Bakı, 21 may, AZƏRTAC 

Mayın 21-də Bakı Ekspo Mərkəzində XXI Azərbaycan Beynəlxalq qida sənayesi (“WorldFood Azerbaijan-2015”) və IX Azərbaycan Beynəlxalq kənd təsərrüfatı (“CaspianAgro-2015”) sərgiləri açılıb.

AZƏRTAC xəbər verir ki, sərgilərin təşkilatçıları “Iteca Caspian” MMC və “ITE Group Plc” şirkətidir. Sərgilər Kənd Təsərrüfatı Nazirliyi, Azərbaycanda İxracın və İnvestisiyaların Təşviqi Fondu və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası tərəfindən dəstəklənir.

Açılış mərasimində çıxış edən kənd təsərrüfatı naziri Heydər Əsədov bildirib ki, mövcud əlaqələrin möhkəmlənməsində mühüm rol oynayan bu sərgilər yeni tərəfdaşların axtarışına, Azərbaycanın qida sənayesində yeni texnologiyaların tətbiqinə şərait yaradan işgüzar platformaya çevrilib. Nazir vurğulayıb ki, son illər dövlətimizin başçısı tərəfindən Azərbaycanda qeyri-neft sektoruna göstərilən yüksək diqqətin nəticəsi kimi iqtisadiyyatın aparıcı sahələrindən olan aqrar sahə yeni inkişaf mərhələsinə qədəm qoyub, respublikada ərzaq təhlükəsizliyinin təmin edilməsi prosesində əhəmiyyətli nailiyyətlər əldə olunub. Prezident İlham Əliyev tərəfindən 2015-ci ilin “Kənd təsərrüfatı ili” elan edilməsi bu sahənin potensialının tam reallaşdırılması üçün yeni imkanlar açır. Hazırda yüksək məhsuldarlığın təmin edilməsi, yerli məhsulların rəqabət qabiliyyətinin artırılması, kənd təsərrüfatının şaxələndirilmiş inkişafı, fermerlərə dövlət dəstəyinin daha səmərəli təşkili və ərzaq təhlükəsizliyinə nail olunması aqrar sahədə dövlətin mühüm hədəfləri olaraq nəzərdə tutulur.

Nazir vurğulayıb ki, aqrar sahədə aparılan uğurlu islahatların mühüm nəticələrindən biri də Azərbaycanın bir sıra strateji məhsullara olan tələbatının yerli istehsal hesabına tam ödənilməsi və ölkənin ərzaq təhlükəsizliyində xarici bazardan asılılığının azalmasıdır. Aqrar sektorda yüksək texnoloji emal və istehsal müəssisələrinin qurulması qida sənayesi və kənd təsərrüfatı məhsullarının ixrac həcmlərinin artmasına səbəb olub.

Heydər Əsədov bildirib ki, bu il sərgilərdə dünyanın 39 ölkəsindən 293 şirkət iştirak edir. Bu da sərginin təşkil olunduğu illər ərzində rekord göstəricidir. Bu il sərginin ümumi ekspozisiyasının 28 faizini yerli şirkətlərin, 72 faizini isə xarici şirkətlərin təşkil etməsi, eləcə də ötən illə müqayisədə qeyd olunan sərgilərin sahəsinin 37 faiz artması tədbirin qida və kənd təsərrüfatı məhsullarının nümayişi üçün mühüm beynəlxalq foruma çevrilməsindən xəbər verir.

Belarus Respublikası Baş nazirinin müavini Vladimir Semaşko çıxış edərək bildirib ki, Belarus Azərbaycanla kənd təsərrüfatı sahəsində əməkdaşlığı inkişaf etdirməyə hazırdır. Belarusun elmi müəssisələri bu sahədə azərbaycanlı həmkarları ilə bilik və nailiyyətlərini bölüşmək əzmindədir. V.Semaşko qeyd edib ki, sərgilərdə Belarusun milli stend ilə təmsil olunması kənd təsərrüfatı sahəsində Azərbaycan və Belarus arasında ikitərəfli münasibətlərin əhəmiyyətini təsdiqləyir. Belarusun sərgi meydançasında kənd təsərrüfatının bütün istiqamətləri üzrə ölkənin 60-dan çox şirkətinin məhsulu təqdim olunur.

“ITE Group Plc” şirkətinin icraçı direktoru Edvard Stroon isə çıxışında göstərdikləri dəstəyə görə Azərbaycan Respublikasının Kənd Təsərrüfatı Nazirliyinə minnətdarlığını bildirib.

