Oktyabrın 24-də Azərbaycan Milli Elmlər Akademiyasının (AMEA) İnformasiya Resursları Mərkəzində böyük mütəfəkkir Əli bəy Hüseynzadənin 150 və görkəmli türkoloq, dilçi alim, akademik Məmmədağa Şirəliyevin 105 illik yubileylərinə həsr olunan “Sələflər və xələflər” birinci Beynəlxalq simpoziumunun bölmə iclasları keçirilib.

AZƏRTAC xəbər verir ki, türkiyəli professor Şərif Əli Bozkaplan və dosent Elçin İbrahimovun həmsədrliyi ilə keçirilən “Ortaq türkcə: əlifba, imla, termin” bölməsində Azərbaycan və Türkiyə alimləri çıxış ediblər.

İclasda türkiyəli professorlar Şükrü Haluk Akalının “Türk dünyası ortaq ünsiyyət dilinin tanıdılmasında termin çalışmalarının önəmi. İnformasiya terminləri örnəyi”, Ərdoğan Uyğurun “Ortaq ədəbi dil anlayışı və Türkiyə-Azərbaycan dil əlaqələri”, dosent Aygül Hacıyevanın “XIX-XX əsrlərdə türk dünyasında “cədidizm” və digər mövzularda ümumilikdə doqquz məruzə dinlənilərək müzakirə edilib.

“Türk dilləri: axtarışlar, problemlər” bölməsinə ingiltərəli professor Elizabetta Raqaqnin və professor Məhərrəm Məmmədov həmsədrlik ediblər. Bu bölmənin iclasında Azərbaycan, Türkiyə və Özbəkistan alimlərinin məruzələri dinlənilib.

Simpoziumun sonuncu bölməsi “Dilin tarixinə nəzər” mövzusuna həsr olunub. Qazaxıstanlı professor Erden Kajıbek və dosent Vahid Zahidoğlunun həmsədrliyi ilə keçirilən iclasda Azərbaycan və Türkiyə dilçilərinin məruzələri böyük maraq doğurub.

Hər üç bölmədə məruzələr ətrafında müzakirələr aparılıb, suallar cavablandırılıb.

Daha sonra simpoziumun bağlanışı olub.

Tədbirdə AMEA-nın Nəsimi adına Dilçilik İnstitutunun direktoru, simpoziumun təşkilat komitəsinin sədri, akademik Tofiq Hacıyev Bakıda üç gün davam edən beynəlxalq tədbirin öz işini uğurla başa çatdırdığını, bölmə iclaslarında türkologiya elminin inkişafı ilə bağlı geniş müzakirələrin aparıldığını bildirib.

Təşkilat komitəsinin sədri tədbirdə Türkiyə, Şimali Kipr, Albaniya, Qazaxıstan, Özbəkistan, İngiltərə və Çin də daxil olmaqla, ümumilikdə, 12 ölkədən 33 alimin iştirak etdiyini, iki ildən bir keçiriləcək simpoziumun coğrafiyasının ildən-ilə genişlənəcəyinə, fəaliyyətinin daha da səmərəli olacağına əminliyini vurğulayıb. Akademik T.Hacıyev tədbirin keçirilməsinə göstərilən dəstəyə görə Azərbaycan Prezidenti İlham Əliyevə iştirakçılar adından minnətdarlığını bildirib.

Türkologiya elminin inkişafında Azərbaycanın çox mühüm rolunun olduğunu qeyd edən alim bildirib ki, Birinci Türkologiya Qurultayı da 1926-cı ildə Bakıda keçirilib. Həmin qurultayda türk dillərinin problemləri geniş müzakirə olunub. Birinci Türkologiya Qurultayının 90 illiyinə həsr olunan ikinci qurultayın 2016-cı ildə Bakıda keçirilməsi nəzərdə tutulur. “Sələflər və xələflər” birinci Beynəlxalq simpoziumu həmin tədbirə hazırlıq məqsədi daşıyır.

Akademik T.Hacıyev simpozium iştirakçılarına təşəkkürünü bildirib, onlara fəaliyyətlərində uğurlar arzulayıb.

Türkiyəli professorlar Zeynəb Korkmaz, Şükrü Haluk Akalın, Şərif Əli Bozkaplan, Həmzə Zülfikar, Nəcati Dəmir, Mustafa Erden, qazaxıstanlı alim Erden Hajıbek, azərbaycanlı professorlar- Prezident təqaüdçüsü Aydın Məmmədov, Mehman Musaoğlu və digər çıxış edənlər də müxtəlif ölkələrdən tanınmış dilçi alimləri bir araya toplayan simpoziumun əhəmiyyətini xüsusi vurğulayıblar. Müasir dünyada elmin mühüm rolunu qeyd edən natiqlər bu sahəyə daim diqqətin artırılmasının vacibliyini vurğulayıb, bu cür görüşlərin davamlı olmasını, müxtəlif ölkələrdə keçirilməsini arzulayıblar.

Sonda simpozium iştirakçıları adından Azərbaycan Respublikasının Prezidenti İlham Əliyevə müraciət qəbul olunub.

Bununla da Bakıda böyük mütəfəkkir Əli bəy Hüseynzadənin 150 və akademik Məmmədağa Şirəliyevin 105 illik yubileylərinə həsr olunan üçgünlük “Sələflər və xələflər” birinci Beynəlxalq simpoziumu öz işini başa çatdırıb.