Bakı, 14 noyabr, AZƏRTAC

2016-cı ilin “Multikulturalizm ili” elan olunması və bununla bağlı Azərbaycan Prezidenti tərəfindən təsdiq edilmiş Tədbirlər Planına əsasən 16 noyabr Beynəlxalq Tolerantlıq Günü münasibətilə noyabrın 14-də Dini Qurumlarla İş üzrə Dövlət Komitəsi, Bakı Beynəlxalq Multikulturalizm Mərkəzi və Azərbaycan Respublikasının Prezidenti yanında Bilik Fondunun birgə təşkilatçılığı ilə “Tolerantlıq örnəyi Azərbaycan: gənclərin gözü ilə” mövzusunda konfrans keçirilib.

AZƏRTAC xəbər verir ki, konfransda Dini Qurumlarla İş üzrə Dövlət Komitəsi sədrinin müavini Gündüz İsmayılov, Bakı Beynəlxalq Multikulturalizm Mərkəzinin icraçı direktoru Azad Məmmədov, Azərbaycan Respublikası Prezidenti yanında Bilik Fondunun icraçı direktoru Oktay Səmədov, Milli Məclisin deputatı Şahin İsmayılov, Yeni Azərbaycan Partiyası Gənclər Birliyinin sədri Seymur Orucov, qeyri-hökumət və gənclər təşkilatlarının sədrləri, ictimaiyyət nümayəndələri iştirak ediblər.

Konfransdan əvvəl iştirakçılar gənc rəssamların tolerantlıq mövzusunda əsərlərindən ibarət sərgi ilə tanış olublar. Dini Qurumlarla İş üzrə Dövlət Komitəsinin sədr müavini Gündüz İsmayılov bildirib ki, bu il tolerantlıq mövzusunda rəsm əsərlərinin müsabiqəsi keçirilib. Dövlət Komitəsi həmin müsabiqəyə təqdim olunmuş əsərlərin ən yaxşılarından ibarət fotoalbom nəşr etdirib ki, bu gün həm də həmin fotoalbomun təqdimatıdır.

Sərgi ilə bağlı layihənin əlaqələndiricisi, gənc rəssam Dilarə Müzəffərli ətraflı məlumat verib. O qeyd edib ki, sərgidəki bəzi əsərlər indiyədək bir neçə beynəlxalq tədbirlər çərçivəsində nümayiş etdirilib və uğur qazanıb.

Sərgi ilə tanışlıqdan sonra Gündüz İsmayılov konfransı giriş sözü ilə açaraq xalqımızın tolerantlıq ənənələrindən, bu sahədə həyata keçirilən dövlət siyasətindən danışıb. Tolerantlığı ölkəmizin həm də ideoloji, milli və ictimai təhlükəsizliyinin təminatı kimi qiymətləndirən sədr müavini onu Azərbaycan xalqının milli keyfiyyəti kimi xarakterizə edib.

Gündüz İsmayılov Azərbaycanın tolerantlıq nümunələrini faktlarla diqqətə çatdırıb, hər bir azərbaycanlının ölkə ərazisindəki kilsələrə, məscidlərə və sinaqoqlara hörmətlə yanaşdığını vurğulayıb. O bildirib ki, tədbirin keçirilməsində əsas məqsəd gənclər arasında Azərbaycanda mövcud olan dini tolerantlığın, multikulturalizm ənənələrinin, milli-mənəvi dəyərlərin qorunub saxlanılması və təşviqidir.

Bakı Beynəlxalq Multikulturalizm Mərkəzinin icraçı direktoru Azad Məmmədov bildirib ki, ölkəmizin milli-mədəni müxtəliflik və etnik-dini dözümlülük mühiti onu çoxmillətli, çoxkonfessiyalı diyar kimi dünya miqyasında mədəniyyətlərarası dialoqun bənzərsiz məkanına çevirib. Multikulturalizmin dünya miqyasında zaman keçdikcə aktuallıq qazandığını vurğulayan Azad Məmmədov bu amilin Azərbaycanda həm dövlət siyasəti, həm də həyat tərzi olduğunu bildirib.

Azərbaycan Respublikası Prezidenti yanında Bilik Fondunun icraçı direktoru Oktay Səmədov Azərbaycanın tolerantlıq ənənələrindən bəhs edərək 16 noyabr Beynəlxalq Tolerantlıq Günü münasibətilə həyata keçirilən maarifləndirici işlər barədə məlumat verib. O qeyd edib ki, “Multikulturalizm ili” çərçivəsində Fondun təşkilatçılığı ilə Bakıda və bölgələrdə tanınmış alimlərin, mütəxəssislərin silsilə mühazirələri təşkil edilib, gənclərin bu sahədə çoxsaylı layihələri reallaşdırılıb.

Milli Məclisin deputatı Şahin İsmayılov xalqımızın əsrlərdir müxtəlif etnik qrupların nümayəndələri ilə qarşılıqlı hörmət və tolerantlıq şəraitində yaşadığını, ölkəmizdə tolerantlıq mühitinin güclənməsi istiqamətində ciddi addımlar atıldığını diqqətə çatdırıb.

Daha sonra çıxış edən Yeni Azərbaycan Partiyası Gənclər Birliyinin sədri Seymur Orucov tolerantlıq ənənələrinin Azərbaycan xalqının mənəviyyat və sülhsevərliyindən qaynaqlanmasından, tolerantlığın dövlət siyasətinin əsas tərkib hissəsini təşkil etməsindən danışıb. O bildirib ki, Azərbaycanın tolerantlıq sahəsində dövlət siyasətinin əsasını Ulu Öndər Heydər Əliyev qoyub və həmin ənənələr bu gün Prezident İlham Əliyev tərəfindən uğurla inkişaf etdirilir. Seymur Orucov diqqətə çatdırıb ki, Yeni Azərbaycan Partiyası Gənclər Birliyi hər zaman milli-mənəvi dəyərlərin təbliği işinə öz töhfəsini verməyə çalışır. Müxtəlif bölgələrdə Dini Qurumlarla İş üzrə Dövlət Komitəsinin dəstəyi ilə gənclərlə görüşlər keçirilir, müzakirələr aparılır.

Digər çıxışlarda da xalqımızın tolerant və multikultural dəyərlərə verdiyi qiymətdən, bu sahədə dövlətin yürütdüyü siyasətdən və gənclər tərəfindən həyata keçirilən layihələrdən bəhs edilib.