“WorldFood Azerbaijan-2015” sərgisi şirkətlərin sayına və əhatə etdiyi əraziyə görə 15 faiz artım nümayiş etdirməklə, dünyanın 33 ölkəsini təmsil edən 151 şirkəti bir arada toplayır. Eksponentlərin ümumi sayının 26 faizini təşkil edən yerli istehsalçı və distribüterlər də böyük fəallıq göstərirlər. Sərginin daimi yerli iştirakçıları arasında ölkənin aparıcı müəssisələri - “Atena”, “Azersun Holding”, “Caspian Construction Systems”, “BMS Agro”, “Qəbələ konserv zavodu”, “Metak” və digər şirkətlər yer alır.

Hər il sərgi yeni iştirakçıları cəlb edir. Bu il Azərbaycan, Amerika Birləşmiş Ştatları, Əlcəzair, Çexiya, Niderland Krallığı və digər ölkələrin şirkətlərindən ibarət olan debütantlar sərgi iştirakçılarının 40 faizini təşkil edir. Sərgidə fərdi stendlərlə yanaşı, 5 xarici kollektiv ekspozisiya da yer alır. Argentina, Avstraliya, Belarus, Litva və Polşanın müəssisə və fabriklərinin nümayəndələri sərgi ziyarətçilərinə istər uzun illər sevilən, istərsə də Azərbaycan bazarı üçün yeni olan məhsullarını təqdim edirlər.

Sərginin ümumi ekspozisiyasında balıq, mal, qoyun və quş əti, çay və qəhvə, süd məhsulları, dondurulmuş qidalar, quru meyvələr, baqqaliyyə, qənnadı və un məmulatları, meyvə-tərəvəz məhsulları, konservlər, soyuducu sistemlər, çörəkxanalar üçün avadanlıqlar, qablaşdırma avadanlıqları və digər məhsullar nümayiş olunur.

Bakı Ekspo Mərkəzinin iki pavilyonunu və xarici meydançanı əhatə edən “CaspianAgro - 2015” sərgisi dünyanın 21 ölkəsindən 142 şirkəti bir araya toplayıb. Sərginin iştirakçıları arasında Almaniya, Yunanıstan, İtaliya, İspaniya, Koreya Respublikası, Niderland Krallığı, Rusiya, ABŞ, Türkiyə, Ukrayna, Fransa və digər ölkələrdən kənd təsərrüfatı məhsulları və avadanlıqlarının istehsalçıları və distribüterləri var. İlk dəfə olaraq, sərgidə Şri-Lanka və İordaniya şirkətləri də iştirak edirlər. Ümumilikdə, sərgi iştirakçılarının 50 faizini yeni şirkətlər təşkil edir və onlar Azərbaycanın kənd təsərrüfatı bazarında ilk addımlarını atırlar.

Sərgi kənd təsərrüfatı sektorunun ən aktual sahələrini əhatə edir. Belə ki, sərgidə maldarlıq, suvarma, irriqasiya və digər sistemlər geniş şəkildə təqdim olunur.

Kənd təsərrüfatı texnikalarının ekspozisiyası Bakı Ekspo Mərkəzinin daxilində, eləcə də açıq meydançada yerləşir. Burada “Klever”, “Rostselmaş” (Rusiya), Gəncə Avtomobil Zavodu, “Azərtexnika”, “Grand Motors” (Azərbaycan), “New Holland” (İtaliya), “Sampo” (Finlandiya), “Fliegle” (Almaniya) və “Maschio Gaspardo” (İtaliya) şirkətlərinin, eləcə də digər bu kimi istehsalçı və distribüterlərin təklif etdikləri müxtəlif kənd təsərrüfatı məhsullarını yığan texnikanı, yer şumlayan, toxum səpən maşınları, habelə kombaynlar və bütün növ kənd təsərrüfatı işləri üçün müxtəlif təyinatlı aqreqatları görmək mümkündür.

Bakı Ekspo Mərkəzinin açıq meydançasında ilk dəfə olaraq ən yaxşı yerli və xarici damazlıq heyvan cinsləri - keçi, inək, dəvə, qoyun nümayiş etdirilir.

Elə həmin gün “CaspianAgro - 2015” sərgisi çərçivəsində Bakı Ekspo Mərkəzinin konfrans zalında Rusiya İxrac Sığorta Agentliyinin (EKSAR) dəstəyi, RF İqtisadi İnkişaf Nazirliyi və RF-nin Azərbaycandakı ticarət nümayəndəliyinin təşkilatçılığı ilə Rusiya şirkətlərinin biznes-missiyası təşkil olunub. Biznes-missiyada təqdimatlar keçirilib, əməkdaşlığın genişləndirilməsinin vacibliyi vurğulanıb.

Sərgilər mayın 23-dək davam edəcək.