SİYASƏT
Bakıda “Rusiya və Azərbaycan: 25 illik əməkdaşlıq və inkişaf” mövzusunda konfrans keçirilib VİDEO
Bakı, 24 fevral, AZƏRTAC
Fevralın 24-də Bakıda “Rusiya və Azərbaycan: 25 illik əməkdaşlıq və inkişaf” mövzusunda konfrans keçirilib.
AZƏRTAC xəbər verir ki, Azərbaycan ilə Rusiya arasında diplomatik əlaqələrin qurulmasının 25 illiyinə həsr olunan konfransda hər iki ölkənin parlamentariləri, ekspertlər iştirak ediblər.
Əvvəlcə tədbirdə Xocalı soyqırımı qurbanlarının xatirəsi bir dəqiqəlik sükutla yad olunub.
Rusiya İctimai Palatasının üzvü, politoloq Sergey Markov bildirib ki, tədbirin məqsədi ötən 25 il ərzində ölkələrimiz arasında əlaqələrin inkişafı, habelə əməkdaşlığın daha da möhkəmləndirilməsi məsələlərinə dair fikir mübadiləsi aparmaq, həm Azərbaycanda, həm də Rusiyada cərəyan edən daxili prosesləri müzakirə etməkdir. O qeyd edib ki, Rusiya-Azərbaycan münasibətləri qlobal əhəmiyyət daşıyır. Bu yaxınlarda ABŞ və Rusiya qərargah rəislərinin görüşünün məhz Bakıda keçirilməsi bunun bariz nümunəsidir.
Rusiya Azərbaycandakı səfirinin müşaviri Oleq Muraşov bildirib ki, bu konfrans ölkələrimiz arasında ikitərəfli münasibətlərin, vətəndaşlarımızı narahat edən məsələlərin müzakirəsi üçün gözəl imkandır. Azərbaycan ilə Rusiya arasında qurulmuş münasibətlərin 25 ili ərzində biz əlaqələrimizi daha da inkişaf etdirmişik. Bu dövrdə ölkələrimiz milli maraqlara cavab verən, beynəlxalq və regional təhlükəsizliyə xidmət edən qarşılıqlı əlaqələr modelini yarada bilib.
Qeyd edilib ki, ötən 25 il ərzində Azərbaycan Rusiyanın strateji tərəfdaşına çevrilib. Hazırda Prezident İlham Əliyev ilə Prezident Vladimir Putin arasında möhkəm dostluq əlaqələri mövcuddur. Bu əlaqələr ölkələrimiz arasında münasibətlərin inkişafına müsbət təsir göstərir. Ölkələrimiz arasında ticarət dövriyyəsi də yüksək səviyyədədir. Azərbaycan rəhbərliyinin müdrik siyasəti sayəsində rus dili ölkədə aparıcı dillərdən biridir. Bu, mədəni sahədə də əlaqələrimizin inkişafına töhfə verir. Azərbaycanın güclü, sabit dövlət kimi inkişafı Rusiya üçün böyük əhəmiyyətə malikdir.
Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, bu gün Azərbaycanda rus dilinə, ədəbiyyatına böyük önəm verilir. Azərbaycanın bütün məktəblərində, universitetlərində rus dili və ədəbiyyatı tədris edilir.
Konfransın əhəmiyyətindən danışan S.Seyidov vurğulayıb ki, biz regionumuzun gələcəyini suveren dövlətlərin nümayəndələri olaraq müzakirə etmək üçün burada toplaşmışıq. Ölkələrimiz arasında münasibətlər qarşılıqlı hörmətə, ərazi bütövlüyünün tanınmasına əsaslanır. Bu əlaqələrin qurulmasında Azərbaycan xalqının ümummilli lideri Heydər Əliyevin, Prezident İlham Əliyevin və Prezident Vladimir Putinin xüsusi səyləri var. Bu gün Azərbaycan-Rusiya münasibətləri yüksələn xətlə inkişaf edir.
