İQTİSADİYYAT


Bakıda keçiriləcək sərgi Azərbaycan-Yaponiya iqtisadi əməkdaşlığını daha da möhkəmləndirəcək

Tokio, 5 avqust, AZƏRTAC 

Cari ilin oktyabrında Bakı Biznes Mərkəzində təşkil ediləcək Yaponiya qida məhsulları sərgisi iki ölkə arasında iqtisadi əməkdaşlığı daha da möhkəmləndirəcək.

Bu sözləri AZƏRTAC-ın Yaponiyadakı xüsusi müxbirinə müsahibəsində Yaponiyanın “Cross Border Club” şirkətinin prezidenti, sərginin təşkili üzrə işçi qrupun sədri Kazuyasu İşida deyib.

K.İşida qeyd edib ki, sərginin təşkili ilə bağlı iyulun 21-dən 27-dək 25 nəfər yapon iş adamından ibarət qrup Bakıya səfər edib. Qrupun tərkibinə sərginin təşkili üzrə işçi qrupun sədri, üzvlər və iş adamları daxil idi.

Səfər çərçivəsində bu mühüm iqtisadi tədbirin təşkili üzrə Azərbaycan tərəfdən təşkilatçılar və şirkətlərlə görüşlər keçirilib. Əsasən Kənd Təsərrüfatı Nazirliyi, “Silkway West Airlines”, “Azərsun Holding”, “Bravo” və “Araz” supermarketlər qruplarının nümayəndələri ilə müzakirələr aparılıb. Bu müzakirələr sərginin yüksək səviyyədə təşkilində mühüm rol oynayacaq.

Sərgidə təqdim ediləcək yapon qida məhsulları barədə məlumat verən işçi qrupun sədri bildirib ki, həmin məhsullar yüksək keyfiyyəti ilə diqqəti cəlb edir. Sərgi Azərbaycanın ticarət və ictimai iaşə müəssisələrinə birbaşa yapon əmtəələrinə çıxış əldə etmək imkanı qazandıracaq. Eyni zamanda, azərbaycanlı istehlakçılar da həmin məhsulları birbaşa yoxlamaq imkanı qazanacaqlar. Bu tədbir uzaq məsafə qət etmədən yapon ərzaq məhsullarını və içkilərini dadmaq imkanı qazandırmaq baxımından əhəmiyyətli olacaq.

Səfərin yapon iş adamları üçün Azərbaycan xalqının qonaqpərvərliyi, mədəniyyəti, mətbəxi ilə tanış olmaq imkanı yaratdığını vurğulayan K.İşida bildirib ki, bu səfər, eyni zamanda, gələcək əməkdaşlıq imkanlarını araşdırmaq baxımından da əhəmiyyətli olub. Səfərdə iştirak edən yaponlar bir daha əmin oldular ki, Azərbaycan Yaponiya üçün çox maraqlı və etibarlı tərəfdaş ola bilər.

Azərbaycan məhsullarının Yaponiyada sərgisinin təşkili barədə sualı cavablandıran işçi qrupun sədri bildirib ki, belə bir ideya var və hazırda onun həyata keçirilməsi üçün ilkin layihə hazırlanır: “Azərbaycanın təbii, orqanik ərzaq məhsullarının Yaponiya bazarına gətirilməsi mənim ən böyük arzumdur. “Made in Azerbaijan” brendi həqiqətən də dünya səviyyəli məhsullar deməkdir. Xüsusən Azərbaycan çayı, zeytun yağı və nar mənim çox xoşuma gəlir. Digər kənd təsərrüfatı məhsullarının keyfiyyətinə də söz ola bilməz. Düşünürəm ki, Yaponiya qida məhsulları sərgisi zamanı yaranacaq əməkdaşlıq əlaqələri Azərbaycan məhsullarının Yaponiya bazarına gətirilməsində də mühüm rol oynayacaq.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.