Bakı, 27 aprel, Elvira Məmmədova, AZƏRTAC

Aprelin 27-də Bakıda Avropa İttifaqı (Aİ) və Azərbaycan Milli Elmlər Akademiyası (AMEA) İnsan Hüquqları İnstitutunun birgə əməkdaşlığı ilə “Genetik modifikasiya olunmuş məhsulların (GMO) hüquqi tənzimlənməsi və risklərin qiymətləndirilməsi” mövzusunda beynəlxalq seminar işə başlayıb.

Seminarda Milli Məclisin deputatları, beynəlxalq ekspertlər, ölkədəki ali məktəblərin, nazirlik və komitələrin nümayəndələri, alimlər və kütləvi informasiya vasitələrinin təmsilçiləri iştirak ediblər.

AZƏRTAC xəbər verir ki, Aİ-nin TAİEX proqramı çərçivəsində reallaşan seminarın məqsədi Azərbaycanda GMO məhsulları sahəsində hüquqi bazanın təkmilləşdirilməsi və Azərbaycan qanunvericiliyinin Avropa standartlarına uyğunlaşdırılması, ərzaq təhlükəsizliyinin və əhalinin sağlamlığının gücləndirilməsi istiqamətində təkliflərin verilməsidir.

Seminarın açılışında institutun direktoru, Milli Məclisin deputatı Aytən Mustafayeva çıxış edərək Azərbaycanda GMO məhsullarının idxalı, istehsalı və dövriyyəsinin qadağan edilməsi məsələlərinə toxunub. Eyni zamanda, bu məsələ ilə bağlı son dövrlərdə Milli Məclisdə Cinayət və İnzibati Xətalar Məcəllələrinə yeni maddələrin əlavə olunmasının ciddi müzakirə edildiyini bildirib.

A.Mustafayeva diqqətə çatdırıb ki, genetik modifikasiya olunmuş orqanizmlərlə, eyni zamanda, ekoloji təmiz məhsullarla bağlı gənclərin maarifləndirilməsi məqsədi ilə İnsan Hüquqları İnstitutu tərəfindən ali məktəblər üçün dərslik də hazırlanıb.

Tədbirin Azərbaycan üçün böyük əhəmiyyət daşıdığını vurğulayan A.Mustafayeva müzakirə olunan məsələlərin gələcəkdə ölkəmizdə bu sahədə mövcud qanunvericiliyin təkmilləşdirilməsinə töhfəsini verəcəyinə inamını ifadə edib.

Milli Məclisin aqrar siyasət komitəsinin sədri Eldar İbrahimov bu məsələnin dövlət idarəçiliyi üçün aktual problem olduğunu qeyd edib. Komitə sədri dünya ictimaiyyətini narahat edən genin dəyişdirilməsinin insan sağlamlığına zərərindən danışıb, bu məsələ ilə bağlı ölkəmizdə ciddi tədbirlərin görülməsinin vacibliyini vurğulayıb.

Sonra Azərbaycanda GMO məhsullarının idxal və istehsalı (istifadə, satış, paylanma) haqqında məlumat verilib.

İtaliyalı ekspertlər Ugo Marchesi və Roberta Onori “Avropa İttifaqının aqro biotexnologiyaya yanaşması”, “Geni dəyişdirilmiş qida məhsualları və yemin müəyyən olunması, etiketlənməsi üzrə Aİ-nin qaydaları”ndan, həmçinin “Avropa İttifaqının GMO üzrə risklərin qiymətləndirməsi” üsullarından danışıblar.

Hollandiyalı ekspert Piet de Vildt də Avropa İttifaqında “GMO məhsullarının xüsusi istifadə forması və düşünülmüş şəkildə yayılması məsələlərini, həmçinin Hollandiyanın bu sahədə təcrübəsini seminar iştirakçılarının diqqətinə çatdırıb.

Tədbirdə Azərbaycanda GMO məhsullarının bir sıra aspektləri ətrafında geniş fikir mübadiləsi aparılıb, iştirakçılar müzakirə olunan məsələ ilə bağlı təklif və mülahizələrini bildiriblər.

Seminar işini aprelin 28-də başa çatdıracaq.