İQTİSADİYYAT
Bakıda “Eko–Sahil” Beynəlxalq Memarlıq Festivalı keçirilir
Bakı, 22 sentyabr, AZƏRTAC
Sentyabrın 22-də Bakıda Azərbaycan Memarlar İttifaqının və Moskva Memarlar İttifaqının təşkilatçılığı ilə “Eko–Sahil” Beynəlxalq Memarlıq Festivalının açılış mərasimi keçirilib.
AZƏRTAC xəbər verir ki, mərasimdə çıxış edən Azərbaycan Memarlar İttifaqının idarə heyətinin sədri Elbay Qasımzadə festivalla bağlı məlumat verib.
Bildirib ki, festival çərçivəsində “Bakı şəhərinin sahilyanı dəniz sənaye zonasının ictimai məkanlar üçün regenerasiyası” mövzusunda açıq memarlıq-şəhərsalma müsabiqəsi, “Bakının sahilboyu ərazilərinin problemləri və inkişaf perspektivləri” mövzusunda elmi konfrans, tematik sərgilər, seminarlar, ustad dərsləri və s. keçiriləcək.
E.Qasımzadə diqqətə çatdırıb ki, Azərbaycanın, eləcə də Bakı şəhərinin şəhərsalma və memarlıq simasının dəyişməsi və sağlamlaşdırılması üçün Prezident İlham Əliyev tərəfindən mühüm tədbirlər həyata keçirilir. Bu çərçivədə paytaxtın keçmiş istehsalat zonası - sahilboyunun (Qaraşəhər adlandırılan ərazi) təmizlənməsi, müəssisələrdən azad olması və həmin ərazidə şəhər əhalisinin istirahəti üçün yüksək səviyyədə şərait yaradılması qarşıya məqsəd qoyulub. Bununla əlaqədar Azərbaycan Memarlar İttifaqı Moskva Memarlar İttifaqı ilə birgə beynəlxalq müsabiqə elan edib. Bu müsabiqədə 18 ölkənin nümayəndəsinin 50-dən çox layihəsi nümayiş olunur. Bunlar həm memarlıq, həm də planlaşdırma cəhətdən bir-birindən fərqli layihələrdir.
Festivalda təqdim olunan layihələr münsiflər heyəti tərəfindən qiymətləndiriləcək və bu layihələrdən 4-ü seçiləcək.
E.Qasımzadənin sözlərinə görə, burada təqdim olunan bütün layihələrdən mütəxəssislərimiz bəhrələnə biləcək, müasir düşüncə və maraqlı təkliflərdən öz layihələrində istifadə etmək imkanı qazanacaqlar.
Moskva Arxitektura İttifaqının sədri Nikolay Şumakov Bakıda keçirilən beynəlxalq memarlıq festivalını paytaxtın ictimai həyatında mühüm hadisə adlandırıb. Bildirib ki, Bakının sahilboyu ərazisinin təmizlənməsi və eyni zamanda sağlamlaşdırılaraq əhalinin istifadəsinə verilməsi istiqamətində görülən tədbirlər təqdirəlayiqdir. Festivalda iştirak edən memarlar da bu müsabiqəyə qatılmaqla öz yeni ideya və təfəkkürlərini ortaya qoyaraq, şəhərin daha da gözəlləşməsinə layiqli töhfə verəcəklər.
Moskvalı memarın fikrincə, 17 ölkə nümayəndəsinin Bakıya gəlməsi heç də təsadüfi deyil. Azərbaycan paytaxtı həmçinin dünya memarlarını öz çoxsaylı tarixi- memarlıq abidələri və müasir tikililəri ilə də heyran qoyur.
Nikolay Şumakov bu festivalın yalnız memarların deyil, eləcə də Bakı şəhərinin bayramı olduğunu vurğulayıb.
Mədəniyyət və turizm nazirinin birinci müavini Vaqif Əliyev deyib ki, Bakının sahilboyu ərazisinin təmizlənməsi daim aktual problemlərdən biri olub və onun yeni, müasir görkəmə salınması böyük əhəmiyyətə malikdir. Çünki bununla dəniz sahilindən səmərəli istifadə, ekologiyanın qorunması və digər məsələlər öz həllini tapır. V.Əliyev festival iştirakçılarına yaradıcılıq uğurları arzulayıb.
Ekologiya və təbii sərvətlər nazirinin müavini Novruz Quliyev dinamik inkişaf edən ölkəmizdə belə festivalların keçirilməsini əslində təbii hal kimi qiymətləndirib. Bildirib ki, Xəzər dənizinin ekologiyasının, ətraf mühitinin yaxşılaşdırılması dövlətin prioritet vəzifələrindən biridir. Son zamanlar dənizə axıdılan tullantıların qarşısının alınması sahəsində böyük işlər görülüb. Kanalizasiya sistemləri müasirləşdirilib və çirkli sular təmizlənərək, dənizə axıdılıb. Bakı buxtası ərazisində yerləşən müəssisələr şəhər kənarına köçürülüb. Ekologiya və Təbii Sərvətlər Nazirliyi daim bu işlərə nəzarət edir.
Tədbirdə çıxış edən Dövlət Şəhərsalma və Arxitektura Komitəsinin sədri Abbas Ələsgərov, Azərbaycan Dövlət Memarlıq və İnşaat Universitetinin rektoru Gülçöhrə Məmmədova və digərləri Xəzərin sahilboyunun abadlaşdırılması və sağlamlaşdırılması sahəsində görülən tədbirlərin əhəmiyyətini yüksək dəyərləndiriblər.
Sonda festival iştirakçıları memarların işlərindən ibarət sərgi ilə tanış olublar.