REGİONLAR
Bakıda keçirilən beynəlxalq seminarın iştirakçılarından bir qrupu Şamaxı və Ağsu rayonlarında olub
AZƏRTAC xəbər verir ki, layihə COMCEC-ə üzv olan 4 ölkədə--Azərbaycan, Qazaxıstan, Özbəkistan və Türkiyədə mədəni turizm, xüsusilə arxeoloji turizm potensialının araşdırılmasını, oxşar mədəni irs nümunələrinə sahib olan bölgələrin müəyyən edilməsini, araşdırmaların nəticələrinə əsasən bu ölkələri birləşdirən ortaq turizm məhsullarının yaradılmasını nəzərdə tutur.
Bu baxımdan 4 ölkənin ekspert qrupunun, turizm şirkəti təmsilçilərin qatıldıqları beynəlxalq seminarın iştirakçıları Şamaxıda arxeoloji turizm potensialı ilə, Ağsuda isə Orta Əsr Ağsu Şəhəri Arxeoloji Turizm Kompleksi ilə hərtərəfli tanış olublar.
Qonaqlar Şamaxıda əsasən “Cümə məscidi” tarix-memarlıq abidəsinə, tarix-diyarşünaslıq muzeyinə, “Yeddi günbəz” qəbiristanlığına və “Yeddi günbəz” memarlıq abidəsinə, “Şirvanşahlar” sarayının qalıqları arxeoloji abidəsinə baxıblar.
Ağsuda isə qonaqlara orta əsr Ağsu şəhərinin qalıqları barədə hərtərəfli məlumat verilib. Həmin günün sonunda Orta Əsr Ağsu Şəhəri Turizm Kompleksində seminar keçirilib.
Mədəniyyət və Turizm Nazirliyi turizm şöbəsinin böyük məsləhətçisi, layihənin əlaqələndiricisi Məleykə Hüseynova seminarı açaraq bildirib ki, artıq beynəlxalq layihənin birinci mərhələsi yekunlaşmaq üzrədir. Oktyabr ayında yekun vurulacaq layihənin əhəmiyyətindən danışan natiq COMCEC regionunda beynəlxalq səviyyədə rəqabətli turizmə və davamlı turizmin inkişafına nail olmaq, əsas turizm bazalarında bu ölkələrin mədəni turizm resursları barədə məlumatlılığı artırmaq, iştirakçı ölkələrin turizm sahəsində dövlət və özəl sektor nümunələri arasında əməkdaşlığı gücləndirmək və bu bölgəyə dünya turizm bazasından daha çox turist cəlb etmək məqsədilə ciddi səy göstərildiyini söyləyib.
Seminarda çıxış edən Türkiyənin Van Yüzüncüyıl Universitetindən Selami Bak, Qazaxıstandan Solmaz İskakova, Özbəkistandan abidələrin mühafizəsi üzrə müfəttiş Maysara Nabiraeva layihə çərçivəsində əldə olunan nəticələr, ölkələrimizin ortaq mədəni irsi, arxeoloji turizm potensialı, İslam mədəniyyətinin əhəmiyyəti, yaradılacaq yeni birgə turizm məhsulu və onun turizm sənayesi üçün əhəmiyyəti, çoxtərəfli əməkdaşlığın perspektivləri və s. məsələlər barədə danışıb, müzakirələr aparıblar.