İDMAN
Bakıda Çempionlar Liqası yarışlarının “Dördlər finalı”nın oyunları gərgin idman mübarizəsi şəraitində keçəcəkdir [YENİLƏNİB] VİDEO
Bakı, 14 mart (AZƏRTAC, Səxavət Quliyev). Martın 14-də “Park İNN” mehmanxanasında Bakıda qadın voleybol komandaları arasında Çempionlar Liqası yarışlarının “Dördlər finalı”nın başlanmasına həsr olunmuş mətbuat konfransı keçirilmişdir.
AZƏRTAC xəbər verir ki, “Dördlər finalı”nda Bakının “Rabitə”, Türkiyənin “Vakıfbank” və “Eczaçıbaşı”, Rusiyanın “Dinamo” (Kazan) komandaları birincilik uğrunda mübarizə aparacaqlar.
Mərasimdə çıxış edən Avropa Voleybol Konfederasiyasının mətbuat üzrə nümayəndəsi Nikolay Markov turnirə hazırlığın yüksək səviyyədə təşkil olduğunu diqqətə çatdırmışdır. Bildirmişdir ki, iştirakçı komandaların bu mötəbər yarışa vəsiqə qazanmaları onların gücündən xəbər verir. “Dördlər finalı”nda ilk oyun martın 15-də “Vakıfbank” komandası ilə “Eczaçıbaşı” arasında keçiriləcəkdir. Növbəti oyunda isə “Rabitə” kollektivi “Dinamo”nu qəbul edəcəkdir.
Ölkəmizin “Dördlər finalı”na yüksək səviyyədə ev sahibliyi edəcəyini diqqətə çatdıran natiq oyunların gərgin idman mübarizəsi şəraitində keçəcəyinə əminliyini bildirmişdir.
Türkiyənin “Vakıfbank” komandasının baş məşqçisi Ciovanni Qudetti yüksək təşkilatçılığa və qonaqpərvərliyə görə minnətdarlığını bildirmişdir. Qeyd etmişdir ki, hazırda əsas diqqəti ilk oyuna yönəltmişik. Rəqibimiz bizə çox tanışdır. Əsas hədəfimiz ilk oyunda qələbə qazanmaqdır. Finalda kiminlə qarşılaşacağımız bizim üçün o qədər də önəmli deyildir. Məqsədimiz “Eczaçıbaşı” komandasını məğlub edərək həlledici mərhələyə yüksəlməkdir. Bakıya 14 oyunçu ilə gəlmişik və heyətdə zədəli voleybolçu yoxdur.
Komandanın kapitanı Gözde Sonsırma Bakıya yüksək əhval-ruhiyyə ilə gəldiklərini vurğulamışdır. Bildirmişdir ki, paytaxtınızda bizi sevənlər çoxdur. Ümid edirəm ki, azarkeşlərimiz burada bizi dəstəkləyəcəklər. Çox istərdik ki, ötən ilki uğurumuzu təkrarlayaq.
Heyətdə ciddi dəyişikliyin olmadığını diqqətə çatdıran kapitan hədəflərinin kuboku qazanmaq olduğunu demişdir. Bildirmişdir ki, rəqiblə ölkə çempionatında dəfələrlə qarşılaşmışıq. Hər iki komanda da rəqibinin oyununa bəllidir. Martın 15-də keçiriləcək ilk oyunda inamlı mübarizə aparan komanda finala vəsiqə qazanacaqdır. İstərdim ki, bu komanda məhz “Vakıfbank” olsun.
“Eczaçıbaşı” kollektivinin baş məşqçisi Lorenzo Miçelli dörd ildir komandaya rəhbərlik etdiyini və ölkəmizə böyük həyəcanla gəldiklərini bildirmişdir. Qeyd etmişdir ki, rəqibin potensialına bələdik. Bizi çox gərgin matç gözləyir. Ancaq biz də kuboka iddialı komandayıq. Qrup mərhələsi və pley-off-da çətin oyunlarda qələbə qazanaraq “Dördlər finalı”na yüksəlmişik. Bu da bizim asan rəqib olmadığımıza sübutdur.
Bir müddət əvvəl Avropada İtaliya voleybolunun hökmran olduğunu diqqətə çatdıran L.Miçelli ardıcıl olaraq 31 il bu ölkənin təmsilçilərinin “Dördlər finalı”na vəsiqə qazandıqlarını qeyd etmişdir. Bildirmişdir ki, cari ildə bu mötəbər yarışda İtaliya komandası yoxdur. Artıq Avropada yeni voleybol ölkələri formalaşır. Bunlar Azərbaycan, Türkiyə və digərləridir.
Komandanın kapitanı Esra Gümüş Kırıcı Bakıda olmağından məmnunluğunu ifadə etmiş və final mərhələsində mübarizə aparmalarından məmnun olduğunu qeyd etmişdir. Demişdir ki, “Vakıfbank”a qarşı bizi çətin oyun gözləyir. Rəqibimiz ötən mövsümün qalibidir. Heyətdə güclü voleybolçular yer almışdır.
