilasetmə vasitələri “Securika CIPS 2016” sərgilərinin açılışı olub.

AZƏRTAC xəbər verir ki, sərgilərin açılış mərasimində iqtisadiyyat nazirinin müavini Niyazi Səfərov bildirib ki, son illər qeyri-neft sektorunun inkişaf etdirilməsi ilə yanaşı inşaat-tikinti sektoru da inkişaf edib. Eyni zamanda bu sahə ilə məşğul olan sahibkarlar üçün də münbit şərait yaradılıb.

Keçirilən beynəlxalq sərginin əhəmiyyətindən bəhs edən nazir müavini bu sərginin bir çox şirkətlərə əməkdaşlıq əlaqələri qurmaq üçün imkanlar yaratdığını, tikinti sektorunun inkişafına təkan olduğunu qeyd edib.

Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov sərgiyə yeni qoşulan şirkətləri aktiv olmağa, sərginin verdiyi imkanlardan yararlanmağa çağırıb.

O bildirib ki, dövlət başçısı İlham Əliyevin ardıcıl fəaliyyəti nəticəsində Azərbaycanın işğalda olan torpaqlarının azad olunması üçün böyük ümidlər yaranıb. Qarşıdakı illərdə Azərbaycanın işğaldan azad olunacaq torpaqlarının bərpası istiqamətində inşaatçıları böyük işlər gözləyir.

E.Əsədov qeyd edib ki, Prezident İlham Əliyevin də qeyd etdiyi kimi, dünya iqtisadi böhranına baxmayaraq, Azərbaycanda sosial sahələrdə dövlət investisiyaları azaldılmayacaq. Bunları nəzərə alaraq, Azərbaycanda qarşıdakı illərdə tikinti sektorunu böyük inkişaf gözləyir. Buna görə də yerli və xarici şirkətləri gələcək işlərə indidən hazırlaşmağı tövsiyə edirəm. “Məsələ burasındadır ki, sosial yaşayışın, infrastrukturun yaradılması, sosial evlərin tikilməsi böyük iqtisadi məsələdir və əsasən sosial məqsədlərə yönəldiyindən daha ucuz inşaat materialları və texnologiyalarından istifadə etmək tələb olunur”, - deyə E.Əsədov vurğulayıb.

E.Əsədov, həmçinin bildirib ki, statistikaya görə bu gün Azərbaycanda istifadə olunan tikinti materiallarının əksəriyyəti xarici ölkələrdən daxil olur: “Bunlar əsasən üzlük materialları, daxili bəzək işlərində istifadə olunan materiallar, kirəmit, izolyasiya materialları və sairdir. Lakin yerli, ucuz və keyfiyyətli inşaat materialları və məmulatları olmadan Azərbaycanın tikinti sektorunun gələcək inkişafını təmin etmək o qədər də asan deyil”.

“İTE Group” şirkətinin direktoru Edvard Stoun builki sərgidə 26 ölkəni təmsil edən 298 şirkətin iştirak etdiyini söyləyib.

“İtaliya, İran və BƏƏ sərgidə öz milli pavilyonları ilə təmsil olunur. Həmçinin tədbirdə fransız şirkətləri kollektiv stendlə, Türkiyəni təmsil edən istehsalçılar isə böyük qrup şəklində iştirak edirlər. Azərbaycan şirkətləri isə sərgi eksponentlərinin 50 faizini təşkil edir ki, bu da çox sevindirici haldır. “BakuBuild 2016” sərgisinin sponsoru qismində “Corella” markası (NB Group şirkəti) və “Akkord Cement” şirkəti, informasiya tərəfdaşı qismində isə “Dom i İnteryer” (Ev və İnteryer) çıxış edir”, - deyə E.Stoun vurğulayıb.

E.Stoun qeyd edib ki, ənənəvi olaraq, “BakuBuild 2016” sərgisində keramika, üzlük daşlar, mərmər, lak-boya materialları, qapı-pəncərə, interyer, dam və döşəmə örtükləri, metal və bürünc məmulatlar, eləcə də inşaat texnikası kimi tikinti materiallarının bütün çeşidi təqdim olunur. Bakı Ekspo Mərkəzinin qarşısındakı xarici platformada isə ən yeni inşaat texnikası nümayiş olunur.

Şirkət direktorunun sözlərinə görə, builki sərginin fərqləndirici cəhəti Azərbaycan, İtaliya, Ukrayna və digər ölkələri təmsil edən mebel şirkətlərinin fəal iştirakıdır. Bu şirkətlər sərgidə elit mebellərin geniş çeşidini nümayiş etdirir.

Qeyd edək ki, “BakuBuild” sərgisi inşaat sahəsində innovativ məhsul və xidmətlərin ölkə bazarına daxil olması üçün istifadə olunan daimi kanallardan biridir. Azərbaycanda keçirilən bu sərginin iştirakçıları Bakıya həmişə eksklüziv məhsullar gətirməyə çalışır və bu məhsullar daha sonra sifarişçilərə, eləcə də digər ölkələrə çatdırılır. Bu baxımdan, “BakuBuild 2016” sərgisi də istisna deyil, belə ki, bu il bir sıra şirkətlər öz stendlərində yeni məhsullar təqdim edirlər. Bu yeniliklər, eləcə də digər məhsul və xidmətlərlə inşaat, memarlıq, dizayn və dekorasiya sənayesindəki alıcı və təchizatçıları bir araya gətirən “WorldBuild365” platformasının veb-saytında (www.worldbuild365.com) tanış olmaq mümkündür. “WorldBuild365” portalı özündə məhsulların “onlayn” kataloqu və ixtisaslaşdırılmış platforma funksiyalarını birləşdirməklə yanaşı, veb-sayt ziyarətçilərinin geniş məhsul kataloqunu təkcə sərgi dövründə deyil, həm də bütün il boyu nəzərdən keçirmələrinə, təchizatçıların isə öz məhsulları haqqında məlumatı istədikləri vaxt yükləyərək yeniləmələrinə imkan verir. Bu veb-sayta aşağıdakı link vasitəsilə daxil olmaq mümkündür: www.worldbuild365.com “WorldBuild365” platforması alıcılarla əlaqələri və mövcud kommersiya münasibətlərini dəstəkləməklə yanaşı, şəxsi görüşlər, eləcə də sərgi barədə təəssüratlar əsasında yeni əlaqələrin qurulmasına kömək edir.