İQTİSADİYYAT
Bakıda IX “Aquatherm Baku 2016” sərgisi 60 şirkəti bir araya toplayacaq
Bakı, 17 oktyabr, AZƏRTAC
Oktyabrın 19-da Bakı Ekspo Mərkəzində IX Beynəlxalq İstilik, Havalandırma və Kondisiyalaşdırma sistemləri, Su təchizatı, Sanitariya, Ətraf mühitin mühafizəsi texnologiyaları, Üzgüçülük hovuzu və Bərpa olunan enerji “Aquatherm Baku 2016” sərgisi keçiriləcək.
“İteca Caspian” şirkətindən AZƏRTAC-a bildirilib ki, bu illər ərzində sərgi özünü istilik, havalandırma və havanın kondisiyalaşdırması (“HVAC”) üzrə peşəkarların görüşü, yeni tərəfdaş axtarışı və sərfəli müqavilələrin bağlanması, eləcə də həm Xəzər, həm də Qafqaz regionlarının bazarlarında biznesin inkişaf etdirilməsi üçün mükəmməl platforma kimi doğruldub.
“Aquatherm Baku 2016” sərgisi Azərbaycan, Almaniya, İtaliya, Çin, Rusiya və Finlandiyanı təmsil edən 60 şirkəti bir araya toplayacaq. Türkiyədən olan şirkətlər isə sərgidə geniş tərkibdə təmsil olunacaq. “EGIC” (Misir) və “AKFA Group of Companies” (Özbəkistan) şirkətləri sərgidə birinci dəfə iştirak edirlər. Hal-hazırda sərgi iştirakçılarının siyahısında “Aquart”, “Euroclima”, “Yusiko”, “ASPIPE”, “BestTechniK”, “BSS Group”, “Azərtexnolayn”, “Polymart” Azərbaycan şirkətləri, “Sauna İnşaat” (Azərbaycan-Finlandiya), “Sablayn Servis” (Rusiya), “CEWAL S.P.A.” (İtaliya), “Alarko” (Türkiyə), “Turan Makina” (Türkiyə), “Yongkang Huandi Kitchenware Co., Ltd.” (Çin), “Eleks” (Türkiyə) və s. şirkətlər var. Sərgidə “Arcelik”, “Bosch”, “Harvia”, “Immergas”, Rehau, “Mitsubishi”, “E.C.A.”, “Trox”, “Unipump”, “VENT”, “WATT Insulation” və “SPK” kimi brendlər də iştirak edir. Sərginin fərqləndirici cəhəti iştirakçıların ümumi sayının 40 faizini təşkil edən yerli istehsalçıların fəal iştirakıdır, belə ki, “BestTechniK”, “Azboru”, “Azertexnolayn”, “Lenkaran Mexanikleshtirme”, “Croplast”, “Yusiko” və digər şirkətlər yerli istehsalda əldə edilmiş nailiyyətləri nümayiş etdirəcəklər.
“Aquatherm Baku 2016” sərgisində ventilyasiya və kanalizasiya sistemləri, hidrantlar, boru armaturları, kombi/istilik sistemləri, borular, fitinqlər, radiatorlar, suqızdırıcı qazanlar, nasoslar, nasos stansiyaları, su qızdırıcıları, eləcə də polietilen (PE), polipropilenin törəmə polimeri (PPPRC) və polivinilxlorid (PVX) məmulatlar üçün qaynaq avadanlığı, qızdırıcı qazanlar və bir çox digər məhsul təqdim olunacaq.
Ənənəvi olaraq, sərgidə bu sahənin yenilikləri də nümayiş etdiriləcək. İnnovativ məhsullar arasında həm yuxarı, həm də aşağı hissədən su qəbul edən və yüksək keyfiyyətli materialdan hazırlanmış “Bavlenets” sualtı vibrasiya nasosları, habelə istənilən model məişət nasoslarının idarə və mühafizəsi üçün unikal avtomatika blokları (“Sablayn Servis” şirkəti, Rusiya), istənilən dildə işarə qrafikalı displeydən rahatlıqla istifadə etməyə imkan verən yeni “Enjoy” markalı divar termostatları (“Cewal S.P.A.” şirkəti, İtaliya) və binaların mühəndislik sistemlərinin layihələndirilməsi sahəsində tətbiq olunan qabaqcıl proqram təminatlarını (“LiNear GmbH” şirkəti); “Ecodense” kondensasiya qazanları (“Ecostar Burners” şirkəti), çoxmərtəbəli binalar, magistral boru xətləri, xüsusi təyinatlı obyektlərin sanitar-texniki sistemlərində quraşdırılmaq üçün nəzərdə tutulmuş çox möhkəm “Strong” diyircəkli kranları “Profactor Armaturen Gmbh” şirkəti), eləcə də istilik sistemlərini, habelə elektrik və işıq avadanlıqlarını simsiz idarəetmə sistemləri (“Watts Industries Deutschland Gmbh” şirkəti) yer alacaq.