CƏMİYYƏT
Bakıda İslam Əməkdaşlıq Təşkilatına üzv ölkələrin gənc liderlərinin zirvə görüşü işə başlayıb
Bakı, 10 may, AZƏRTAC
Mayın 10-da Bakıda İslam Əməkdaşlıq Təşkilatına (İƏT) üzv ölkələrin gənc liderlərinin zirvə görüşü işə başlayıb.
AZƏRTAC xəbər verir ki, IV İslam Həmrəyliyi Oyunları ərəfəsində keçirilən ikigünlük tədbirə 35 ölkədən 100-dək gənc lider və diplomat qatılıb.
Zirvə görüşündə Azərbaycanın gənclər və idman naziri Azad Rəhimov, BMT-nin Sivilizasiyalar Alyansı üzrə ali nümayəndəsi Nassir Abdulaziz Al-Nasser, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, İslam Həmrəyliyi İdman Federasiyasının baş katibi Faysal Abdulaziz Əl-Nassar və digərləri çıxış ediblər. Tədbirdə, həmçinin İslam Əməkdaşlıq Təşkilatının baş katibi Yusif Əl-Osayminin zirvə görüşünün iştirakçılarına təbrik məktubu oxunub.
Çıxışlarda 2017-ci ilin “İslam Həmrəyliyi İli” elan olunduğu Azərbaycanın müsəlman ölkələri arasında əməkdaşlığın inkişafına verdiyi töhfə yüksək qiymətləndirilib. Mayın 12-də Bakıda start götürəcək IV İslam Həmrəyliyi Oyunlarının müsəlman ölkələri arasında həmrəyliyin daha da gücləndirilməsi işinə mühüm töhfə verməklə yanaşı, Azərbaycanda əsrlər boyu formalaşmış tolerantlıq və multikulturalizm mühitinin dünyaya tanıdılması baxımından əlverişli imkan olduğu qeyd edilib.
Diqqətə çatdırılıb ki, Azərbaycan Respublikasının Prezidenti İlham Əliyev gənclərin intellektual inkişafına, onların xarici ölkələrin gəncləri ilə əlaqələrinin daha da genişləndirilməsinə xüsusi diqqət yetirir. Həmçinin Azərbaycan Respublikasının Birinci vitse-prezidenti, Heydər Əliyev Fondunun prezidenti xanım Mehriban Əliyevanın gəncliyin inkişafı istiqamətində həyata keçirdiyi tədbirlərin əhəmiyyəti xüsusi vurğulanıb.
Çıxışlarda zirvə görüşünün məhz “Bakı-2017” IV İslam Həmrəyliyi Oyunları ərəfəsində keçirilməsinin gənclərin həm fiziki, həm də intellektual inkişafına verilən önəmin göstəricisi olduğu bildirilib. Azərbaycanın fəal dəstək verdiyi bu tədbirlərin İslam ölkələri arasında gənclərlə iş sahəsində daha səmərəli əməkdaşlığın həyata keçirilməsi, gənc nəslin sağlam ruhda böyüməsi və dünyagörüşünün artırılması baxımından rolu yüksək qiymətləndirilib. Qeyd edilib ki, IV İslam Həmrəyliyi Oyunlarının rəsmi gənclik tədbiri olaraq gənclik zirvəsinin keçirilməsi, Azərbaycanda “İslam Həmrəyliyi İli” çərçivəsində təşkil olunan tədbirlər, müsəlman ölkələrinin həmrəyliyinin artırılması, gənclər arasında radikallaşma meyillərinin qarşısının alınması, dünyada artmaqda olan islamofobiya kimi mənfi tendensiyalarla mübarizə istiqamətlərində Azərbaycan dövlətinin atdığı addımlar mühüm əhəmiyyət daşıyır.
“Fəaliyyətdə həmrəylik” devizi altında iki gün davam edəcək gənclər zirvəsində İslam ölkələrinin iqtisadi inteqrasiyası, islamofobiya və radikalizmə qarşı yaradıcı üsullarla mübarizə, münaqişə zonalarında insan haqlarının müdafiəsi, o cümlədən Xocalı soyqırımına beynəlxalq səviyyədə siyasi-hüquqi qiymətin verilməsində gənclərin rolu və s. mövzularda təlimlər təşkil olunacaq, müzakirələr aparılacaq, gənclərin bu məsələlərlə bağlı qərar qəbuletmə mexanizmləri hazırlanacaq.
Sonda fərqlənən gənclərin mükafatlandırılması və Bakı Bəyannaməsinin qəbul edilməsi nəzərdə tutulur.