Milli Məclisin regional məsələlər komitəsinin sədri Arif Rəhimzadə deyib ki, Azərbaycan ilə Rusiya arasında əlaqələr ölkələrimizin rəhbərlərinin şəxsi dostluğu, parlamentlərarası əlaqələr ilə yanaşı, xalqlarımız arasındakı yaxın münasibətlərə əsaslanır. Azərbaycan xalqı Rusiya ilə əlaqələrə böyük dəyər verir. Əlaqələrimizin bugünkü dinamikası çox müsbətdir, qarşılıqlı etimad mövcuddur.
Azərbaycan Rus İcmasının sədri, Milli Məclisin deputat Mixail Zabelin ümummilli lider Heydər Əliyevin Azərbaycan-Rusiya əlaqələrinə verdiyi töhfələrdən, parlamentlərarası münasibətlərin inkişafından danışıb. O, Azərbaycanda 360-dək məktəbdə rus sektorunun mövcud olduğunu və sırf 18 rusdilli məktəbin fəaliyyət göstərdiyini diqqətə çatdırıb.
Rusiya-Azərbaycan parlamentlərarası dostluq qrupunun sədri Dmitri Savelyev vurğulayıb ki, Dağlıq Qarabağ münaqişənin həlli ilə bağlı “yol xəritəsi”nin hazırlanmasının, Rusiya tərəfindən Xocalı faciəsinə qiymət verilməsinin vaxtı yetişib. Çoxları susmağa üstünlük verirlər. Lakin biz nəyin baş verdiyini, kimin günahkar olduğunu bilirik. Sussaq bu cür hallar gələcəkdə təkrarlana bilər.
Milli Məclisin deputatı Elmira Axundova Azərbaycan ilə Rusiya arasında əməkdaşlığın çoxşaxəli olduğunu, bunun özünü təhsil, mədəniyyət, iqtisadiyyat sahələrində büruzə verdiyini söyləyib. E.Axundova Ermənistan-Azərbaycan, Dağlıq Qarabağ münaqişəsinə diqqət çəkərək bildirib ki, bu, bizim ən ağrılı problemimizdir. Azərbaycan bu məsələdə Rusiyadan daha prinsipial, qətiyyətli mövqe gözləyir. Rusiya ATƏT-in Minsk qrupunun həmsədridir. O, bu münaqişənin həlli üçün fəal surətdə çalışsa da, bu, bizə daha çox danışıqlar prosesinin imitasiyası kimi görünür.
Rusiya Dövlət Dumasının informasiya siyasəti, informasiya texnologiyaları və rabitə komitəsi sədrinin müavini Aleksandr Yuşşenko bildirib ki, Azərbaycan ilə Rusiya arasındakı münasibətlər qarşılıqlı etimada əsaslanıb. Bildirib ki, Rusiya və Azərbaycan hər zaman bir-birlərini dəstəkləyib.
Milli Məclisin deputatı Bəxtiyar Əliyev ölkələrimiz arasında əlaqələrin dərin köklərə malik olduğunu qeyd edib. Ermənistan-Azərbaycan, Dağlıq Qarabağ münaqişəsinə toxunan deputat bildirib ki, bu, Azərbaycanın bir nömrəli problemidir. Bu münaqişənin həlli üçün səylər birləşdirilməlidir.
CBC telekanalının baş direktoru Azər Xəlilov bildirib ki, Azərbaycanda rus dilində televiziya kanalının fəaliyyət göstərməsi dövlətimizin başçısı İlham Əliyevin və ümumiyyətlə, ictimaiyyətin rus dilinə olan marağının sübutudur.
Konfransda digər çıxış edənlər Azərbaycan ilə Rusiya arasında tarixi əlaqələrdən, müxtəlif sahələrdə əməkdaşlıqdan, münasibətlərin gələcəkdə inkişafı istiqamətində atılmalı olan addımlardan danışıblar.