Bakı, 29 noyabr, AZƏRTAC

Noyabrın 29-da Bakıda Türkdilli Dövlətlərin Əməkdaşlıq Şurasına (Türk Şurası) üzv ölkələrin informasiya-kommunikasiya texnologiyaları üzrə birinci Nazirlər Toplantısı keçirilib.

AZƏRTAC xəbər verir ki, Rabitə və Yüksək Texnologiyalar Nazirliyinin (RYTN) təşkilatçılığı ilə keçirilən iclasda Azərbaycan, Türkiyə, Qazaxıstan və Qırğızıstan respublikalarının sahə üzrə nazirləri və nazir müavinləri iştirak edib.

İclasda İKT-nin inkişafına yönələn çoxtərəfli əməkdaşlıq mexanizmləri və yeni imkanların araşdırılması, regional inkişafı dəstəkləyən təşəbbüs və təkliflər müzakirə olunub.

Rabitə və yüksək texnologiyalar naziri Ramin Quluzadə informasiya və kommunikasiya texnologiyalarının hər bir ölkənin ümumi inkişaf dinamikasını göstərən bir sahə olduğunu və müasir dövrdə İKT-nin inkişafının bütün ölkələrdə prioritet istiqamətlərdən biri hesab edildiyini qeyd edib. Bildirib ki, Azərbaycan üçün İKT nisbətən yeni sahədir, amma buna baxmayaraq, ölkəmiz qısa müddətdə bu sahədə böyük uğurlar əldə edib. Azərbaycan Prezidenti İlham Əliyev bu sahənin inkişafını daim diqqət mərkəzində saxlayır. Son illər həyata keçirilən dövlət proqramları və islahatlar İKT sektorunun inkişafına təkan verib. Azərbaycanda informasiya cəmiyyətinin formalaşdırılması üzrə siyasətin aparılması dövlət idarəçiliyində, biznes sektorunda, ümumiyyətlə, cəmiyyətdə hər bir vətəndaşın İKT imkanlarından yararlanması üçün əlverişli şəraitin yaradılması istiqamətində mühüm addımlar atılıb. Rabitə və Yüksək Texnologiyalar Nazirliyi ölkəmizdə rabitə və informasiya texnologiyalarının davamlı inkişafı üçün məqsədyönlü fəaliyyət göstərir. Ölkədə ən son texnoloji yeniliklər tətbiq edilir, əhalinin İKT xidmətlərindən istifadəsi üçün hər cür şərait yaradılır.

“2013-cü ildə Azərbaycanda İKT-nin inkişafı növbəti mərhələyə keçib. “Azerspace-1” ilk milli telekommunikasiya peyki orbitə çıxarılıb və bununla da ölkəmiz kosmik dövlətlərdən birinə çevrilib. Hazırda “Azerspace-2" peykinin orbitə çıxarılması üzrə işlər aparılır. Bir çox ölkələrin dövlət və özəl qurumları mövcud peyklərin xidmətlərindən istifadə edir. Bu istiqamətdə əməkdaşlığın genişləndirilməsinə həmişə hazırıq və türkdilli dövlətləri təmsil edən təşkilatları İKT xidmətlərimizdən istifadəyə dəvət edirik. İKT sahəsi daim inkişaf edən sahədir. Bu baxımdan beynəlxalq təcrübənin öyrənilməsi, qarşılıqlı əməkdaşlıq əlaqələrinin qurulması, təcrübə mübadiləsinin artırılması vacib şərtdir”, – deyə nazir qeyd edib.

Nazir bildirib ki, türkdilli ölkələr arasında iqtisadi və infrastruktur layihələrinin uğurlu inkişafı üçün Azərbaycan səylərini əsirgəmir. İnfrastruktur layihələri haqqında danışan nazir Azərbaycan Respublikası Hökumətinin təşəbbüsü olan “Trans-Avrasiya Super İnformasiya Magistralı” layihəsinin önəmini qeyd edib.

R.Quluzadə bildirib ki, böyük coğrafi ərazini əhatə edən türk dövlətləri mövcud imkanlardan faydalanmaqla TASİM kimi infrastruktur layihələrinin həyata keçirilməsi istiqamətində real addımlar atılmalıdır. Nazir təklif edib ki, regionda genişzolaqlı internet bağlantısının inkişaf etdirilməsi İKT sahəsində işçi qrupunun fəaliyyət istiqamətlərindən birini təşkil etsin.

“Əminəm ki, Türkdilli Dövlətlərin Əməkdaşlıq Şurası çərçivəsində ildə iki dəfə keçiriləcək İKT üzrə işçi qrupunun iclasları və hər il təşkil olunacaq Nazirlər Toplantısı dövlətlərimiz arasında bu sahədə əməkdaşlığa təkan verəcək və yeni bir platforma rolunu oynayacaq”, - deyə nazir diqqətə çatdırıb.

İclasda Türk Şurasının Baş katibi səfir Ramil Həsənov, Türkiyə Respublikasının nəqliyyat, dənizçilik və rabitə naziri Əhməd Arslan, Qazaxıstan Respublikasının informasiya və kommunikasiya nazirinin müavini Alan Azhibayev, Qırğızıstan Respublikasının İnformasiya Kommunikasiya Texnologiyaları Dövlət Komitəsinin sədri Bakıt Şarşembiyev çıxış ediblər. Qeyd edilib ki, türkdilli dövlətlərin peyk xidmətləri, elektron hökumət həlləri, kibertəhlükəsizlik istiqamətləri üzrə əməkdaşlıq əlaqələrinin genişləndirilməsi üçün potensial imkanlar mövcuddur. Buna görə də Şuraya üzv olan ölkələr perspektiv layihələrdə bu imkanlardan faydalanmalıdır.

Sonra Türkiyə Poçt və Teleqraf Təşkilatı ilə “Azərpoçt” MMC arasında əməkdaşlığa dair anlaşma memorandumu imzalanıb.

Müzakirələrin sonunda İşçi Qrupunun kibertəhlükəsizlik, “Elektron hökumət”, TASİM layihəsi və peyk xidmətləri üzrə 4 alt qrupun yaradılması ilə bağlı qərar qəbul edilib.

Xatırladaq ki, İKT sahəsində İşçi Qrupunun yaradılması təşəbbüsü Türk Şurasının sonuncu zirvə görüşündə Azərbaycan Respublikası tərəfindən irəli sürülüb və dövlət başçıları tərəfindən dəstəklənib.