Rusiyanın “Dinamo” (Kazan) komandasının baş məşqçisi Rişat Qilyazutdinov əsas məqsədlərinin qalib gəlmək olduğunu bildirmişdir. Vurğulamışdır ki, ilk oyunumuz çətin olacaqdır. Ev sahibinə qarşı oyunda güclü azarkeş təzyiqinin olacağını bilirik. Amma buna hazırıq.
Komandanın kapitanı Mariya Borodakova Bakının gündən-günə inkişaf etdiyini diqqətə çatdırmışdır. Bildirmişdir ki, yarışın “Baku Crystal Hall”da keçirilməsi möhtəşəmdir. Bilirəm ki, “Eurovision-2012” mahnı müsabiqəsi məhz bu arenada keçirilmişdir. Bu gün bu möhtəşəm arenada ilk məşqimizə çıxacağıq. İnanıram ki, hər şey yaxşı olacaqdır.
Bakının “Rabitə” komandasının baş məşqçisi Eldar Yusubov demişdir: “Qarşıdakı günlərdə Bakıda voleybol bayramı olacaqdır. Hər dörd komanda Avropanın güclüsü və iddialıdır. Oyunlar gərgin idman mübarizəsi şəraitində keçəcəkdir. Çox istərdim ki, kubok Azərbaycanda qalsın. Martın 15-də qalib gələn komandalar finala çıxacaqlar. Həlledici matçdakı rəqibin fərqi yoxdur”.
“Rabitə”nin kapitanı Sanya Staroviç bildirmişdir ki, yarışa yaxşı hazırlaşmışıq. Doğma meydanda oynadığımız məsuliyyətimizi iki qat artırır. Lakin inanıram ki, kuboku qazanıb azarkeşlərimizə və Azərbaycan xalqına hədiyyə edəcəyik.
x x x
13:02
Rusiyanın “Dinamo” (Kazan) komandasının baş məşqçisi Rişat Qilyazutdinov əsas məqsədlərinin qalib gəlmək olduğunu bildirmişdir. Vurğulamışdır ki, ilk oyunumuz çətin olacaqdır. Ev sahibi komandaya qarşı oyunda güclü azarkeş təzyiqinin olacağını bilirik. Amma buna hazırıq.
Komandanın kapitanı Mariya Borodakova Bakının gündən-günə inkişaf etdiyini diqqətə çatdırmışdır. Bildirmişdir ki, yarışın “Baku Crystal Hall”da keçirilməsi möhtəşəmdir. Bilirəm ki, “Eurovision-2012” mahnı müsabiqəsi məhz bu arenada keçirilmişdir. Bu gün bu möhtəşəm arenada ilk məşqimizə çıxacağıq. İnanıram ki, hər şey yaxşı olacaqdır.
X X X
12:55
Türkiyənin “Vakıfbank” komandasının baş məşqçisi Ciovanni Qudetti yüksək təşkilatçılığa və qonaqpərvərliyə görə minnətdarlığını bildirmişdir. Qeyd etmişdir ki, hazırda fikrimiz ilk oyundadır. Rəqibimiz bizə çox tanışdır. Əsas hədəfimiz ilk oyunda qələbə qazanmaqdır.
Komandanın kapitanı Gözde Sonsırma Bakıya yüksək əhval-ruhiyyə ilə gəldiklərini vurğulamışdır. Bildirmişdir ki, paytaxtınızda bizi sevənlər çoxdur. Ümid edirəm ki, azarkeşlərimiz burada bizi dəstəkləyəcəklər. Çox istərdik ki, ötən ilki uğurumuzu təkrarlayaq.
X X X
12:36
Martın 14-də Bakıda qadın voleybol komandaları arasında Çempionlar Liqası yarışlarının “Dördlər finalı”na həsr olunmuş mətbuat konfransı başlamışdır.
AZƏRTAC xəbər verir ki, “Dördlər finalı”nda Bakının “Rabitə”, Türkiyənin “Vakıfbank” və “Eczaşıbaşı”, Rusiyanın “Dinamo” (Kazan) komandaları birincilik uğrunda mübarizə aparacaqlar.
Mərasimdə çıxış edən Avropa Voleybol Konfederasiyasının mətbuat üzrə nümayəndəsi Nikolay Markov turnirə hazırlığın yüksək səviyyədə təşkil olduğunu diqqətə çatdırmışdır. Bildirmişdir ki, komandaların bu mötəbər yarışa vəsiqə qazanması onların gücündən xəbər verir. “Dördlər finalı”nda ilk oyun martın 15-də “Vakıfbank” komandası ilə “Eczaçıbaşı” arasında keçiriləcəkdir. Növbəti oyunda isə “Rabitə” kollektivi “Dinamo”nu qəbul edəcəkdir.
Ölkəmizin “Dördlər finalı”na yüksək səviyyədə ev sahibliyi edəcəyini diqqətə çatdıran natiq oyunların gərgin idman mübarizəsi şəraitində keçəcəyinə əminliyini ifadə etmişdir.