İQTİSADİYYAT
Bakıda INTOSAI-ın Dövlət Satınalma müqavilələrinin auditi üzrə Xüsusi Qrupunun III Toplantısı keçirilir VİDEO
Bakı, 23 iyun, Nihad Budaqov, AZƏRTAC
İyunun 23-də Bakıda Azərbaycan Respublikası Hesablama Palatasının ev sahibliyi ilə INTOSAI-ın Dövlət Satınalma müqavilələrinin auditi üzrə Xüsusi Qrupunun III Toplantısı keçirilir.
AZƏRTAC xəbər verir ki, toplantıda Rusiya, Belarus, Qırğızıstan, Çin, Latviya, Portuqaliya, Sloveniya və Zambiya Ali Audit Qurumlarının nümayəndələri iştirak edirlər.
Səkkiz ölkədən 14 nümayəndənin iştirak etdiyi toplantıda Hesablama Palatasının sədri Vüqar Gülməmmədov Azərbaycanın Hesablama Palatasının INTOSAI-ın Dövlət Satınalmaları müqavilələrinin auditi üzrə Xüsusi Qrupunun III Toplantısına ev sahibliyi etməkdən məmnun olduğunu bildirib. Qeyd edib ki, Dövlət Satınalma müqavilələrinin auditi üzrə Xüsusi Qrupun bugünkü toplantısının iştirakçı ölkələrin Ali Audit Qurumları kimi, Azərbaycan Respublikası Hesablama Palatası üçün də çox böyük əhəmiyyəti var. Xüsusi Qrupun əsas strateji məqsədi satınalma müqavilələrinin səmərəliliyinin və nəticəliliyinin qiymətləndirilməsində Ali Audit Qurumlara köməklik göstərmək, o cümlədən satınalma müqavilələrinin auditi ilə bağlı ümumi qəbul edilmiş yanaşma və prosedurların təkmilləşdirilməsi və bu sahə üzrə beynəlxalq təcrübənin və metodologiyanın öyrənilməsi, beynəlxalq standartların və qaydaların hazırlanmasıdır.
“Palatanın dövlət büdcəsinin xərcləri üzrə həyata keçirdiyi nəzarət tədbirlərinin nəticələrinə əsasən müəyyən edilib ki, dövlət satınalmaların həyata keçirilməsində yol verilmiş nöqsanlar digərlərinə nisbətən xüsusi çəkiyə malikdir. Bu istiqamətdə buraxılmış nöqsanlara demək olar ki, audit keçirilmiş bütün qurumlarda rast gəlmək mümkündür”, - deyə V.Gülməmmədov qeyd edib.
O bildirib ki, satınalma prosedurlarına dövlət nəzarətinin gücləndirilməsi, nəzarət mexanizmlərinin təkmilləşdirilməsi və bu sahədə şəffaflığın artırılması məqsədilə satınalma sahəsini tənzimləyən qanunvericilik aktlarında və normativ-metodiki sənədlərdəki boşluqların və ziddiyyətlərin aradan qaldırılması üçün Hesablama Palatası tərəfindən hökumətə və Milli Məclisə mütəmadi olaraq tövsiyələr təqdim edilir. Hazırda Azərbaycanda dövlət satınalmaları sahəsində qanunvericilik bazasının gücləndirilməsi prosesi gedir. Bu sahədə dövlət siyasətini həyata keçirən mərkəzi icra hakimiyyəti orqanında dəyişiklik olub. Yeni qurum tərəfindən bu sahədə intizamın gücləndirilməsi işlərinə başlanılıb.
“Hesab edirik ki, qanunvericilik bazasının gücləndirilməsi və məsuliyyətin artırılması ilə bağlı atılan addımlar satınalmaların səmərəliliyinin artmasına xidmət edəcək. Xüsusi Qrupun işləyib hazırlayacağı sənədlər beynəlxalq miqyasda auditorların fəaliyyətində dövlət ehtiyacları üçün malların, iş və xidmətlərin satınalınmasının planlaşdırılmasının əsaslılığı üzrə, eyni zamanda, dövlət satınalmalarının həyata keçirilməsinin reallığı və səmərəliliyinin qiymətləndirilməsi məsələləri üzrə auditin keçirilməsinə birgə yanaşmanı təmin edəcək. Ümid edirəm ki, toplantı iştirakçıları satınalma müqavilələrinin auditi üzrə universal terminologiyanın, dövlət satınalmalarının auditinin keçirilməsi üzrə milli xüsusiyyətlər nəzərə alınmaqla və əsas risk sferası müəyyən edilməklə əməli yol göstəricisinin hazırlanması və təsdiq olunmasına, eləcə də, daimi informasiya-kommunikasiya mübadiləsinin təşkilinə nail olacaqlar”, - deyə Hesablama Palatasının sədri əlavə edib.
