Bakı, 11 dekabr, Zərəngiz Mansurova, AZƏRTAC

Dekabrın 11-də Mədəniyyət və Turizm Nazirliyi və Azərbaycan Milli Kulinariya Assosiasiyasının (AMKA) təşkilatçılığı ilə Bakıda ikinci beynəlxalq plov festivalı təşkil olunub.

AZƏRTAC xəbər verir ki, AMKA-nın prezidenti, UNESCO-nun Ənənəvi Qida Komitəsinin sədri Tahir Əmiraslanov festivalın əhəmiyyətindən söz açıb.

Bildirib ki, Azərbaycanda fəaliyyət göstərən diplomatik nümayəndəliklər tərəfindən hər ölkənin ənənələrinə uyğun düyüdən hazırlanan xörəklər sərgiyə gələnlərə təqdim edilib.

Tədbirdə Türkiyə, Özbəkistan, Yaponiya, İndoneziya, Tacikistan, Səudiyyə Ərəbistanı, Əfqanıstan, Hindistan, Fələstin, İran və s. ölkələrin səfirliklərinin nümayəndələri iştirak ediblər.

Festivalda İranın Azərbaycandakı səfiri Möhsün Pakayin, 20 Yanvar və Qarabağ qazisi Arif Məhərrəmov, AMKA-nın yaranmasında böyük əməyi olan Yusif Ələkbərov və digər natiqlər bildiriblər ki, Azərbaycan mədəniyyəti və kulinariyasını təbliğ etmək məqsədi daşıyan festivalda ən gözəl əl işləri sərgiləməklə yanaşı, mətbəx mədəniyyətimiz beynəlxalq səviyyədə təqdim olunur. Festivalda ilk dəfə təqdim edilən xörəklər, şirniyyatlar, içkilər hamının, xüsusən xarici qonaqların böyük marağına səbəb olub.

Mədəniyyət və Turizm Nazirliyinin şöbə müdiri Fikrət Babayev söyləyib ki, dünyanın hər yerində mətbəx insanların dünyagörüşünün, mənəvi aləminin, psixologiyasının və əxlaqının göstəricisidir. Mədəniyyətlərin paylaşması, insanların dünyagörüşünə öz yüksək təsirini göstərir və qarşılıqlı anlaşma, dinc-yanaşı yaşama prinsiplərini önə çəkir.

Festivalda “Şah plov”, “Döşəmə plov”, “Şüyüd plov”, “Fisincan plov”, “Boranı plov”, “Çığırtma plov” da daxil olmaqla 100-dən çox növdə plov təqdim olunub. Maraqlananlara plovun və digər xörəklərin bişirilmə qaydalarından bəhs edən reseptlər, bukletlər verilib. Hər bir xalqın öz aşpazları milli geyimlərində yeməkləri iştirakçılara təqdim edib.

Hindistanın Azərbaycandakı səfirinin xanımı Barbara Rana belə bir tədbirdə iştirak etməkdən çox məmnun olduqlarını deyib: “Fikirləşirəm ki, Azərbaycan mətbəxi ilə hind mətbəxi arasında bir çox oxşarlıqlar var. Məsələn, bizim düyünü hazırlamaq, plovu bişirmək tərzlərimiz eynidir. Ədviyyatların istifadə olunmasını buna misal göstərə bilərik”. Hind mətbəxində plovun çox növlərinin olduğunu qeyd edən xanım hind plovunun əsasən basmati düyüsündən hazırlandığını bildirib.

Zəngin mətbəxə malik olduqlarını, hər bölgənin özünəməxsus mətbəx mədəniyyətinin mövcudluğunu vurğulayan Türkiyənin ölkəmizdəki səfirliyinin mədəniyyət və tanıtma müşaviri Murat Karaçanta festivalda yalnız düyüdən hazırlanmış 3 növ – içli, Ege və Mengen plovlarını təqdim etdiklərini söyləyib.

“Bu festivalda müxtəlif ölkələrin plovları nümayiş olunur. Biz də bir plovsevər ölkəsi olaraq bu festivalda iştirak edirik. Festivalın məqsədi də çox gözəldir. Belə ki, bu region xalqlarının daha da yaxınlaşmasına səbəb olur”- deyə İranın ölkəmizdəki səfiri Möhsün Pakayin qeyd edib. Səfir İranda 20-dən artıq plov növünün olduğunu bildirərək deyib ki, festivalda bir neçə növ plov nümayiş etdiririk. O, İranla Azərbaycan arasındakı yaxınlığı vurğulayaraq bəzi plov növlərimizin bənzərliyini söyləyib.

Özbəkistanın ölkəmizdəki səfirliyinin təmsilçisi isə özbək plovunun xüsusiyyətləri barədə məlumat verib. Bildirib ki, özbək plovunun hazırlanmasında xüsusi düyü növündən və pambıq yağından istifadə olunur. Özbəkistanda 100-dən artıq plov növünün olduğu vurğulanaraq qeyd edilib ki, orada aşın bütün ərzaqları bir yerdə bişirilir və plova sarımsaq və bibər əlavə olunur ki, o da xüsusi dad verir.

“Sərin” MMC şirkətinin kulinar-texnoloqu Ceyhan Nur Azərbaycan mətbəxinin şah yeməyi olan plovun 100-dən artıq növünün təsdiq edildiyini diqqətə çatdırıb. Bu festivalda 3 komanda olaraq Azərbaycanı təmsil etdiklərini və altı növ plov hazırladıqlarını bildirən C.Nur daha fərqli plovlarımızı təqdim etmək istədiklərini söyləyib.

Festivalda hər xalqın folklor musiqisi, rəqsləri də nümayiş olunub.

Sonda festivalda əməyi olan və yüksək peşəkarlıq göstərənlər T.Əmiraslanovun rəhbərlik etdiyi qurum tərəfindən fəxri diplomlarla təltif edilib.