Bakı, 17 mart, Xatirə Cəfərova, AZƏRTAC

Bakıda keçirilən “Macarıstan günləri” martın 17-də Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) davam edib. Tədbir dünya miqyaslı türkoloq-alim Georq Hazainin xatirəsinə həsr olunub. Toplantıda Macarıstan Baş nazirinin xanımı Aniko Levai iştirak edib.

AZƏRTAC xəbər verir ki, “Macarıstan günləri” çərçivəsində keçirilən tədbirlər barədə məlumat verən Macarıstanın ölkəmizdəki səfiri İmre Laslotski göstərdiyi dəstəyə görə Azərbaycanın Birinci vitse-prezidenti Mehriban Əliyevaya minnətdarlığını bildirib.

Sonra Macar Xalq İncəsənəti Yaradıcılıq Mərkəzinin baş direktoru, professor Janos Havari Bəkir Sıtkı Çobanzadənin yaradıcılığı barədə məlumat verib, şerlərindən nümunələr təqdim edib.

Daha sonra MEK-in direktoru Leyla İmanova tanınmış macar türkoloqu, professor Georq Hazainin xatirəsi ilə bağlı təqdimatla çıxış edib.

Qeyd olunub ki, G.Hazainin elmi fəaliyyətinin əsas istiqamətləri Balkanlar da daxil olmaqla Avropada türk dili və dialektlərinin öyrənilməsi, Balkan-Slavyan dilləri üzərində araşdırmaların aparılması, Çinin Kaşqar vilayətindəki uyğur yazılı abidələrin (Turfan) öyrənilməsi olub.

Tanınmış türkoloq müxtəlif qurumların tərkibində rəhbər və ya təşkilatçı olub, ömrünün son günlərinə qədər Macarıstan Elmlər Akademiyasının türkoloji araşdırmalar sektoruna rəhbərlik edib.

G.Hazainin Azərbaycanla əlaqələri 1965-ci ildən başlayıb. Alim ömrünün son illərinə qədər Mərkəzi Elmi Kitabxananın fondlarına ədəbiyyat göndərib. Azərbaycanı dünyada əhəmiyyətli türkologiya mərkəzi hesab edən görkəmli alim 2012-ci ildə öz şəxsi kitabxanasının türkologiyaya aid bölümünü Azərbaycanın Macarıstandakı səfiri Vilayət Quliyevin təşkilatçılığı ilə 1742 sayda mənbəni MEK-ə və 300-ə yaxın mənbəni Naxçıvan Dövlət Universitetinə hədiyyə edib.

Əsasən bir çox dillərdə müxtəlif ölkələrdə çap edilmiş türkologiyaya aid elmi əsərlərdən ibarət kolleksiyada lüğət, ensiklopediyalar, biblioqrafik göstəricilər, qədim dil abidələrinin tədqiqatına aid elmi əsərlər var. Kolleksiyada, həmçinin Ermənistan-Azərbaycan, Dağlıq Qarabağ münaqişəsi haqqında qiymətli materiallar da mövcuddur. G.Hazainin qızı xanım Sesilia Hazai atasının şəxsi kolleksiyasından türkologiyaya aid 183 mənbəni MEK-ə göndərib. Kolleksiya MEK-in əsas kitab saxlancında Şərq Ədəbiyyatı Fondunda - Bertels, Zaxoder, Paxomov, Ziya Bunyadov, Abbas Zamanov və başqa görkəmli elm xadimlərinin kolleksiyaları ilə yanaşı ayrıca bir guşədə mühafizə olunur.

Sonda Sesilia Hazai atasına göstərilən ehtirama görə ailəsi adından tədbirin təşkilatçılarına təşəkkürünü bildirib.

Qeyd edək ki, tədbir Azərbaycan Respublikasının Birinci vitse-prezidenti Mehriban Əliyevanın dəstəyi, Macarıstanın Xarici İşlər və Xarici İqtisadi Əlaqələr Nazirliyi, Azərbaycanın Macarıstandakı səfirliyi, bu ölkənin Azərbaycandakı səfirliyi və Azərbaycan Milli Elmlər Akademiyasının (AMEA) Mərkəzi Elmi Kitabxanası ilə birgə təşkil olunub.