Toplantıda Rusiya Hesablama Palatasının şöbə müdiri Natalya Boçarova Xüsusi Qrupun 2014-cü ildə bu ölkədə keçirilmiş II Toplantısından ötən dövrdə fəaliyyətinə dair hesabatının təqdimatını keçirib.
Yığıncaqda Azərbaycan Respublikası Hesablama Palatasının əməkdaşı Nəzər Nəsibovun “Dövlət satınalmaları: Hesablama Palatasının rolu və əhəmiyyəti” mövzusunda təqdimatı, Portuqaliya və Zambiya Ali Audit Qurumlarının nümayəndələrinin Xüsusi Qrupun üzv ölkələrində satınalma müqavilələrinin auditi ilə əlaqədar pilot layihələrə dair hesabatları dinlənilib, pilot layihələrin nəticələri və dövlət satınalma müqavilələrinin auditi sahəsində beynəlxalq təşəbbüslər və qabaqcıl təcrübələrə dair monitorinqin nəticələri müzakirə edilib. Toplantının gedişində Xüsusi Qrupa üzv ölkələrdə dövlət satınalma müqavilələrinin auditinin keçirilməsinə dair mövcud təcrübə və metodologiya nəzərə alınmaqla tərtib olunan Təlimatın layihəsi müzakirə edilib. İştirakçılar qonaqpərvər ev sahibliyi və yaradılmış işgüzar şərait üçün Azərbaycan Respublikası Hesablama Palatasına minnətdarlıqlarını ifadə ediblər.
Toplantı öz işini iyunun 24-də davam etdirəcək.
Qeyd edək ki, INTOSAI-ın Satınalma Müqavilələrinin Auditi üzrə Xüsusi Qrupu Rusiya Hesablama Palatası və ABŞ Cavabdehlik Ofisinin birgə təşəbbüsü ilə yaradılıb. Bu təşəbbüs INTOSAI-ın 2013-cü ildə Çində keçirilmiş XXI Konqresində və İdarə Heyətinin 64-cü toplantısında bütün üzv Ali Audit Qurumlar tərəfindən dəstəklənərək qəbul edilib. Xüsusi Qrupa Rusiya Hesablama Palatası sədrlik edir. Azərbaycan Respublikası Hesablama Palatası ilə birlikdə 12 ölkənin Ali Audit Qurumu İşçi Qrupunun üzvüdür.
INTOSAI-ın Satınalma Müqavilələrinin Auditi üzrə Xüsusi Qrupunun ilk toplantısı 2014-cü il iyunun 25-də, ikinci toplantısı isə 2015-ci il iyunun 24-25-də Moskvada keçirilib. Xüsusi Qrupun Rusiyada keçirilmiş və Azərbaycan Respublikası Hesablama Palatası nümayəndələrinin də iştirak etdiyi sonuncu toplantısında növbəti - III toplantının Bakıda keçirilməsi qərara alınıb.
Xüsusi Qrupun 2014-cü ildə keçirilmiş ilk toplantısında onun 2014-2016-cı illər üzrə İşçi Planı qəbul edilib. Xüsusi Qrupun əsas strateji məqsədi satınalma müqavilələrinin səmərəliliyinin və nəticəliliyinin qiymətləndirilməsində Ali Audit Qurumlarına köməklik göstərmək, o cümlədən satınalma müqavilələrinin auditi ilə bağlı ümumi qəbul edilmiş yanaşma və prosedurların təkmilləşdirilməsi və bu sahə üzrə beynəlxalq təcrübənin və metodologiyanın öyrənilməsi, beynəlxalq standartların və qaydaların hazırlanmasıdır.
Satınalma prosedurlarına dövlət nəzarətinin gücləndirilməsi, nəzarət mexanizmlərinin təkmilləşdirilməsi və bu sahədə şəffaflığın artırılması məqsədilə satınalma sahəsini tənzimləyən qanunvericilik aktlarında və normativ-metodiki sənədlərdəki boşluqların və ziddiyyətlərin aradan qaldırılması üçün son illər ərzində Hesablama Palatası tərəfindən hökumətə və Milli Məclisə mütəmadi olaraq tövsiyələr təqdim edilir. Bununla yanaşı, satınalmalar sahəsində fəaliyyətinin mühüm bir istiqaməti kimi beynəlxalq maliyyə-kredit institutları ilə əməkdaşlıq çərçivəsində Dünya Bankı ilə əldə edilmiş qarşılıqlı razılığa əsasən Hesablama Palatasının və Dünya Bankının əməkdaşları bankın ölkəmizdə həyata keçirdiyi kredit layihələrinin satınalmaları üzrə birgə nəzarət tədbiri həyata keçirib və Palatanın əməkdaşları üç istiqamət üzrə Dünya Bankının müvafiq sertifikatlarını alıblar.